رووداو دیجیتاڵ
یاریدەدەری سەرۆکی پارتی بزووتنەوەی نەتەوەیی (مەهەپە) ئاشکرای دەکات لەگەڵ ئاکپارتی لەسەر پرسی هەڵبژاردنی شارەوانییەکان کە بڕیارە رۆژی 31ـی ئاداری 2024 ئەنجام بدرێت، رێککەوتوون.
فەتحی یڵدز، یاریدەدەری سەرۆکی مەهەپە لە راگەیێندراوێکدا ئاشکرایکرد، پرسی هاوپەیمانیکردن بۆ هەڵبژاردنی شارەوانییەکان لە سەرانسەری تورکیادا لەنێوان مەهەپە و ئاکپارتی لە رۆژی 26ـی تشرینی یەکەمەوە بەردەوامە و رۆژی 22ـی کانوونی یەکەم، 13یەمین کۆبوونەوەش ئەنجامدرا.
فەتحی یڵدز روونیکردەوە، لە ئەنجامی ئەم 13 کۆبوونەوەیەدا هەردوولایەن رێککەوتن لەسەر بەربژێرانی سەرۆکایەتیی گەورەشارەوانییەکانی تورکیا کە ژمارەیان 30 گەورەشارەوانییە. بەگوێرەی رێککەوتنەکە، مەهەپە هیچ بەربژێرێکی لە 28 گەورەشارەوانیی نابێت و دەنگ بە بەربژێرەکانی ئاکپارتی دەدات، لە بەرامبەردا ئاکپارتی پاڵپشتی تەواو بۆ هەردوو گەورەشارەوانیی مەرسین و مانیسا بۆ مەهەپە دەکات و بەربژێری نابێت و دەنگ بە بەربژێرانی مەهەپە دەدات.
لەبارەی سەرۆکایەتیی 51 شارەوانییەکەی دیکەی باکووری کوردستان و تورکیا، لە 29 شاردا ئاکپارتی و مەهەپە هاوئاهەنگی لەنێوان خۆیاندا دەکەن، بەڵام لە 22 شاردا بە جیا بەربژێریان دەبێت و هەرلایەنێک بۆ خۆی هەوڵی کۆکردنەوەی دەنگ دەدات بۆ سەرخستنی بەربژێرەکانیان.
یاریدەدەری سەرۆکی مەهەپە ئەوەشی خستەڕوو، کۆبوونەوەکانیان لەبارەی سەرۆکایەتیی شارەوانیی شارۆچکەکانیش بەردەوام دەبێت.
لە تورکیا و باکووری کوردستاندا 30 گەورە شارەوانی، 51 شارەوانیی شارەکان و زیاتر لە 1000 شارەوانی شارۆچکەکان هەن؛ 20 هەزار و 745 ئەندامی ئەنجوومەنی شارەوانییەکان و هەزار و 272 ئەنجوومەنی گشتیی شارەکان هەن؛ هەروەها 50 هەزار و 229 موختار هەڵدەبژێردرێن.
لە هەڵبژاردنی شارەوانییەکانی ساڵی 2019دا ئاکپارتی 15 گەورەشارەوانی، جەهەپە 11 گەورەشارەوانی، هەدەپە 3 گەورەشارەوانی و مەهەپە 1 گەورەشارەوانییان بەدەستهێنا.
هەدەپە لە باکووری کوردستاندا 3 گەورەشارەوانی، 5 شارەوانی شار، 40 شارەوانیی شارۆچکەی بەدەستهێنا، بەڵام ئێستا تەنیا پێنج شارەوانی لەدەستدا ماوەتەوە و ئەوانی دیکە قەییومیان بۆ دانرا.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ