جیهان
![ئارسێ سەرکۆنەی "کۆبوونەوەی نائاسایی سەرباز و تانک"ـی لە دەرەوەی باڵاخانە حکومییەکان لە لاپازـی پایتەختی وڵاتەکە کرد. ئارسێ سەرکۆنەی "کۆبوونەوەی نائاسایی سەرباز و تانک"ـی لە دەرەوەی باڵاخانە حکومییەکان لە لاپازـی پایتەختی وڵاتەکە کرد.](https://www.rudaw.net/s3/rudaw.net/ContentFiles/807574Image1.jpg?mode=crop&quality=70&rand=1&scale=both&w=752&h=472&version=6715011)
ئارسێ سەرکۆنەی "کۆبوونەوەی نائاسایی سەرباز و تانک"ـی لە دەرەوەی باڵاخانە حکومییەکان لە لاپازـی پایتەختی وڵاتەکە کرد.
رووداو دییجتاڵ
دوای ئەوەی سەرۆکی بۆلیڤیا رایگەیاند، سوپا بە "شێوەیەکی نائاسایی" جووڵەی پێکراوە و خەریکە کودەتای سەربازی روودەدات. پاش چەند کاژێرێک "هەوڵی کودەتاکە شکستی هێنا و سوپا لە نزیک باڵەخانە حکومییەکان کشانەوە."
رۆژی چوارشەممە، 26-06-2024 لویز ئەلبەرتۆ ئارسێ، سەرۆکی بۆلیڤیا رایگەیاند، "بەشێوەیەکی نائاسایی جووڵە بە سوپا کراوە، مەترسیی کودەتای سەربازی هەیە، داوا دەکەم رێز لە دیموکراسییەت بگیرێت."
ئارسێ سەرکۆنەی "کۆبوونەوەی نائاسایی سەرباز و تانک"ـی لە دەرەوەی باڵاخانە حکومییەکان لە لاپازـی پایتەختی وڵاتەکە کرد.
پاش چەند کاژێرێک ئەو هێزە سەربازییانەی لەو شوێنانە جێگرکرابوون، کشانەوە و دۆخەکە ئاسایی بووەوە.
وەک لە وێنەیەکدا دەردەکەوێت، سەرۆکی بۆلیڤیا لەگەڵ جەنەراڵێک کە وەکو "سەرکردەی کودەتاچییەکان" بە ناوی " "خوان جۆسێ زونیکا" دەردەکەوێت، لەنێو کۆشکەکەیدا رووبەڕوو قسەدەکات و پێی دەڵێت: "جەنەراڵ من کاپتنی تۆم، فەرمانت پێدەکەم هەر ئێستا هێزەکانت بکشێنیتەوە."
![سەرۆکی بۆلیڤیا لەگەڵ سەربازانی وڵاتەکەی قسە دەکات](https://www.rudaw.net/Library/Images/Uploaded%20Images/2024/06/27/449275541_833807755613208_2691113007362717007_n.jpg)
هەرچەندە جەنەراڵ "خوان جۆسێ زونیکا" بەر لە چوونە نێو کۆشکی سەرۆکی وڵاتەکەی رایگەیاندبوو، "بەمزوانە حکومەتێکی نوێ لە وڵاتەکەی پێکدەهێنرێت."
بەر شکستهێنانی کودەتاکە ئیڤۆ مۆرالێس، جێگری سەرۆکی بۆلیڤیا و سەرۆکی پێشووی وڵاتەکە رایگەیاندبوو: "خەریکە کودەتایەکی سەربازی روودەدات. داوا لە هاونیشتمانییان دەکەم بەرگری لە وڵات بکەن."
لە چەند وێنە و ڤیدیۆیەکدا دەردەکەوێت، سەربازی زۆر بە چەک و تانکەوە دەوری گۆڕەپانی پلازا مۆریلۆی نێوجەرگەی پایتەختیان داوە. لە چەند وێنەیەکی دیکەش چەند سەربازێک دەیانەوێت بچنە نێو کۆشکی سەرۆکایەتیی وڵاتەکە.
لە پەیامێکی ڤیدیۆییدا، سێلیندا سۆسا لوندا، وەزیری دەرەوەی بۆلیڤیا رایگەیاند: "لەبەردەم کۆمەڵگەی نێودەوڵەتی، بۆلیڤیا سەرکۆنەی جووڵاندنی نائاسایی سوپا دەکات، کە هەڕەشە لە دیموکراسییەت، ئاشتی و ئاسایشی وڵات دەکات. داوا لە کۆمەڵگەی نێودەوڵەتی و خەڵکی بۆلیڤیا دەکەین رێز لە بەها دیموکراسییەکان بگرن و پاڵپشتیی حکومەت بکەن."
چەند وڵاتێکی ئەمریکای لاتین و هاوسنووری بۆلیڤیا هەر زوو پشتگیریی خۆیان بۆ سەرۆکی بۆلیڤیا دەربڕی.
نیکۆلاس مادورۆ، سەرۆکی ڤەنزوێلا لە پەیامێکی تەلەڤیزیۆنیدا گوتی "لە ڤەنزوێلاوە ئەو هەوڵەی کودەتایە رەتدەکەینەوە و باری لەناکاو رادەگەیێنین. پشتگیریی لە خەڵک و سەرۆکی بۆلیڤیا دەکەین."
وڵاتی بۆلیڤیا دەکەوێتە نێوەڕاستی ئەمریکای لاتین، 12 ملیۆن و 186 هەزار کەسی لێدەژی. وڵاتەکە لەگەڵ هەریەک لە بەرازیل، پاراگوای، ئەرجەنتین، چیلی و پێرو هاوسنوورە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ