رووداو دیجیتاڵ
بانکى رافیدەین سیستمێکى نوێى چاودێریی دارایی لە 6 لقى بانکەکە خستووەتەکار، ئەوەش وەک پابەندبوون بە پێوەرە نێودەوڵەتییەکان بۆ رێگریکردن لە سپیکردنەوەى پارە و پارەداکردنى تیرۆر.
بەگوتەى راوێژکارێکى بانکى، قۆناخى یەکەمى ئەو هەنگاوە، سێ مانگ دەبێت و بە چاودێریی دوو کۆمپانیاى بیانی بۆ بەرواردکردنى ژمارەکان دەبێت.
ئەو بانکە لە راگەیێندراوێکدا وردەکاریی کاراکردنى ئەو سیستمەى بڵاوکردەوە، کە تایبەتە بە چاودێریى جوڵەى دارایی رۆژانە و بە (AML) ناسراوە.
ئەو 6 لقەى بانکی رافیدەین کە ئەو سیستمە چاودێرییە تێیاندا کارایە لە بەسرە و بەغدان.
هیڤیدار شەعبان، راوێژکارى بانکى بە رووداوى گوت، "ئەو سیستمە بە سێ قۆناخ جێبەجێ دەکرێت. قۆناخى یەکەم لە 15ـی ئادار دەستیپێکردووە و تاوەکو 15ـی حوزەیران بەردەوام دەبێت، کۆمپانیاى ئارنست یۆنگ و کەى توو لێى بەرپرسن".
ئارنست یۆنگ و کەى توو ئەو دوو کۆمپانیایەى وردبینى دارایین کە چاودێریی جووڵەى دارایی و دراوى عێراق دەکەن.
بانکى رافیدەین ئاماژەى بەوە داوە، ئەو هەنگاوەیان لە چوارچێوەى پابەندییەکانییانە بۆ جێبەجێکردنى پێوەری نێودەوڵەتی بۆ رێگەگرتن لە سپیکردنەوەى پارە و پارەدارکردنى تیرۆر، کە یەکێکە لە پێویستییە بنەڕەتییەکانى زیادکردنى متمانە بە کەرتى بانکە عێراقییەکان لەسەر ئاستى هەرێمى و نێودەوڵەتى.
ئەو سیستمە نوێیەى چاودێرى، دەتوانێت جووڵە داراییەکان شیبکاتەوە و دیارییان بکات، بەشێوەیەک رۆڵ لە ئاشکراکردنى چالاکییە گومانلێکراوەکان دەگێڕێت و کاریگەری دەبێت لە کەمکردنەوەى مەترسییەکانى پەیوەست بە تاوانە داراییەکان.
بانکى رافیدەین کە بانکێکى فەرمى سەر بە وەزارەتى دارایی فیدراڵە، ئاماژەى بەوە داوە کە ئەو رێکارە لە دانانى سیستمى چاودێرى (AML) لەسەرجەم لقەکانى دیکەى بانکەکە دەخاتەکار.
لە 4ـی شوباتی 2025، بانکى رافیدەین 18 سیناریۆى پێشبینیکراوی بۆ سپیکردنەوەى پارە بۆ لقەکانى نارد بۆ ئەوەى ئاگادارى بن بۆ ناسینەوەى چالاکیى دراویى گومانلێکراو.
