رووداو - هەولێر
"ئینسایكلۆپیدیای نووسەرانی هەولێر" لە ئامادەكردنی عەبدولڕەحمان مەعرووفە و زانیاری و بایۆگرافیای نووسەرانی هەولێر و لەخۆدەگرێت.
عەبدولڕەحمان مەعرووف لەوبارەوە بە (ئەدەب و كولتوور)ی راگەیاند "پرۆژەی ئینسایكلۆپیدیا لەلای میللەتانی دنیا لە تەواوی بوارەكانی ژیان و مەعریفە و زانیاری كاری لەسەر كراوە، ئێستا بووەتە پێویستییەكی سەردەم و وەك بەشێك لە كولتووری گەلان بە هەند وەردەگیرێ".
گوتیشی :"شانم داوەتە بن ئەم پرۆژەیە و وەك هەنگاوی یەكەمیش لە (ئینسایكلۆپیدیای نووسەرانی هەولێر و دانیشتووی هەولێر)ـەوە دەستمپێكرد، ئەگەر تەمەن بە بەریەوە بمێنێ هی سەرجەم شارەكانی دیكە و هەموو كوردستانیشم لە پلان و بەرنامەدایە".
مەعرووف نزیكەی 10 ساڵ كاری لەسەر ئەو پرۆژەیە كردووە و كاتی خۆی بەشێكی لەسەر داوای لیژنەی باڵای (ئینسایكلۆپیدیای هەولێر) ئامادە كرد و چاپكرا.
پرۆژەی ئینسایكلۆپیدیاكە پێكهاتووە لە نووسەرانی هەولێر و دانیشتووی هەولێر كە كتێب و چاپكراویان هەیە.
ئینسایكلۆپیدیاكە 2000 لاپەڕەیە و لە چوار بەرگ پێكدێت، بڕیارە لەم نزیكانە چاپ و بڵاوبكرێتەوە. ئامادەكاری ئینسایكلۆپیدیاكە داوا لە نووسەرانی هەولێر و دانیشتووی هەولێر دەكات، ئەوانەی دەیانەوێت لە پرۆژەكەدا بەشداربن، لەرێگەی ئیمەیلی abdulrahman.m.rasul@gmail.com پەیوەندی پێوە بكەن.
