رووداو دیجیتاڵ
ئەمڕۆ بەهای دینار لەکاتی داخستنی بازاڕدا بەرامبەر بە دۆلار بەرزبووەوە و 100 دۆلار بە 152 هەزار و 800 دیناری عێراقی مامەڵەی پێوەکرا.
ئەمڕۆ دووشەممە، 24.7.2023، حاجی سابیر باواجی، ئەندامی ئەنجوومەنی گۆڕینەوەی دراوی هەولێر بە تۆڕی میدیایی رووداوی راگەیاند، ئەمڕۆ لەکاتی کردنەوەدا 100 دۆلار بە 153 هەزار و 500 دینار بوو، دواتر گەیشتە 154 هەزار و 100 دینار، بەڵام لەکاتی داخستندا 100 دۆلار بە 152 هەزار و 800 دینار مامەڵەی پێوەکرا.
حاجی سابیر هۆکاری بەرزبوونەوەی بەهای دینار، بۆ بڕیاری بانکی ناوەندیی عێراق بە پێدانی دۆلار بە کۆمپانیاکانی ئاڵوگۆڕی دراوی لە جۆرەکانی A و B دەگەڕێنێتەوە و دەڵێت، ئەگەر بڕیارەکە جێبەجێبکرێت، کاریگەریی ئەرێنی لەسەر بەرزبوونەوەی دینار بەرامبەر بە دۆلار دەبێت.
ئەو ئەندامەی ئەنجوومەنی گۆڕینەوەی دراوی هەولێر گوتیشی، بە جێبەجێکردنی بڕیارەکە، بەهای دینار بەرامبەر بە دۆلار بەرزدەبێتەوە و رەنگە بە تێپەڕبوونی کات، 100 بگاتە 145 بۆ 146 هەزار دینار.
هاوکات، هەر ئەمڕۆ دووشەممە، جەبار گۆران، گوتەبێژی بازاڕی دۆلاری سلێمانی بە رووداوی گوت، لە کۆبوونەوەی سەرۆکوەزیرانی عێراق و پارێزگاری بانکی ناوەندی کە بڕیاری پشتیوانیی بازرگانە بچووکەکان کراوە، ئەگەر بچێتە بواری جێبەجێکردنەوە، کاریگەریی باشی لەسەر بەرزبوونەوەی بەهای دینار دەبێت بەرامبەر بە دۆلار.
بە گوتەی جەبار گۆران، پێنەدانی دۆلار بە بازرگانە بچووکەکان بە نرخی فەرمی بانکی ناوەندی کاریگەریی نەرێنیی هەبووە و یەکێک بووە لە هۆکارەکانی دابەزینی بەهای دینار بەرامبەر بە دۆلار.
هۆکاری ئەمدواییەی دابەزینی بەهای دینار دەگەڕێتەوە بۆ بڕیارێکی ئەمریکا کە 19ـی ئەم مانگە مامەڵەکردن بە دۆلاری لە 14 بانکی عێراقی قەدەخە کرد و بەوە تۆمەتباری کردوون دۆلاریان بۆ ئەو وڵاتانە ناردووە، کە سزای ئەمریکایان لەسەرە.
لە دوای بڕیارەکەی بانکی ناوەندیی ئەمریکاوە، فرۆشی نەختینەی دۆلار لە بانکی ناوەندیی عێراق کە کاریگەری لەسەر بەهای دینار لە نێوخۆدا هەیە، بۆ نزیکەی نیوە بەراورد بە پێش بڕیارەکە کەمیکردووە.
بانکی ناوەندیی عێراق رۆژانە 100 بە دۆلار بە 131 هەزار دینار دەفرۆشێت، بەڵام نەیتوانیوە بەهای دینار لە بازاڕەکاندا بەرامبەر بە دۆلار بەرزبکاتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ