رووداو دیجیتاڵ
سەرۆکی ئیی پارتی لەبارەی دەم پارتییەوە رایگەیاند، "ئەم بەناو پارتە سیاسییە، بە بۆچوونی ئێمە رەوایی سیاسیی نییە."
پاشنیوەڕۆی ئەمڕۆ چوارشەممە، مەرال ئاکشەنەر، سەرۆکی ئیی پارتی، لە کۆبوونەوەی فراکسیۆنی پارتەکەی کە چوارشەممەی هەموو هەفتەیەک ئەنجام دەدرێت، گوتارێکی پێشکێشکرد و هەڵسەنگاندنی بۆ دوایین پێشهاتە سیاسییە نێوخۆیی و دەرەکییەکان کرد.
لە بەشێکی گوتارەکەیدا، مەرال ئاکشەنەر، هێرشی تووندی کردە سەر پارتی یەکسانی و دیموکراسی گەلان (دەم پارتی) و رایگەیاند، "ئەم بەناو پارتە سیاسییە کە بەردەوام ناوی دەگۆڕێت و هۆگری سەردەستەی تیرۆریستانن، بە بۆچوونی ئێمە رەوایی سیاسیی نییە. هەر ئەمانە، گەلی کورد وەک قەڵخان بۆ پاکانەکردنی تیرۆریستان بەکاردەهێنن. نابێ ئەمانە لەناو پەرلەماندا شوێنیان هەبێت."
راشیگەیاند، ئەوان دەڵێن، "ئۆجەلان بەهایەکی گەورەیە بۆ کورد - ئەم قسەیە ناپاکییە و فەرمان بۆ ناپاکەکانی دیکە هاتووە لەناو پەرلەماندا بوێری بکەن و بیدرکێنن. بە لای ئێمەوە، بکوژی رۆڵەی ئەم نیشتمانە هیچ بەهایەکی لەلایەن گەلی کوردەوە نییە. هەروەها ئەم بەناو پارتە سیاسییە، کە ماشەی دەستی دووە، خۆیان بە شت دەزانن و سەری زمان و بنی زمانیان پێکهێنانی هاوپەیمانییە، ئەمە لە کاتێکدایە خۆیان سەرچاوەی دووبەرەکین".
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ