رووداو دیجیتاڵ بەربژێرێکی کورد بۆ پۆستی سەرۆکی شارەوانیی ستۆکهۆڵم ئاشکرای دەکات کە لەپێناو مانەوەی لە گۆڕەپانی سیاسەتدا "باجێکی گەورە"ی داوە و رووبەڕووی هەڕەشەی کوشتن بووەتەوە. گولان ئاڤجی، سیاسەتڤانی دیار و سەرکردە لە پارتی لیبراڵەکانی سوێد کە ئێستا بەربژێرە بۆ وەرگرتنی پۆستی سەرۆکایەتیی شارەوانیی ستۆکهۆڵمی پایتەخت، لەم هەفتەیەدا لێدوانێکی دا کە کاردانەوەی فراوانی لە سوێد لێکەوتووەتەوە. ئاڤجی لە هەڤپەیڤینێکدا لەگەڵ تەلەڤیزیۆنی فەرمیی دەوڵەتی سوێد رایگەیاند، بەهۆی کارە سیاسییەکانیەوە باجێکی گەورەی داوە و رووبەڕووی هەڕەشەی مەترسیدار بووەتەوە. بە گوتەی خۆی، نەک تەنیا هەڕەشەی کوشتن لە منداڵەکانی کراوە، بەڵکو بە خودی خۆشی گوتراوە: "خۆشت زۆرت نەماوە ماڵئاوایی لە ژیان بکەیت." گولان ئاڤجی پێشینەیەکی بەهێزی لە سیاسەتی سوێددا هەیە و بۆ چەندین ساڵ لەسەر لیستی لیبراڵەکان ئەندامی پەرلەمانی ئەو وڵاتە بووە. سەرەڕای ئەوەی پێشتر بڕیاریدابوو بە یەکجاری واز لە کاری سیاسی بهێنێت، بەڵام دوای ئەوەی (یان یۆنسن) لە سەرکردایەتیکردنی فراکسیۆنی لیبراڵەکان لە شارەوانیی ستۆکهۆڵم کشایەوە، ئاڤجی بڕیاریدا بگەڕێتەوە و شوێنەکەی پڕبکاتەوە. بڕیارە دوو هەفتەی دیکە هەڵبژاردنە سەرتاسەرییەکانی سوێد بەڕێوەبچێت. بەپێی زانیارییەکانی بەرنامەی "دیاسپۆرا"ـی تۆڕی میدیایی رووداو، بەشداریی کورد لەم هەڵبژاردنەدا بەرچاوە و زیاتر لە 200 بەربژێری کورد لە شار و شارۆچکە جیاوازەکانی سوێد کێبڕکێی بەدەستهێنانی دەنگی دەنگدەران دەکەن بۆ گەیشتن بە ئەنجوومەنی شارەوانییەکان و پەرلەمان.
دیاسپۆرا28-08-2026پەرلەمانتارێکی کورد لە ئەڵمانیا بە تۆمەتی ساختەکردنی ناسنامە رووبەڕووی دادگا دەکرێتەوە
دیاسپۆرا28-08-2026دادگەی باڵای بەریتانیا داواکاریی خێزانێکی کوردی بۆ پێدانی خانوویەکی گەورەتر رەتکردەوە
