رووداو دیجیتاڵ
ناوەندی بەرەنگاربوونەوەی زانیاریی نادروست کە سەر بە فەرمانگەی پەیوەندییەکانی سەرۆکایەتیی کۆماری تورکیایە، رەتیدەکاتەوە هاونیشتمانییەکەی خەڵکی هەرێمی کوردستان بەهۆی قسەکردن بە زمانی کوردی کوژرابێت و دەڵێت، ئامانج لەو بانگەشانە، هاندانی خەڵکە بۆ رق و دوژمنایەتی.
ناوەندەکە راگەیێندراوێکی بڵاوکردووەتەوە و تێیدا هاتووە، ئەو تۆمەتانەی باس لەوە دەکەن گوایە ئەو هاونیشتمانییەی خەڵکی هەرێمی کوردستان بەهۆی ئەوەی "بە کوردی قسەی کردووە، کوژراوە، راست نین و شەڕەکە بە هۆکارێکی دیکە سەریهەڵداوە."
بەگوێرەی راگەیێندراوەکە، "لە ئەنجامی لێکۆڵینەوەکان، دەرکەوتووە، ئەو سێ گەشتیارە لە ناوچەی فاتح لە شوێنێكی مەیخواردنەوە دانیشتوون و لەگەڵ دوو برا کە خەڵکی باتمان (ـی باکووری کوردستانن) لەسەر سەیرکردنی ژنان بە لاچاو بووەتە شەڕیان."
لە راگەیێندراوەکەدا هاتووە، پاسەوانی شوێنەکە لە سێ گەشتیارەکەی داوە و کردوونییەتە دەرەوە، دواتر کە حەکیم لە هۆتێلەکە چووەتە دەرەوە لەلایەن یەکێك لەو دوو برایەوە بە چەقۆ لێی دراوە و دوو شوێنی جەستەی بریندارکراوە.
ناوەندی بەرەنگاربوونەوەی زانیاریی نادروست لە فەرمانگەی پەیوەندییەکانی سەرۆکایەتیی کۆماری تورکیا دەڵێت، حەکیم "لە شوێنی رووداوەکە گیانی لەدەستداوە و دوو براکە و پاسەوانەکەش هەڵاتوون."
حەکیم، شەوی 31ـی ئاب لە دوبەیەوە لەگەڵ ئامۆزا و برایەکی چووبووە ئیستەنبووڵ. دوو کاژێر دوای گەیشتنی هێرشی کراوەتە سەر و کوژراوە.
بەگوتەی سەعد گۆران، ئامۆزای کوژراوەکە هۆکاری هێرشکردنە سەر حەکیم ئەوە بووە بە زمانی کوردی بە تەلەفۆن قسەی لەگەڵ هاوڕێیەکی کردووە.
تاوەکو ئێستا تاوانبار دەستبەسەرنەکراوە و کەسوکاری داوا دەکەن مافی ون نەبێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ