رووداو دیجیتاڵ
لەکاتی کۆبوونەوەی لایەنگرانی حکومەت لە گۆڕەپانێکی تاران، سوپای پاسدارانی ئێران بەلەمێکی نوێی خێرای نمایش کرد. بەگوێرەی میدیاکانی ئێران، خێراییەکەی 185 کیلۆمەترە لە کاژێرێکدا و توانای هەڵگرتنی مووشەکی کروزی هەیە.
شەوی شەممە 30-05-2026، سوپای پاسدارانی ئێران لە گۆڕەپانی شۆڕشی تاران بەلەمێکی خێرای بە ناوی (27ـی رەجەب) نمایش کرد کە تایبەت بە جووڵە لە شەپۆلدا دروست کراوە.
بەگوێرەی سوپای پاسداران، خێرایی بەلەمەکە 185 کیلۆمەترە لە کاژێرێکدا و ''کاتێک بەکۆمەڵ هێرش دەکەنە سەر ئامانجێک، بەرەنگاربوونەوەیان ئەستەمە''.
وەک میدیای ئێران دەڵێ، بەلەمەکە توانای هەڵگرتن و هەڵدانی دوو مووشەکی کروزی هەیە و پێشتر بە ''سەرکەوتوویی'' تاقیکراوەتەوە.
وەک سوپای پاسداران دەڵێ، هێزی بەلەمەکە بە جۆرێکە، توانای جووڵەی لە شەپۆلەکانی دەریادا بە بەرزیی سێ مەتر دەبێ و نقوومبوونی ئەستەمە.
ژمارەیەک لە بەلەمە خێراکانی (27ـی رەجەب) بۆ پاراستنی تەنگەی هورمز و بەرەنگاربوونەوەی ئەگەریی هێزەکانی ئەمریکا خراونەتە بەردەست هێزی دەریایی سوپای پاسداران.
ئێستا تەنگەی هورمز بووەتە گۆڕەپانی ململانێیەکی کراوە. لەکاتێکدا ئەمریکا دەیەوێ بە هێزی سەربازی ئازادیی هاتووچۆی کەشتییەکان بپارێزێ، ئێران جەخت دەکاتەوە کە هورمز ناوچەی ژێر دەسەڵاتی ئەوانە و رێگە بە هیچ جووڵەیەکی بێ رەزامەندی نادەن.