رووداو دیجیتاڵ
ناردنی کەشتیی ئاسمانی Ax-3 بۆ بۆشایی ئاسمان کە کەشتیوانانی ئاسمانیی تورکیا، ئیسپانیا، ئیتاڵیا و سوێدی لەخۆدەگرت، بۆ 18ـی مانگ بە کاتی ئەمریکا دواخرا.
کۆمپانیای SpaceX لە هەژماری تایبەتیی خۆی لە تۆڕی کۆمەڵایەتیی ئێکس بڵاویکردەوە، ناردنی کەشتییە ئاسمانییەکەیان بۆ بۆشایی ئاسمان، ئەمڕۆ (17-1-2024) ناکرێت و دەخرێتە کاژێر 00:49 خولەکی بەرەبەیانیی رۆژی 19ـی مانگ.
لە پەیامەکەدا هاتووە، ناردنی کەشتی بۆشایی ئاسمانیی Ax-3 بۆ رۆژی پێنجشەممە (بەکاتی ئەمریکا) دواخراوە و لەم ماوەیەدا ستافەکە تاقیکردنەوەی کۆتایی دەکەن و جارێکی دیکە بە داتاکاندا دەچنەوە.
بەرپرسانی ناساش لەمبارەیەوە لە کۆنگرەیەکی رۆژنامەڤانیدا کە لە وێستگەی بۆشایی ئاسمانی کێنێدی سازیان کرد، دواخستنی گەشتە ئاسمانییەکەیان راگەیاند.
کەشتیوانی تورکیا، ئاڵپەر گەزەرئاڤجی وەک یەکەم کەشتیوانی ئەم وڵاتە، لەگەڵ ستافە ئیسپانی، ئیتاڵی و سوێدییەکە دەچنە بۆشایی ئاسمان.