رووداو دیجیتاڵ
تورکیا لە چوار مانگی رابردوودا بە بەهای دوو ملیار و 238 ملیۆن دۆلار چەک و تەکنەلۆژیای سەربازی فرۆشتووە.
هالوک گۆرگون، سەرۆکی دامەزراوەی پیشەسازیی بەرگریی تورکیا لە هەژماری خۆی لە تۆڕی کۆمەڵایەتیی ئێکس بڵاویکردەوە، هەناردەی چەک و تەکنەلۆژیای سەربازییان لە چوار مانگی رابردوودا بەراورد بە هەمان ماوەی پار، بە رێژەی 67٪ زیادیکردووە و گەیشتووەتە دوو ملیار و 238 ملیۆن دۆلار.
بە گوتەی سەرۆکی پیشەسازیی بەرگریی تورکیا، لە ئابی پاریشەوە بە بەهای حەوت ملیار و 635 ملیۆن دۆلار چەک و تەکنەلۆژیای سەربازی فرۆشراوە.
هالوک گۆرگون باسی لەوەش کرد، درۆن، مووشەک و زرێپۆش لە ریزبەندی یەکەمی ئەو چەک و تەکنۆلۆژیا سەربازییە دروستکراوانەی تورکیان کە فرۆشراون و هەناردەی وڵاتان کراون.
سەرۆکی دامەزراوەکە ئاماژەی بەوەش کرد، تورکیا پار بە بەهای حەوت ملیار و 154 ملیۆن دۆلار چەک، تەقەمەنی و کەرەستەی سەربازیی فرۆشتووە و هەناردە کردووە.
