رووداو دیجیتاڵ
دوای ئەوەی نرخی زێڕ لە کاتی داخستنی بازاڕەکان لە رۆژی سێشەممە نزیکبووەوە لە 2000 دۆلار و بۆ ماوەیەکیش لەسەرووی ئەو ئاستە مامەڵەی پێوەکرا، ئەمڕۆ چوارشەممە نرخی زێڕ بە جێگیریی مایەوە و هەر ئۆنسەیەک زێڕ بە 1997 دۆلار مامەڵەی پێوەدەکرێت.
شەوی رابردوو، بانکی ناوەندیی ئەمریکا کۆنووسی دوایین کۆبوونەوەی خۆی کە لە کۆتایی مانگی 10 بەڕێوەچوو، بڵاوکردەوە و تێیدا هیچ ئاماژەیەکی بەوە نەکردووە کە کەی کۆتایی بە بەرزکردنەوەی سوودی بانکی دەهێنێت یان بڕیار لەسەر کەمکردنەوەی سوودی بانکی دەدات. ئەوە بووە هۆکار بۆ ئەوەی بەهای دۆلار و سوودی سەر قەواڵە داراییەکانی گەنجینەی ئەمریکا بەرزببنەوە و بووە رێگر لە بەردەم بەرزبوونەوەی زیاتری نرخی زێڕ.
رۆژی سێشەممە نرخی هەر ئۆنسەیەک زێڕ توانی تاوەکو 2007 دۆلاریش بەرزبێتەوە، بەڵام لە دوای راگەیێندراوی بانکی ناوەندیی ئەمریکا لەسەر کۆبوونەوەکەی پێشوویان، بەرزبوونەوەی نرخی زێڕ وەستا.
بازرگانان چاوەڕێ بوون کە بانکی ناوەندیی ئەمریکا هەندێک ئاماژە ئاشکرا بکات لەسەر ئەوەی کە کەی دەست بە کەمکردنەوەی رێژەی سوودی بانکی دەکات، بەڵام بەپێچەوانەوە، ئەندامانی کۆمیتەی بازاڕی ئازادی بانکەکە کۆدەنگیی خۆیان راگەیاندووە کە رێژەی سوودی بانکی بۆ ماوەیەکی درێژتر لەوەی کە چاوەڕوان دەکرا لە ئاستێکی بەرزدا دەمێنێتەوە.
نرخی نەوتی برێنت بە زیاتر لە 82 دۆلار مامەڵەی پێوەدەکرێت
ئەمڕۆ چوارشەممە دوای کردنەوەی بازاڕەکانی ئاسیا، نرخی نەوتی برێنت 11 سەنت بەرزبووەوە و بە 82 دۆلار و 56 سەنت مامەڵەی پێوەکرا. نرخی نەوتی سووکی تەکساسی ئەمریکاش نزیکەی 14 سەنت بەرزبووەوە و بە 77 دۆلار و 91 سەنت مامەڵەی پێوەکرا.
نیگەرانی لە بەرزبوونەوەی قەبارەی یەدەگی نەوتی کۆگاکراو لە ئەمریکا، بووە هۆکار بۆئەوەی بەرزبوونەوەی نرخی نەوت ئەمڕۆ هێندە بەرچاو نەبێت. لە رۆژی سێشەممە نرخی نەوت بە رێژەی 2٪، بەرزبوونەوەی بەخۆیەوە بینی.
رۆژی یەکشەممەی داهاتوو بەرهەمهێنەرانی نەوتی ئەندام لە هاوپەیمانیی ئۆپێک پڵەس کۆدەبنەوە و ئەگەری کەمکردنەوەی زیاتری خستنەڕووی نەوت، وایکرد رۆژی دووشەممەی ئەم هەفتەیە نرخی نەوتی برێنت بۆ سەرووی 82 دۆلار بەرزبێتەوە.
بەڕێوەبەری ئاژانسی نێودەوڵەتیی وزە رایگەیاندووە، ئەگەر بەرهەمهێنەرانی نەوت کەمکردنەوەی خستنەڕووی نەوت درێژبکەنەوە بۆ ساڵی داهاتووش، ئەوا قەبارەی خستنەڕووی نەوت هێندە بەرزنابێتەوە کە قەرەبووی کەمکردنەوەکان بکات.
بەپێی پەیمانگەی نەوتی ئەمریکا، قەبارەی نەوتی کۆگاکراو لە ئەمریکا لە هەفتەی رابردوو 9.1 ملیۆن بەرمیل زیادیکردووە و بووەتە بەربەست بۆ ئەوەی بەرزبوونەوەی نرخی نەوت ئەمڕۆ خاوببێتەوە.
