رووداو دیجیتاڵ
دەولەت باخچەلی، سەرۆکی پارتی بزووتنەوەی نەتەوەیی (مەهەپە) لەکاتی پێشکێشکردنی گوتاری کۆبوونەوەی پارتەکەیدا تەندروستیی تێکچوو.
میدیای تورکیا بڵاویکردووەتەوە، دەولەت باخچەلی بەر لە کۆبوونەوەی فراکسیۆنی پارتەکەی کە رۆژی سێشەممە 25-6-2024 لە پەرلەمانی تورکیا بەڕێوەچوو، کێشەی گوشاری خوێنی هەبووە.
باخچەلی کە پێشتر بە وەستانەوە گوتارەکەی پێشکێشدەکرد، ئەمجارە بە دانیشتنەوە گوتارەکەی پێشکێشکرد. لە گوتارەکەیدا نەیتوانی پرۆمتەر (شاشەی تێکستی گوتار) بەکاربهێنێت و گوتارەکەی لەسەر کاغەز خوێندەوە.
لە کۆتایی گوتارەکەیدا تا رادەیەک بە زەحمەت توانی هەڵسێتە سەر پێ. بە هاوکاریی بەشێک لە یاوەرانی، باخچەلی برایە دەرەوە و پشێوی لە هۆڵی کۆبوونەوەی مەهەپە دروستبوو.
باخچەلی لە گوتارەکەیدا باسی لە چەند تەوەرێک کرد کە یەکێکیان ئێکسەکەی فەرهاد ئەنجو، پەرلەمانتاری پێشووی هەدەپە بوو، گوتی: "بڵاوکردنەوەی (بژی پۆرتوگال) بێ ئابڕووییە. سووکایەتیی دڵی ئەوانی داگیرکردووە. ئەگەر ئەو خائینە مووچەی خانەنشینیی پەرلەمان وەردەگرێت، پێویستە لێی ببڕن و وڵاتینامەشی لێ بسەننەوە".
دەولەت باخچەلی
ساڵی 1948 لە پارێزگای عوسمانییە لەدایکبووە.
لە خانەوادەیەکی تورکمانە. بەشی بازرگانی و ئابووریی لە زانکۆی ئەنقەرە تەواوکردووە. لە کاتی زانکۆ پەیوەندی بە رێکخستنەکانی نەتەوەیی دەکات. لە شەش خولی پەرلەماندا پەرلەمانتار بووە، لە 57مین کابینەی حکومەتی تورکیادا وەزیری دەوڵەت و یاریدەدەری سەرۆکوەزیران بووە.
ساڵی 1997 بووەتە سەرۆکی مەهەپە، لە کۆنگرەکانی 2000،2003، 2006، 2009، 2012، 2015، 2018 و 2021 بە سەرۆکی مەهەپە هەڵبژێردراوەتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ