رووداو دیجیتاڵ
پۆلیسی سڕبیا رایگەیاند، بۆمبێکی سەردەمی جەنگی دووەمی جیهانی کە کێشەکەی 470 کیلۆگرام بوو، بە سەلامەتی لە شوێنێکی بیناسازی لە نێوەڕاستی بێلگرادی پایتەخت دەرهێنرا و گوازرایەوە.
رۆژی یەکشەممە 28-12-2025 پۆلیسی سڕبیا لە راگەیێندراوێکدا ئاشکرای کرد، "بۆمبەکە لە جۆری (AN-M44)ـی دروستکراوی ئەمریکایە؛ لە ساڵی 1944 لەلایەن هێزە هاوپەیمانەکانەوە لەکاتی رزگارکردنی بێلگراد لەژێر دەستی نازییەکان، دژی پێگە ئەڵمانییەکان بەکارهێنراوە."
بەر لە دەرهێنانی بۆمبەکە، شوێنەکە کە دەکەوێتە نزیک ناوچەیەکی نیشتەجێبوون و ناوەندێکی بازرگانی، پشکنینی وردی بۆ کرا بۆ دڵنیابوونەوە لە "سەلامەتیی دۆخەکە." هەروەها داوا لە دانیشتووانی ناوچەکە کرا ئۆتۆمبێلەکانیان دووربخەنەوە و ماڵەکانیان چۆڵ بکەن.
پۆلیس ئاماژەی بەوە کرد، بۆمبەکە بۆ گۆڕەپانێکی راهێنانی سەربازی گوازرایەوە کە 180 کیلۆمەتر لە بێلگرادەوە دوورە و بڕیارە لە رۆژانی داهاتوودا لەوێ بتەقێنرێتەوە.
لە رابردوودا چەندین بۆمبی نەتەقیوی سەردەمی جەنگەکان لە سڕبیا دۆزراونەتەوە و بە سەلامەتی پووچەڵکراونەتەوە.
لە ئەیلوولی 2024، گوللـە تۆپێکی 100 ساڵە بە کێشی نزیکەی 300 کیلۆگرام لە نزیک پەرلەمانی سڕبیا لە بێلگراد دۆزرایەوە و لابرا. هەروەها لە نیسانی هەمان ساڵدا، بۆمبێکی گەورەی پاشماوەی بۆردوومانی ساڵی 1999ـی ناتۆ لە شاری نیش لە باشووری ئەو وڵاتە دۆزرایەوە.
