رووداو دیجیتاڵ
سەرۆککۆماری تورکیا دەڵێت، بە درێژایی هاوین، ئۆپەراسیۆنی سەربازی بۆ سەر پێگەکانی پارتی کرێکارانی کوردستان (پەکەکە) و هێزەکانی سووریای دیموکرات (هەسەدە) دەکەن. دەشڵێت، لە ساڵێکدا هەزار و 473 شەڕڤان و هەزار و 52 گەریلا لە ئەنجامی ئۆپەراسیۆنە سەربازییەکانی سوپای وڵاتەکەی گیانیان لەدەستداوە.
ناوەندی چاپەمەنی و راگەیاندنی هێزەکانی پاراستنی گەل - هەپەگەش دەڵێت، لە ساڵی 2023دا 928 سەربازی سوپای تورکیایان لە هەرێمی کوردستان کوشتووە.
رۆژی سێشەممە 25ـی حوزەیرانی 2024، رەجەب تەیب ئەردۆغان، سەرۆککۆماری تورکیا، لە ئەنقەرە بەشداری لە رێوڕەسمی ئاهەنگی دەرچوونی دوو هەزار و 366 پۆلیس لە ئەکادیمیای پۆلیسی گۆلباشی کرد و گوتارێکی پێشکێش کرد.
سەرۆککۆماری تورکیا باسی شەڕی نێوان سوپای وڵاتەکەی و گەریلاکانی پارتی کرێکارانی کوردستان (پەکەکە) کرد و گوتی، 40 ساڵ بەسەر ئەو شەڕەدا تێدەپەڕێت و "لە رووی مادی و مەعنەوییەوە باجی زۆر قورسمان داوە، بەڵام لەم چەند ساڵەی رابردوودا دەستکەوتی مێژووییمان تۆمارکردووە".
ئەردۆغان گوتی، بە هەوڵی سوپا، جەندرمە، پۆلیس، ئاسایش، گوندپارێز و دەزگا هەواڵگرییەکانیان، نەیانهێشتووە گەریلاکانی پەکەکە جووڵەیان هەبێت. ئاماژەی بەوەشکرد، لە شەڕیاندا دژی گەریلاکان پشتیان بە درۆن، چەک و تەکنۆلۆژیای سەربازیی خۆماڵی بەستووە.
سەرۆککۆماری تورکیا گوتی، "لە ساڵێکدا لە نێوخۆی تورکیا 34 هەزار و 765 ئۆپەراسیۆن دژی پەکەکە/کەجەکە کراون و دابەشبوونەکەش بەو جۆرە بووە کە چوار هەزار و 877 ئۆپەراسیۆنیان لەنێو شار بوون و 29 هەزار و 907 ئۆپەراسیۆنیشیان لە ناوچە دوورەدەستەکان بوون. لەو ئۆپەراسیۆنانەدا هەزار و 45 گەریلا کراونەتە ئامانج".
ئەردۆغان هەروەها گوتی، "سەردەمانێک هەزاران کەس لە ساڵێکدا پەیوەندییان بە پەکەکە/کەجەکەوە دەکرد، بەڵام ئێستا 10 کەس تێناپەڕن".
سەرۆککۆماری تورکیا باسی لە ئەنجامدانی ئۆپەراسیۆنەکانی سوپای وڵاتەکەی لە باشووری کوردستان و رۆژئاوای کوردستانیش کرد و گوتی، لە ئەنجامی ئۆپەراسیۆنەکانیان دوو هەزار و 528 گەریلا و شەڕڤان کوژراون کە هەزار و 473 کەسیان شەڕڤان بوون لە سووریا (رۆژئاوای کوردستان) و هەزار و 52 کەسیشیان گەریلا بوون لە باکووری عێراق (باشووری کوردستان).
ئەردۆغان رایگەیاند، ئۆپەراسیۆنەکانیان بە درێژایی هاوین بۆ سەر گەریلاکانی پەکەکە و شەڕڤانان لە سووریا (رۆژئاوای کوردستان) بەردەوام دەبن.
رۆژی 30-12-2023 ناوەندی چاپەمەنی و راگەیاندنی هێزەکانی پاراستنی گەل-هەپەگە ئاماری ساڵی 2023ی شەڕوپێکدادانەکانی گەریلاکانی پەکەکەی لەگەڵ هێزەکانی سوپای تورکیا لە خاکی هەرێمی کوردستان بڵاوکردەوە و رایگەیاند، لەو ساڵەدا 928 سەربازیان کوشتووە و 179 گەریلاش گیانیان لەدەستداوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ