رووداو دیجیتاڵ
کەمێک دوای کردنەوەی بازاڕە داراییەکانی تورکیا، لیرە داتەپینێکی نوێی بەرامبەر دۆلاری ئەمریکی تۆمارکرد و یەک دۆلار بە 32.02 لیرە مامەڵەی پێوەکرا.
بەیانی ئەمڕۆ (دووشەممە 11ـی ئاداری 2024) لەگەڵ کردنەوەی بۆرسە و بازاڕە داراییەکانی تورکیا، یەک دۆلاری ئەمریکی بە 31.98 لیرە مامەڵەی پێوەکرا؛ دواتر بۆ 32.02 لیرە بەرزبووەوە. هاوکات یەک یۆرۆ بە 35.49 لیرە و یەک پاوەندی ئیستەرلینی بە 40.96 لیرە مامەڵەیان پێوە دەکرێت.
رۆژی 4ـی ئاداری 2024، دەستەی ئاماری تورکیا هەڵاوسانی ساڵانەی راگەیاند و گوتی، بۆ 67.07٪ بەرزبووەتەوە. گرووپی لێکۆڵینەوەی هەڵاوسان (ENAG) دەڵێت "هەڵاوسانی ساڵانە لەو مانگەدا 121.98٪ بووە."
دوای بڵاوکردنەوەی ئامارەکان، دۆخی بازاڕی ئابووری ناسەقامگیر بوو. لەو رۆژەوە کاردانەوە و کاریگەرییەکانی راگەیاندنی ئاماری هەڵاوسان لەسەر لیرەی تورکی بەردەوامن.
نزیکەی هەشت مانگە بەهای لیرەی تورکی بەرامبەر دۆلار و دراوە بییانییەکانی دیکە بەهۆی بەرزبوونەوەی قۆناخ بە قۆناخی هەڵاوسانی ئابووریی وڵات و جێگیرکردنی سوودی بانکییەوە، لە دابەزیندایە. لیرەی تورکی لە هەشت مانگی رابردوودا نزیکەی 11.3٪ـی بەهای خۆی لەدەستداوە.
بەرلە هەڵبژاردنی پەرلەمان و سەرۆکایەتیی تورکیا لە 14ـی ئایار، یەک دۆلار بە 19.60 لیرە مامەڵەی پێوە دەکرا؛ لە دووەم گەڕی هەڵبژاردنی سەرۆکایەتیی تورکیا کە لە 28ـی ئایار کرا، بۆ یەکەمینجار بەهای یەک دۆلار 20 لیرەی تێپەڕاند و دوای هەڵبژاردنەکان بۆ یەکەمجار لە 26ـی حوزەیراندا بەهای یەک دۆلار گەیشتە 26 لیرە.
بانکی ناوەندیی تورکیا رۆژی 25ـی کانوونی دووەمی 2024 رێژەی سوودی بانکی لە 42.5٪ بۆ 45٪ بەرزکردەوە، بەڵام لە رۆژی 22ـی شوبات رێژەکەی لە 45٪ بە جێگیری هێشتەوە.
ئەوە لە کاتێکدایە بانکی ناوەندیی تورکیا ساڵی 2022 چوار جار لەسەر یەک سوودی بانکی کەمکردەوە و لە کۆبوونەوەی شوباتی 2023ـشدا سوودی بانکی لە 9٪ بۆ 8.5٪ کەمکردەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ