تورکیا
بەگوێرەی داتاکان، لە مانگی کانوونی یەکەمی 2023دا 240 پزیشک بەڵگەنامەی ئەستۆپاکییان پێدراوە و کۆچیان کردووە
prev
next
رووداو دیجیتاڵ
پارساڵ لە تورکیا و باکووری کوردستان، 3025 پزیشک کۆچیان کردووە بۆ وڵاتانی دەرەوە.
یەکێتیی پزیشکانی تورکیا ئاشکرای کرد، ژمارەی ئەو پزیشکانەی تورکیا و باکووری کوردستان بۆ دەرەوەی وڵات کۆچ دەکەن لە زیادبووندایە. پارساڵ ئەو پزیشکانەی بەڵگەنامەی ئەستۆپاکییان پێدراوە بۆ کۆچکردن بۆ دەرەوەی تورکیا، بەرزترین ئاستی تۆمار کردووە و گەیشتووەتە سێ هەزار و 25 پزیشک.
بەگوێرەی داتاکان، لە مانگی کانوونی یەکەمی 2023دا 240 پزیشک بەڵگەنامەی ئەستۆپاکییان پێدراوە و کۆچیان کردووە. لە مانگی ئاب و ئەیلوولی 2023، زۆرترین پزیشک کۆچیان کردووە، کە لە هەردوو مانگەکەدا 641 بەڵگەنامەی ئەستۆپاکییان پێدرا.
لەدوای ساڵی 2017وە، ژمارەی ئەو پزیشکانەی لە تورکیا و باکووری کوردستانەوە کۆچیان کردووە و لە وڵاتانی دیکە درێژەیان بە پیشەکانیانداوە، بە رێژەیەکی بەرچاو زیادیکردووە. لە 2017ـدا 482، لە 2018ـدا 802، لە 2019ـدا 1057، لە 2020ـدا 931، لە 2021ـدا 1405، لە 2022ـدا 2685 و لە 2023ـدا 3025 پزیشک روویان لە دەرەوەی تورکیا کردووە.
ئەمە لە کاتێکدایە لە ساڵی 2012ـدا تەنیا 59 پزیشک "بەڵگەنامەی ئەستۆپاکی"یان وەرگرتووە. زۆربەی ئەو پزیشکانەی " بەڵگەنامەی ئەستۆپاکی" وەردەگرن، دەچنە وڵاتانی ئەوروپا.
سەبارەت بە هۆکاری کۆچی پزیشکانیش، یەکێتیی پزیشکانی تورکیا باسی لە چەند هۆکارێک بۆ کۆچی پزیشکان کردووە؛ لەوانە پزیشکان رۆژانە نزیکەی 12 کاژێر لە ژێر گوشاری زۆردا کاردەکەن، حکومەت نەیتوانیووە بەر لە رووداوەکانی تووندوتیژی دژ بە پزیشکان بگرێت و دۆخی دارایی و ئابووری پزیشکان بەو پێیەی ناڕازین لەو مووچانەی وەریدەگرن، بەراورد بەو کارەی ئەنجامی دەدەن.
بەگوێرەی داتاکانی فەرمانگەی ئاماری یەکێتیی ئەوروپا (یۆرۆستات) بۆ ساڵی 2021، لە تورکیا بۆ هەر 100 هەزار هاوڵاتی 218 پزیشک و لە یۆنانیش بۆ هەر 100 هەزار هاووڵاتی 629 پزیشک هەن، ئەمەش کەمترینە لەسەر ئاستی وڵاتانی ئەوروپا.
یەکێتیی پزیشکانی تورکیا، ئاماری دەستلەکارکێشانەوەی پزیشکان لە باکووری کوردستان و تورکیا و کۆچکردنیان لەنێوان ساڵی 2012-2023 بەمشێوەیەیە:
ساڵی 2012
59 پزیشک
ساڵی 2013
90 پزیشک
ساڵی 2014
118 پزیشک
ساڵی 2015
150 پزیشک
ساڵی 2016
245 پزیشک
ساڵی 2017
482 پزیشک
ساڵی 2018
802 پزیشک
ساڵی 2019
1047 پزیشک
ساڵی 2020
931 پزیشک
ساڵی 2021
1045 پزیشک
ساڵی 2022
2685
ساڵی 2023
3025 پزیشک
یه‌كێتیی پزیشكانی توركیا TTB، ساڵی 1953 له ئیسته‌نبووڵ دامه‌زراوە. ساڵی 1983 بنكه‌ی سه‌ره‌كیی گواسترایه‌وه ئه‌نقه‌ره. 65 لقی له‌سه‌رانسه‌ری توركیا و باکووری کوردستان هه‌یه و خاوه‌نی 101 هه‌زار ئه‌ندامه.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ