مامەڵەكردنی میدیا لە بارودۆخی شەڕو ئاڵۆزیی ناوخۆییدا، بە بەراورد لەگەڵ هەر دۆخێكی دیكەی ئاساییدا جیاوازە و پێویستی بە هەستیارییەكی زۆر هەیە. جاری وا هەیە بێ ئەوەی رۆژنامەنووس، یان دەزگای میدیایی پێی بزانێ، هەواڵ یان راپۆرتێكی رۆژنامەڤانی، نەك تەنها خزمەتی گوتاری میدیایی و بەرژەوەندیی نیشتمانی ناكات، بەڵكو دەكەوێتە خانەی خزمەتكردن بە دوژمنانی وڵاتەكە. رەنگە ئەم جۆرە مامەڵەیە وایكردبێ كە وەزارەتی ناوخۆی عێراق لەسەر داواكاری دەستەی راگەیاندن و پەیوەندییەكانی ئەو وڵاتە، دەرگای كاركردن و رووماڵی میدیایی بە رووی دوازدە كەناڵی ئاسمانیی عێراقی و غەیرە عێراقی لە بەغدا و تەواوی پارێزگاكانی دیكە دابخات، ئەمەش بە بیانووی بڵاوكردنەوەی تۆوی فیتنەگێڕی و پشتیوانیكردن لە تیرۆر. ئەو بڕیارە رەوابێ یان ناڕەوا، بێ هۆكار نییە. هەموو لایەك دەزانن كەش و هەوای میدیایی لە عێراق لەوپەڕی پاشاگەردانی و شێواویدایە. نابێ میدیا ئەوەی بیر بچێ، ئەو بۆ ئەوانە كار دەكات كە بە خزمەتگوزاریەكانییەوە گرێدراون، بۆیە ئەوەی زۆر گرنگە بەدەستهێنان و دەستپێوەگرتنی متمانەی جەماوەرەكەیەتی. دامەزراوەیەكی وەك ئەلجەزیرە، (ناوی لەنێو لیستی ئەو كەناڵانەدایە كە عێراق بە پاڵپشتی تیرۆر تۆمەتباریان دەكات)، ئەگەرچی زۆر شتی لە دونیای میدیای عەرەبیدا گۆڕی و كاریگەریەكەشی لەسەر شانۆی سیاسی وڵاتانی ناوچەكە رەنگیدایەوە، لێ بەهۆی لاگیریی بۆ هەندێك پرس و رووداو و زاڵبوونی ئەجێندای سیاسیی پشت ئەو دامەزراوەیە، هێدی هێدی كێرڤی متمانەی جەماوەری لە دابەزینە، تا ئەو ئاستەی بەهۆی ئەو پاشەكشێیە، قەتەر كە پاڵپشتی دارایی دەكات، ئێستا كار بۆ كردنەوەی تۆڕی تەلەڤزیۆنی ئەلعەرەبی دەكات، بۆ ئەوەی جەماوەری تۆراو، لە گەڵ میدیای وڵاتەكەی ئاشت بكاتەوە. كاتێك میدیا متمانەی جەماوەری دۆڕاند، وەك ئەوە وایە هەموو شتێكی دۆڕاندبێ. بیرمدێتەوە لە هەشتاكانی سەدەی رابردوودا كە ئەوكات منداڵ بووم، خەڵكێكی زۆر بیسەری هەردوو رادیۆی نێودەوڵەتی لەندەن"BBC" و مۆنتیكارلۆ بوون، ئەوانەی هیچ شتێكیان لە بارەی میدیا نەدەزانی، دەیانگوت رادیۆی لەندەن راستی دەڵێ و جێی باوەڕە، بەڵام رادیۆی مۆنتیكارلۆ درۆی زۆر دەكاو جێی متمانە نییە. زۆر لەمێژە میدیای میسری بەهۆی سیاسیبوون و زاڵبوونی گوتاری توندی ناسیۆنالیستیی عەرەبی، متمانەی لە دەستداوە. هەنووكە ئەگەرچی ئەو وڵاتە بە قۆناخێكی نوێی سیاسیدا تێدەپەڕێ، لێ میدیاكەی بەو هەموو فراوانی و هەمەڕەنگییەوە، توانای ئەوەی نییە ئەو متمانەیە بەدەستبهێنێتەوە. راستگۆیی، یان رێزگرتن لە هەست و نەستی جەماوەر و پاراستنی بەرژەوەندیی هاونیشتمانیان، تاكە گەرەنتی مانەوەی ئەو متمانەیەیە كە لە نێوان كەناڵێكی میدیایی و جەماوەرەكەیدا هەیە. لە دۆخی هەنووكەیشدا، هیچ شتێك بەقەد رازیكردنی جەماوەر، بەتایبەت لە رێگەی پارێزگاریكردن لە سەقامگیریی دەروونی و رۆحی مەعنەویی هاونیشتمانیان گرنگ نییە. زۆر دەمێكە گوتراوە، راگەیاندن پرۆسەیەكی دووسەرە، ئەگەر بە وریایی و لێزانییەوە مامەڵەی پیشەییانە لەگەڵ رووداوەكان نەكات، بە دڵنیاییەوە لە پەنای گوتاری میدیاوە ئەجێندای دیكە سەردەردێنێ، بەمەش لەسەر ئاستی سیاسی و كۆمەڵایەتی دەرهاوێشتەی نەرێنی لەگەڵ خۆی دێنێ. ئەركی میدیا سیاسەتكردن نییە٬ لێ كەم نین ئەو كەناڵانەی لە جیاتی كاركردن لەسەر فاكت و زانیارییەكان، نەك هەر سیاسەت دەكەن، بەڵكو شەڕی سیاسیش دەكەن. ئەمە جیا لەوەی زۆر جار میدیا لە دەرەوەی بنەما و پرەنسیپەكانی كاری رۆژنامەڤانی، بەشداردەبێ لە بەرهەمهێنانی رق و توندوتیژی. لە نێو میدیای كوردیشدا زۆرن ئەو كەناڵانەی خۆیان بە پیشەیی و پڕۆفیشناڵ وێنادەكەن، بەڵام كەمترین ترسیان لە گوتنی ناڕاستی و بڵاوكردنەوەی زانیاریی ناتەواو نییە، یاخود تەنها یەك دیو دەبینن و كێموكاسییەكانی دیوەكەی دیكە فەرامۆش دەكەن. ئایا پیشەییبوون و بێلایەنی ئەوەیە، تۆ بچووكترین هەڵە و كەموكورتی بەرەیەك وەك رووداو و كارەساتی گەورە لێكبدەیتەوە، بەڵام لە ئاست نەنگی و خەوشەكانی بەرەی بەرامبەر كەمترین قسەو پرسیارت نەبێ؟ ئەوانەی بەو لۆژیكە كاردەكەن باش دەزانن ئەو شێوە مامەڵەیەیان تا سەر ئێسقان ناكۆكە بە بنەماكانی كاری رۆژنامەڤانی، لێ بەهۆی ئەوەی تەواو لاگیر و گرێدراوی ئەجێندایەكی دیاریكراوی سیاسین، ناتوانن راستگۆ و بێلایەن بن، بەمەش تەواوی متمانەی جەماوەرەكەیان لەدەستدەدەن.
کوردستان21-06-2026رێبەر ئەحمەد بۆ رووداو: گەرەنتیی ئەمنی دراوەتە کۆمپانیا نەوتییەکانی هەرێمی کوردستانسۆلین حەمەدەمین
.jpg&w=3840&q=75)
