08-12-2024
21:38
سەرۆکایەتیی هەرێمی کوردستان: به بايه‌خێكى زۆره‌وه چاودێريی پێشهاتەکانی سووریا دەکه‌ين
لۆگۆی سەرۆکایەتیی هەرێمی کوردستان
سەرۆکایەتیی هەرێمی کوردستان پەیامێکی لەبارەی دۆخی سووریا بڵاوکردەوە و دەڵێت، "به‌بايه‌خێكى زۆره‌وه چاودێريی پێشهاتەکان دەکەین". دەشڵێت، "هه‌موو ململانێيه‌ک كه دۆخى ناوچه‌كه ئاڵۆز بكات، ره‌تده‌كه‌ينه‌وه".
سەرۆکایەتیی هەرێمی کوردستان لە بەشێکی راگەیێندراوەکەدا باسی لەوە کردووە، "داوا لە هەموو لایەک دەکەین زمانی دیالۆگ و چارەسەری ئاشتیيانە بگرنەبەر، به‌شێوه‌يه‌ک دادپەروەری و یەکسانی بۆ هەموو پێکهاتەکانی سووریا، لەوانە گەلی کورد، دەستەبەر بکات، هه‌روه‌ها بەشداريی کارايان لە داڕشتنی داهاتووی وڵاتدا، مسۆگەر بکات".
بەرەبەیانی ئەمڕۆ چەکدارانی ئۆپۆزیسیۆنی سووریا چوونە نێو دیمەشقی پایتەختی سووریا و کۆنترۆڵیان کرد. بەمەش کۆتایی بە دەسەڵاتی 24 ساڵەی بەشار ئەسەد هات.
سەرۆکایەتیی هەرێمی کوردستان لە راگەیێندراوەکەیدا دەڵێت، "هەرێمی کوردستان له چوارچێوه‌ى عێراقدا پابەنديی خۆی بە پاراستنی پەیوەنديی هاوسەنگ و کارکردن بۆ بەهێزکردنی هاوکاريی هەرێمی و نێودەوڵەتی بۆ دڵنیابوون لە سەقامگیريی سووریا دووپات دەکاتەوە. هه‌موو ململانێيه‌ك كه دۆخى ناوچه‌كه ئاڵۆز بكات، ره‌تده‌كه‌ينه‌وه، هه‌روه‌ها جەخت له پاراستنی ئاسایش و سەقامگیرى و بەرژەوەنديی هەموو گەلان و پێكهاته‌كانی ناوچه‌كه ده‌كه‌ينه‌وه".
سەرۆکی دەستەی تەحریر شام دوای کۆنترۆڵکردنی دیمەشق، چووە نێو مزگەوتی ئومەوی و لەبەردەم هەزاران کەس رایگەیاند، "ئەسەد سووریای کردە گۆڕەپانی تەماعکاری ئێران". گوتیشی، "سەرکەوتنی ئەمڕۆ مێژوویەکی نوێیە بۆ ئوممەی ئیسلامی".
پێشهاتەکانی دۆخی سووریا خێران. سەرۆکایەتیی هەرێمی کوردستان دەڵێت، "جەخت له گرنگيی یەکخستنی هەوڵە نێودەوڵەتی و هەرێمییەکان دەکەینەوە بۆ دڵنیابوون لە داهاتوویەکی سەقامگیر بۆ سووریا". داواش له كۆمه‌ڵگه‌ى نێوده‌وڵه‌تى و وڵاتانى ناوچه‌كه ده‌كات رۆڵى خۆيان بۆ چاره‌سه‌رى ئاشتييانه بگێڕن و "پشتگیريمان بۆ خواستەکانی گەلی سووریا بۆ ئاشتی و ئازادی، دووپات ده‌كه‌ينه‌وه".
زیاتر بخوێنەوە
17:46
حکومەتی هەرێمی کوردستان: رێز لە بڕیار و ئیرادەی خەڵکی سووریا دەگرین
لۆگۆی حکومەتی هەرێمی کوردستان
حکومەتی هەرێمی کوردستان لە راگەیێندراوێکدا دەڵێت، "رێز لە بڕیار و ئیرادەی خەڵکی سووریا دەگرین و هیوادارین سووریای داهاتوو ئازاد، ئارام، دیموکراتیک و سەقامگیر بێت".
ئەمڕۆ یەکشەممە، حکومەتی هەرێمی کوردستان راگەیێندراوێکی لەبارەی دۆخی سووریا بڵاوکردەوە.
لە راگەیێندراوەکەدا هاتووە، "گۆڕانکاریی خێرا و کەوتنی رژێمی دەسەڵاتداری سووریا، سەردەمێکی نوێی هێناوەتە کایەوە. رێز لە بڕیار و ئیرادەی خەڵکی سووریا دەگرین و هیوادارین سووریای داهاتوو، ئازاد و ئارام و دیموکراتیک و سەقامگیر بێت و مافی هەمو گەل و پێکهاتەکانی تێدا پارێزراو بێت".
زیاتر بخوێنەوە
16:15
هەڵوێستی ئێران لەسەر کەوتنی ئەسەد
رووداو
وەزارەتی دەرەوەی ئێران دەڵێت، دیاریکردنی چارەنووس و بڕیاردان لەسەر ئایندەی سووریا "بەرپرسیارێتیی خەڵکی ئەم وڵاتەیە، بەبێ دەستێوەردانی وێرانکەر و سەپاندنی دەرەکی."
وەزارەتی دەرەوەی ئێران لە راگەیێندراوێکدا ئاماژە بەوە دەکات، دیاریکردنی چارەنووسی گەلی سووریا "پێویستی بە کۆتاییهێنان بە ململانێ سەربازییەکان دەستبەجێ پێشگرتنە لە کردەوە تیرۆریستییەکان و دەستپێکردنی دیالۆگی نیشتمانی بە بەشداریی هەموو پێکهاتەکانی کۆمەڵگەی سووریا، لە پێناو پێکهێنانی حکومەتێکی بنکەفراوان کە نوێنەرایەتیی هەموو گەلی سووریا بکات."
وەزارەتەکە هاوکات، جەخت لە جێبەجێکردنی بڕیارنامەی 2254ـی ئەنجوومەنی ئاسایشی نێودەوڵەتی لەبارەی سووریا دەکاتەوە کە رێگەچارەیەکی سیاسی بۆ دۆخی وڵاتەکە دەخاتەڕوو.
لەبارەی پەیوەندییەکانی وڵاتەکە لەگەڵ سووریا، وەزارەتی دەرەوەی ئێران دەڵێت، پێشبینی دەکەن پەیوەندییەکانیان لەسەر بنەمای بەرژەوەندیی هاوبەش و پابەندبوون بە یاسای نێودەوڵەتی بەردەوام بێت.
وەزارەتەکە ئاماژە بەوە دەدات، ئێران بە وردی چاودێریی پێشهاتەکانی سووریا و ناوچەکە دەکات و بە لەبەرچاوگرتنی هەڵسوکەوتی کاراکتەرە کاریگەرەکان لە گۆڕەپانی سیاسی و ئەمنیی سووریادا "رێباز و هەڵوێستی گونجاو دەگرێتەبەر."
16:11
ماکرۆن: لەکۆتاییدا دەوڵەتی بەربەری رووخا
ئیمانوێل ماکرۆن، سەرۆککۆماری فەرەنسا.
سەرۆکی فەرەنسا خۆشحاڵی خۆی بە نەمانی دەسەڵاتی بەشار ئەسەد دەربڕی و رایگەیاند،"لەکۆتاییدا دەوڵەتی بەربەری رووخا."
ئیمانوێل ماکرۆن، سەرۆککۆماری فەرەنسا لە پۆستێکی ئێکس دا رایگەیاند،"لەکۆتاییدا دەوڵەتی بەربەری رووخا. رێز بۆ خەڵکی سووریا، بۆ ئازایەتیی و ئارامگرتنیان."
15:38
ئیسرائیل بنکەی ئاسمانی خالخالەی لە باکووری سوێدا بۆردوومانکردووە
سوپای ئیسرائیل بۆردوومانی بنکەی ئاسمانی خالخالەی لە باشووری سووریا کردووە.
دوو بەرپرسی ئاسایش لە سووریا بە ئاژانسی رۆیتەرزیان راگەیاندووە، ئیسرائیل شەش هێرشی ئاسمانیی کردووەتە سەر بنکەیەکی ئاسمانی سوپای سووریا لە باکووری شاری سوێدا.
سوپای سووریا دوێنێ شەو بنکەکەی چۆڵکردووە. بنکە ئاسمانییەکە ژمارەیەکی زۆر مووشەک و رۆکێتی تێدا کۆگە کرابوو.
زیاتر بخوێنەوە
15:31
راوێژکاری ئەڵمانیا: کۆتاییهاتنی دەسەڵاتی ئەسەد هەواڵێکی خۆشە
راوێژکاری ئەڵمانیا دڵخۆشیی خۆی بە رووخانی دەسەڵاتی بەشار ئەسەد لە سووریا رادەگەیێنێت.
ئۆلاف شۆڵتز، راوێژکاری ئەڵمانیا دەڵێت: "بەشار ئەسەد خەڵکی خۆی بە دڕندەترین شێوە چەوساندەوە، بێشوومار گیانی خەڵکی لە ئەستۆیدایە. ژمارەیەکی زۆری لە خەڵکی سووریا بەرەو کۆچکردن برد، زۆر لەوانەش هاتوونەتە ئەڵمانیا. خەڵکی سووریا نەهامەتیی زۆریان بینیوە. بۆیە کۆتایی دەسەڵاتی ئەسەد بەسەر سووریادا هەواڵێکی خۆشە."
راوێژکاری ئەڵمانیا دەشڵێت: "ئێستا کاتی ئەوەیە یاسا و سەقامگیری بە زوویی بۆ سووریا بگەڕێندرێتەوە. پێویستە ئێستا و لە ئایندەدا خەڵکی باوەڕمەندی هەموو ئایینەکان و کەمینەکان بپارێزرێن. ئێستاش دەکرێت چارەسەرێکی سیاسی بۆ ناکۆکیی سووریا بەپێی بڕیاری 2254ی ئەنجوومەنی ئاسایشی نەتەوە یەکگرتووەکان هەبێت."
هاوکات، جەخت لەوە دەکاتەوە، "پێوەری ئێمە بۆ حکومڕانەکانی داهاتوو بەپێی ئەوە دەبێت کە ژیانێکی شکۆمەندانە فەراهەم بکەن و گەلی سووریا چارەنووسی خۆی دیاریبکات. بەرگری لە سووریایێکی خاوەن سەروەری بەرامبەر هەموو دەستوەردانی خراپی لایەنی سێیەم بکەن و بە ئاشتی لەگەڵ دراوسێکانی بژین."
15:29
رووسیا دەڵێت، ئەسەد دەستی لەکارکێشایەوە و سووریای بەجێهێشت
رووداو
وەزیری دەرەوەی رووسیا رایگەیاند، "لەئەنجامی گفتوگفۆکردن لەنێوان بەشار ئەسەد و ژمارەیەک چەکداری هێزەکان لەسەر سنووری سووریا، بەشار ئەسەد دەستی لەکارکێشایەوە و وڵاتەکەی بەجێهێشت".
ئەمڕۆ یەکشەممە،سێرگی لاڤرۆڤ، وەزیری دەرەوەی رووسیا راگەیێندراوێکی بڵاوکردەو رایگەیاند، بەشار ئەسەد سووریای جێهێشتووە. گوتیشی، "ئەسەد بەر لە جێهێشتنی وڵات داوای رادەستکردنی دەسەڵاتی بەشێوەیەکی ئاشتییانە کردووە".
لاڤرۆڤ باسی لەوە نەکرد، ئەسەد لەکوێیە و بەرەو کوێ چووە.
وەزیری دەرەوەی رووسیا هەروەها گوتی، ئەوان بەشدارییان لە گفتوگۆکاندا نەکردووە.
مۆسکۆ نیگەرانیی خۆیشی لە رووداوەکانی سووریا راگەیاند و داوای دوور بوون لە بەکارهێنانی تووندوتیژی دەکات. دەشڵێت، "بۆ ئەم مەبەستە لەگەڵ هێزە چەکدارەکانی سووریا لە گفتوگۆ دایە."
نوێدەکرێتەوە..
زیاتر بخوێنەوە
13:40
پەنابەرانی رۆژئاوای کوردستان و سووریا، لە هەولێر ئاهەنگی سەرکەوتن دەگێڕن
دوای ئەوەی هێزە ئۆپۆزیسیۆنەکان چوونە نێو دیمەشق و "رووخاندن"ـی حکومەتی بەشار ئەسەدیان راگەیاند، پەنابەرانی رۆژئاوای کوردستان و سووریا، لە هەولێر ئاهەنگی سەرکەوتنیان گێڕا.
زیاتر بخوێنەوە
13:30
گیێر پیدەرسن بۆ رووداو: پێویستە هەتەشە کارێک بکات لە لیستی تیرۆر بێتەدەر
رووداو
نوێنەری نەتەوە یەکگرتووەکان بۆ کاروباری سووریا دەڵێت، پێویستە دەستەی تەحریری شام کارێک بکات لە لیستی تیرۆر بێتەدەر.
گیێر پیدەرسن، نوێنەری نەتەوە یەکگرتووەکان بۆ کاروباری سووریا لە دەوحەی پایتەختی قەتەر بە رووداوی رایگەیاند: "پێویستە گەلی سووریا سەقامگیری ناوچەکە بپارێزێت. پێش ئێستا هەتەشە لە لیستی تیرۆردا بوو. پێویستە هەتەشە کارێک بکات لە لیستی تیرۆر بێتەدەر."
هاوکات، پاڵپشتیی نەتەوە یەکگرتووەکان بۆ گەلی سووریا پشتڕاستدەکاتەوە. بەڵام جەخت لەوە دەکاتەوە کە "زۆر گرنگە هەموو گەلی سووریا پێکەوە کار بکەن و زۆر گرنگە هەموو گەلی سووریا حکومەتێک پێکبهێنن."
گیێر پیدەرسن داوایکرد: "گرووپە چەکدارەکان مافی هەموو گەلانی سووریا بپارێزن."
13:26
لێدوانی هاکان فیدان بۆ رووداو لەبارەی مامەڵەکردنیان لەگەڵ هەسەدە
هاکان فیدان، وەزیری دەرەوەی تورکیا
هاکان فیدان، وەزیری دەرەوەی تورکیا بە رووداوی راگەیاند، ئەوان لە ئیدارەی داهاتووی سووریا دا مامەڵە لەگەڵ هەسەدە ناکەن.
هاکان فیدان، وەزیری دەرەوەی تورکیا لە دەوحەی پایتەختی قەتەر وەڵامی نوێنەر فاتیح، نێردراوی رووداوی دایەو و گوتی "هەر لقێکی سەر بە پەکەکە لە سووریا ناتوانرێت بە هاوبەشێکی رەوا دابنرێت بۆ ئەوەی گفتوگۆیان لەگەڵ بکرێت."
وەزیری دەرەوەی تورکیا دەشڵێت، هێزەکانی سووریای دیموکرات (هەسەدە) "پەیوەندییان بە رێکخراوی تیرۆریستیی نێودەوڵەتییەوە هەیە.. پەکەکە لە عێراق، تورکیا و ئێران هەیە، ئەوان سووریایی نین. بۆیە بە کورتی دەڵێم کە [دانوستاندن لەگەڵ هەسەدە] نابێت. تەنیا مەگەر خۆیان بگۆڕن"
زیاتر بخوێنەوە
13:20
بەرپرسێکی پێنتاگۆن: هێزەکانی ئەمریکا لە رۆژهەڵاتی سووریا دەمێننەوە
ئۆتۆمبێلێکی سەربازیی سوپای ئەمریکا لە سووریا.
دوای رووخانی دەسەڵاتی بەشار ئەسەد و کۆنترۆڵکردنی دیمەشق لە لایەن ئۆپۆزیسیۆنەوە، بەرپرسێکی وەزارەتی بەرگریی ئەمریکا (پێنتاگۆن) دەڵێت، هێزەکانیان لە رۆژهەڵاتی سووریا دەمێننەوە.
ئەمریکا نزیکەی 900 سەربازی لە رۆژئاوای کوردستان و سووریا هەیە کە لە چوارچێوەی هاوپەیمانییەکی نێودەوڵەتیدا رێگری لە سەرهەڵدانەوەی داعش دەکەن.
دانیێل شەپیرۆ، جێگری یاریدەدەری وەزیری بەرگریی ئەمریکا بۆ کاروباری رۆژهەڵاتی نێوەڕاست لە کۆڕبەندی گفتوگۆی مەنامەی ئەمنیدا لە پایتەختی بەحرێن گوتی: "واشنتن هەموو رێکارێکی پێویست دەگرێتەبەر بۆ رێگریکردن لە گەڕانەوەی داعش" لە سووریا.
بەرپرسەکە هەروەها باسی لەوە کرد، "ئەمریکا لە رۆژهەڵاتی سووریا دەمێنێتەوە،" گوتیشی: "ئێمە دەزانین کە دەکرێت دۆخی پەشۆکاو و شلەقاوی سووریا دەرفەت بە داعش بدات بتوانێت چالاکی بکات و پلان بۆ هێرشی دەرەکی دابنێت.
13:06
چەند پەیامێک لە هاکان فیدانەوە لەبارەی دۆخی سووریا
هاکان فیدان، وەزیری دەرەوەی تورکیا لە دەوحەوە لەبارەی رووخانی دەسەڵاتی ئەسەد لە سووریا رایگەیاند، رژێمی سووریا نەیتوانی خزمەتی خەڵکی خۆی بکات. ئێستاش گرووپەکانی ئۆپۆزیسیۆن یەکگرتوون و پێویستە دامودەزگەکانی دەوڵەت پێکەوە بپارێزن.
وەزیری دەرەوەی تورکیا هەروەها داوای لە هەموو لایەنەکان کرد کە خۆیان لە گرژترکردنی دۆخی ناوچەکە بپارێزن. گوتیشی، گرنگی بە یەکپارچەیی خاکی سووریا دەدەین.
بەشێک لە قسەکانی هاکان فیدان:
هاکان فیدان: لە 2016ەوە ئێمە لە رێگەی ئەستانەوە دۆخەکەمان هێورکردەوە
هاکان فیدان: رژێمی سووریا نەیتوانی خزمەتی خەڵکی خۆی بکات
هاکان فیدان: گرنگی بە یەکپارچەیی خاکی سووریا دەدەین
هاکان فیدان: داوا لە هەموو لایەنەکان دەکەین خۆیان لە گرژکردنی دۆخی ناوچەکە بپارێزن
هاکان فیدان: پێویستە لە سووریا دامەزراوەکانی دەوڵەت بپارێزرێت
هاکان فیدان: پێزانینمان بۆ رۆڵی بنیاتنەرانەی ئێران و رووسیا هەیە
هاکان فیدان: بەشار ئەسەد رەنگە لە دەرەوەی سووریا بێت
هاکان فیدان: کارمان بۆ ئارامیی سووریا کردووە
هاکان فیدان: پێویستە دڵنیابینەوە سووریا نابێتە هەشەڕەشە بۆ دراوسێکانی
هاکان فیدان: ویستمان دۆخی سووریا تێکنەچێت و نەڕووخێت
هاکان فیدان: رژێمی سووریا دەرفەتی زێڕینی هەبوو تاوەکو چارەسەری کێشەکان بدۆزێتەوە
هاکان فیدان: کارکردن لەگەڵ ئیدارەی داهاتووی سووریا بۆ ئێمە زۆر گرنگە
زیاتر بخوێنەوە
13:01
ئازادکردنی ژن و منداڵ لەنێو زیندانی سیدنایا لە سووریا
دۆخی زیندانەکە زۆر خراپە و زیندانییەکان لە رەوشێکی ناهەمواردا دەژین. کاردانەوەیان ببینە کە ئازاد دەکرێن
زیاتر بخوێنەوەئازادکردنی ژن و منداڵ لەنێو زیندانی سیدنایا لە سووریا؛ دۆخی زیندانەکە زۆر خراپە و زیندانییەکان لە رەوشێکی ناهەمواردا دەژین. کاردانەوەیان ببینە کە ئازاد دەکرێن#Syria #سوريا pic.twitter.com/cxZ7S812tz
— Rudaw (@Rudawkurdish) December 8, 2024
13:00
بەهای لیرەی سووری نزیکەی 200% بەرزبووەوە
لیرەی سووری
دوای رووخانی دەسەڵاتی بەشار ئەسەد، بەهای لیرەی سووری بەردەوامە لە بەرزبووەنەوە و بەراورد بە پێش رووخانی دەسەڵاتی بەعس، نزیکەی 200% بەرزبووەتەوە.
رەوەز میرزا، ئاڵوگۆڕکاری دراو لە بازاڕی دۆلارەکەی سلێمانی، کاژێر 01:00ـی نیوەڕۆی ئەمڕۆ یەکشەممە 08-12-2024 بە تۆڕی میدیایی رووداوی گوت بەهای "یەک ملیۆن لیرەی سووری، گەیشتە 285 هەزار دینار."
لە کاژێر 10:00ـی بەیانیش، حاجی سابیر باواجی، ئەندامی ئەنجوومەنی ئاڵوگۆڕی بازاڕی دراو لە هەولێر بە رووداوی گوتبوو "ئەمڕۆ یەک ملیۆن لیرەی سووری بە 150 هەزار دینارە".
بەرزبوونەوەی بەهای دراوی سووری لەکاتێکدایە؛ دوێنێ یەک ملیۆن لیرەی سووری بە 110 هەزار دینار بوو. لەکاتێکدایە هەفتەی رابردوو پێش تەشەنەسەندنی شەڕ، یەک ملیۆن لیرەی سووری بە 100 هەزار دینار بوو.
بەرامبەر بە دۆلاریش ئێستا یەک ملیۆن لیرەی سووری بەرامبەر 190 دۆلارە، لەکاتێکدا پێش رووخانی دەسەڵاتی بەشار ئەسەد، 67 دۆلار بوو.
12:55
ئەسەد لەکوێیە؟
وێنەیەکی بەشار ئەسەد، لە 3-9-2009 لە دیمەشق. وێنە: AFP
لە کاتێکدا هێشتا نازانرێت بەشار ئەسەد، سەرۆککۆماری سووریا لەکوێیە، لێکدانەوە و شرۆڤەی جیاواز بۆ پەناگەی داهاتووی دەکرێت.
پێگەی "فڵایت رادار" کە تایبەتە بە چاودێریکردنی جووڵەی فڕۆکەوانیی جیهان، پێشانیدەدات، لە سەروبەندی کۆنترۆڵکردنی دیمەشق لە لایەن چەکدارانی ئۆپۆزسیۆنەوە، فڕۆکەیەکی سەر بە هێڵە ئاسمانییەکانی سووریا، کە گومان دەکرێت ئەسەدی تێدابووبێت، لە فڕۆکەخانەی دیمەشقەوە فڕیوە.
بە گوێرەی پێگەکە، فڕۆکەکە سەرەتا بەرەو رۆژئاوای سووریا چووە، بەڵام دواتر لە پڕێکدا پێچیکردووەتەوە و گەڕاوەتەوە، دوای چەند خولەکێک لەسەر نەخشە نەماوە.
دوو ئەفسەری باڵای سووریا بە ئاژانسی رۆیتەرزیان راگەیاندووە، ئەسەد بە فڕۆکەیەک دیمەشقی بەرەو شوێنێکی نادیار جێهێشتووە.
دواتر محەممەد غازی جەلالی، سەرۆکوەزیرانی سووریا گوتی، شوێنی ئەسەد و وەزیری بەرگری "لە ئێوارەی شەممەوە دیار نییە."
هەروەها کەناڵ 12ـی ئیسرائیل لە زاری چەند سەرچاوەیەکی ئیسرائیلییەوە بڵاویکردەوە، "مسۆگەر نییە ئەسەد خاکی سووریای جێهێشتبێت."
پێگەی ئەکسیۆسی ئەمریکیش لە زاری سەرچاوەی ئیسرائیلی و ئەمریکییەوە دەڵێت، ئەسەد بە نیوەشەو دیمەشقی جێهێشتووە و بەرەو بنکەی سەربازیی حومەیمیمی رووسیا چووە، بەڵام هیچ ئاماژەیەک نییە سووریای جێهێشتبێت.
12:20
دامەزرێنەری تۆڕی مافەکانی مرۆڤ لە سووریا: لە حکومەتی نوێدا مافی کورد دەستەبەر دەکرێت
فازڵ عەبدولغەنی، دامەزرێنەری تۆڕی مافەکانی مرۆڤ لە سووریا
فازڵ عەبدولغەنی، دامەزرێنەری تۆڕی مافەکانی مرۆڤ لە سووریا بە رووداوی راگەیاند: "پێموایە لە حکومەتی نوێی سووریا مافی کورد دەستەبەر دەکرێت."
فازڵ عەبدولغەنی ئاماژە بەوە دەدات: "بە فراوانی راپۆرتمان لەبارەی پێشێلکاریی مافی کورد کردووە لە سووریا."
دامەزرێنەری تۆڕی مافەکانی مرۆڤ لە سووریا باس لەوە دەکات: "راپۆرتمان لەسەر پێشێلکارییەکانی رژێمی ئەسەد لە دژی کورد کردووە. ناسنامەیان لێسەندوون، نەیهێشتووە لە زانکۆکان بخوێنن.. کورد دەبێت لە دامەزراوەکانی دەوڵەتدا بەشدار بن و ببنە وەزیر و پۆستی باڵا لە بواری سەربازیدا وەربگرێت."
هاوکات، وەکو خۆی باسی دەکات، لەدوای نەمانی حکومەتەکەی بەشار ئەسەد، "زەمینە هەیە بۆ ئەوەی کورد مافی خۆی پێبدرێت. ئینکاری لەوە ناکرێت کە پرسێکی کوردی هەیە لە سووریا. پێویستی بە دانوستاندن هەیە بۆ ئەوەی کار لەسەر ئەمە بکرێت."
دامەزرێنەری تۆڕی مافەکانی مرۆڤ لە سووریا ئەوەشی بە رووداو گوت: "دەبێت رێز لە هەموو هاووڵاتییانی سووریا بگیرێت، بەبێ رەچاوکردنی ئایینیان. دەبێت بەرەو دیموکراسی هەنگاو بنێین بۆ ئەوەی لەم خێزانە ستەمکارە [بنەماڵەی ئەسەد] رزگارمان بێت."
لەبارەی گرووپە چەکدارەکانی ئۆپۆزیسیۆن، عەبدولغەنی باسی لەوە کرد: "رۆڵی بەشێک لە گرووپەکانی ئۆپۆزیسیۆن گەورە کراوە مەبەستمان دەستەی تەحریری شامە. رەفتارەکانی هێزەکانی ئۆپۆزیسیۆن باش بووە. ئەو گوتارانەی دەبیستین گوتاری نیشتمانین. گرووپە ئیسلامییەکانیش بەشێکن لە کۆمەڵگەی سووریا و دەتوانن لەژێر چەتری دەوڵەتی سووریا کاربکەن."
هەر بە ئاماژەدان بە دەستەی تەحریری شام، گوتی کە بەشێکی گرووپە ئیسلامییە چەکدارەکان "بەتەواوی گۆڕاون و هەنگاویان بەرەو دیموکراسییەت هاوێشتووە."
جەختیشی لەوە کردەوە کە "بەردەوام دەبین لە چاودێریکردنی مافەکانی مرۆڤ لە سووریا. چاودێری دەکەین کە ئایا ئۆپۆزیسیۆن پێشێلکاری دەکات یان نا."
لەبارەی پرسی کورد و کەمینەکانەوە، فازڵ عەبدولغەنی گوتی: "دەبێت پارێزگارییان لێبکرێت و مافەکانیان پارێزراو بێت. دەبێت بەپێی زمان و داب و نەریتیان مافەکانیان زامن بکرێن. ئەمە شتێکی بنچینەییە و دەبێت بەشێوەیەکی باش کاری لەسەر بکرێت."
11:51
دڵخۆشیی پەنابەرانی سووریایی لە هەولێر بەبۆنەی کەوتنی حکومەتەکەی بەشار ئەسەد
لە هەولێر سەتان پەنابەری سووریایی و هاونیشتمانیی رۆژئاوای کوردستان بەبۆنەی رووخانی دەسەڵاتی بەشار ئەسەد خۆشی دەردەبڕن، ئاڵای سووریایان بەرزکردووەتەوە و درووشمی سەرکەوتن دەڵێنەوە.
راستەوخۆ لە فەیسبووکی رووداوەوە بینەر بە:
زیاتر بخوێنەوە11:42
ئەنجوومەنی خۆجێیی ئەنەکەسە لە عەفرین: چەکدارانی ئۆپۆزیسیۆن نزیکەی 200 ئاوارەیان دەستگیرکردووە
ژمارەیەک ئاوارە کورد لە سووریا. وێنە: AFP
سەرۆکی ئەنجوومەنی خۆجێیی ئەنەکەسە لە عەفرین دەڵێت: چەکدارانی ئۆپۆزیسیۆنی نزیک لە تورکیا، خەریکە دەبنە بەربەست لەبەردەم گەڕانەوەی ئاوارەکان بۆ عەفرین.
دەشڵێت، "تائێستا نزیکەی 200 ئاوارە دەستگیرکراون."
ئەمڕۆ یەکشەممە، 8ـی کانوونی یەکەمی 2024، ئەحمەد حەسەن، سەرۆکی ئەنجوومەنی خۆجێیی ئەنەکەسە لە عەفرین بە تۆڕی میدیایی رووداوی راگەیاند: "لە سەرەتای ئەم مانگەوە نزیکەی 2000 خێزانی کوردی ئاوارەی حەلەب و دەوروبەری گەڕاونەتەوە عەفرین و پڕۆسەکەش بەردەوامە و ئێمەش بەردەوام هاوکارییان دەکەین."
ئەحمەد حەسەن گوتی: "کێشەیەک هەیە کە خەریکە دەبێتە بەربەست لەبەردەم گەڕانەوەی ئاوارەکان، ئەویش چەکدارانی ئۆپۆزیسیۆنی نزیک لە تورکیان." بە گوتەی ئەو، "لە سەرەتای ئەم مانگەوە تاوەکو ئەمڕۆ چەکدارانی ئۆپۆزیسیۆن بە بیانووی بوونی پەیوەندییان لەگەڵ پەیەدە نزیکەی 200 ئاوارەی گەڕاوەیان دەستگیرکردووە، لەکاتێکدا سەرجەمیان سڤیلن و هیچکام لەوان سیاسیی نەبوون."
سەرۆکی ئەنجوومەنی خۆجێیی ئەنەکەسە دەشڵێت، "ئەو چەکدارانە جگە لە دەستگیرکردنی بەشێکی زۆری هاونیشتمانیان؛ ماڵ و موڵکیشیان تاڵان دەکەن و خەڵکیان تووشی هەژاری کردووە."
11:31
بیروڕا؛ سووریای دوای ئەسەد چ واتایەکی بۆ دونیا هەیە؟
زریان رۆژهەڵاتی
زریان رۆژهەڵاتی، بەڕێوەبەری ناوەندی لێکۆڵینەوەی رووداو لە گۆشەی بیروڕای ئەمجارەیدا وتاریکی بە ناونیشانی "سووریای دوای ئەسەد چ واتایەکی بۆ دونیا هەیە؟" نووسیوە و تێیدا شیکردنەوەی بۆ رووخانی ئەسەد کردووە، کە چ کاریگەرییەکی لەسەر دەوڵەتان، بەتایبەتی لەسەر رووسیا، ئیسرائیل، ئەمریکا، تورکیا، ئێران و عێراق هەیە.
لە بەشێکی وتارەکەی زریان رۆژهەڵاتیدا هاتووە "دۆخی ئێستای سووریا چەندەی بەهێزبوونی هەتەشە بێت، ئەوەندەش بە واتای زیادبوونی کاریگەریی ناوچەیی تورکیا دێت لە سووریا و عێراق، ئەویش لەکاتێکدا ترەمپ گەڕاوەتەوە، بۆیە ئەمەش لەوانەیە وا لە ئێران، رووسیا و تەنانەت تاڕادەیەک عێراقیش بکات، کە لە سووریا پشتی هەسەدە بگرن."
بۆ خوێندنەوەی تەواوی وتارەکەی، کلیک بکە:
11:28
نیو کاژێر پێش ئەوەی لەسێدارە بدرێت ئازاد کرا
نیو کاژێر پێش ئەوەی لەسێدارە بدرێت ئازاد کرا
چیرۆکێکی کاریگەر: ئەم زیندانییە لە دیمەشق ئازاد بووە و سوێند دەخوات کە نیو کاژێر پێش ئازادبوونی بڕیار بووە لەگەڵ هاوڕێکەی لەسێدارەیان بدەن، بەڵام ئەسەد رووخا و رزگاریان بوو
زیاتر بخوێنەوە
11:11
خەمیس خەنجەر: پیرۆزبایی لە گەلی سووریا و شۆڕشگێڕان دەکەین
خەمیس خەنجەر، سەرۆکی هاوپەیمانیی سیادە"سەروەری".
خەمیس خەنجەر، سەرۆکی هاوپەیمانیی سیادە"سەروەری"، وەک یەکەم سەرکردەی عەرەبی سوننەی عێراق پەیامێکی بڵاوکردەوە و پیرۆزبایی لە گەلی سووریا و شۆڕشگێڕان دەکات و داوایەکیش لە هەموو وڵاتان دەکات.
ئەمڕۆ یەکشەممە، 08-12-2024، خەمیس خەنجەر، سەرۆکی هاوپەیمانیی سیادە "سەروەری"ـی سوننەکان، پەیامێکی بڵاوکردەوە و رایگەیاند: "سوورییەکان یەکێک لە گەورەترین دێر و نایابترین چیرۆکی تێکۆشانیان نووسییەوە، بۆ بەدیهێنانی ئازادی، شکۆمەندی و دادپەروەری، کە بە درێژایی 50 ساڵ، لەو پێناوەدا شتی بەهادار و باڵایان پێشکێش کرد".
خەمیس خەنجەر، داوا لە هەموو وڵاتان دەکات بەبێ هەڵاوێردن "رێز لە بژارەی گەلی سووریا بگرن لە مافی چارەی خۆنووسین، نووسینەوەی ئایندەیان و دەست لە کاروباریان وەرنەدەن".
خەنجەر هیوادارە: "ئەمە سەرەتاییەکی خێر بێت بۆیان، بەرەو دەوڵەتێک کە باوەڕی بە هاووڵاتیبوون و ئازادییەکان بێت، بەهاکانی دیموکراتی، دادپەروەری و مافەکانی مرۆڤ باڵبکێشنێت، بەبێ پەراوێزخستن و نادیدە گرتن"
لە کۆتایی پەیامەکەیدا خەمیس خەنجەر دەڵێت: "پیرۆزبایی لە گەلی سووریا و هەموو شۆڕشگێڕ و ئازادیخوازن دەکەین، دروود و رەحمەت بۆ شەهیدانی شۆڕشی گەورەی سووریا".
بەرەبەیانی ئەمڕۆ دەستەی تەحریری شام و هێزەکانی دیکەی دژبەری حکومەتی بەشار ئەسەد چوونە نێو دیمەشقی پایتەختی سووریا و کەوتنی حکومەتەکەی بەشار ئەسەدیان راگەیاند.
10:41
دۆناڵد ترەمپ: بەشار ئەسەد کۆتاییهات
دۆناڵد ترەمپ، سەرۆکی هەڵبژێردراوی ئەمریکا.
دۆناڵد ترەمپ، سەرۆکی هەڵبژێردراوی ئەمریکا دەڵێت، بەشار ئەسەد "کۆتاییهات" و لە سووریا "هەڵاتووە،" لەبەرئەوەی رووسیا "حەزی نەکرد چیدیکە بیپارێزێت."
سەرۆکی هەڵبژێردراوی ئەمریکا لە پۆستێکی تۆڕی کۆمەڵایەتیی ترووس سۆشیاڵدا دەڵێت "رووسیا لە بنەڕەتدا هیچ هۆکارێکی نەبوو" تاوەکو لە سووریا بێت. "ئەوان لەبەر ئۆکراینا حەزیان لە سووریا نەما."
بە گوتەی ترەمپ "رووسیا و ئێران ئێستا لە دۆخێکی لاوازدان، یەکێکیان لەبەر ئۆکراینا و ئابوورییەکی خراپ، ئەوەی دیکە لەبەر ئیسرائیل."
10:40
ئەنجوومەنی سەربازیی دێرەزوور: هەواڵی کشانەوەی هێزەکانمان دوورە لە راستییەوە
ژمارەیەک شەڕڤانی هەسەدە. وێنە: AFP
ئەنجوومەنی سەربازیی دێرەزوور لە راگەیێندراوێکدا رایگەیاند، هەموو ئەو هەواڵانە رەتدەکەنەوە کە باس لە کشانەوەی هێزەکانیان لەو سنوورە دەکات.
ئەمڕۆ یەکشەممە، 08-12-2024، ئەنجوومەنی سەربازیی دێرەزوور، کە لە ژێر دەسەڵاتی هێزەکانی سووریای دیموکرات (هەسەدە)دایە لە راگەیێندراوێکدا رایگەیاند: "تەواوی ئەو هەواڵانەی لەبارەی کشانەوەی هێزەکانمان لە شاری درێرەزوور ناڕاستن".
ئەنجوومەنەکە رایگەیاند: "هێزەکانمان ئەرکی خۆیان بۆ پاراستنی هەرێمەکە و دانیشتووانەکەی جێبەجێ دەکەن".
زیاتر بخوێنەوە
10:38
دەستبەسەرکردنی ژمارەیەک سەربازی سووری بە جلوبەرگی مەدەنی لە حومس
سەربازانی سووریا بە جلوبەرگی مەدەنییەوە دەستبەسەرکراون و بەنێو حومسدا دەسووڕێنرێنەوە، وێنە: Aaref WATAD / AFP
چەکدارەکان دوای ئەوەی شەوی رابردوو چوونە نێو شاری حومس و کۆنترۆڵیان کرد، بەیانی ئەمڕۆ ئەم 'سەربازانەیان کە جلوبەرگی مەدەنییان پۆشیوە' بەنێو شەقامەکانی شارەکەدا سوڕاندەوە.
10:23
بەڤیدیۆ؛ شکاندنی پەیکەری حافز ئەسەد لە حەسەکە
هاونیشتمانییانی حەسەکە لە رۆژئاوای کوردستان پەیکەری حافز ئەسەدیان رووخاند و لەنێوەڕاستی شارەکە ئاهەنگ دەگێڕن
زیاتر بخوێنەوە
ڤیدیۆکان بۆ رووداو نێردراون
10:20
هەسەدە فڕۆکەخانەی قامشلۆی کۆنترۆڵ کرد
خالد جەبر، پارێزەر لە قامشلۆ بە رووداوی راگەیاند، فڕۆکەخانەی قامشلۆ کەوتە دەستی هەسەدە و هێزە ئەمنییەکانی بەڕێوەبەرایەتیی خۆسەر؛ "ئێستا ئاڵای هەسەدە لەسەری بەرزکراوەتەوە."
خالد جەبر دەشڵێت: "لە پارێزگاکانی حەسەکە و قامشلۆ رێکارە ئەمنیییەکان گیراونەتە بەر و رەوشەکە بەتەواوی ئارامە..
ئەو پارێزەرە باس لەوەش دەکات، لەدوای کاژێر 2:00ـی شەوی رابردوو، هیچ هێزێکی سوپای سووریا لە قامشلۆ نەماوە و خۆیان رادەستی هێزەکانی سووریای دیموکرات (هەسەدە) کرد. بەشێکیان تا بەرەبەیان لە شوێنی خۆیان مابوونەوە، بەڵام تا کاژێر 6:00ـی بەیانی ئەوانیش خۆیان رادەستی هەسەدە کرد.
خالد جەبر هاوکات، دەڵێت: "شاری حەسەکە دوای 53 ساڵ لە شۆڤێنیی بەعس رزگار بوو، ئەمڕۆ کۆتایی هات. دوای 53 ساڵ لە ئێش و ئازار، لێدان لە زمانی کوردی، ناسنامەی کوردی، ئەمڕۆ شاری حەسەکە، شاری قامشلۆ ئەم پەڕاوە پیسانە تێدەپەڕێنێت و دەرباسی سەردەمێکی نوێ دەبن."
زیاتر بخوێنەوە
10:07
محەممەد غازی، سەرۆکوەزیرانی سووریا ماڵەکەی خۆی جێهێشت و دەچێت دەسەڵات رادەستی دەستەی تەحریر شام (هەتەشە) بکات.
زیاتر بخوێنەوەمحەممەد غازی، سەرۆکوەزیرانی سووریا ماڵەکەی خۆی جێهێشت و دەچێت دەسەڵات رادەستی دەستەی تەحریر شام بکات pic.twitter.com/CQ3uba6SSo
— Rudaw (@Rudawkurdish) December 8, 2024
10:03
ئەنجوومەنی نیشتمانیی راگوزەری سووریا: لێپرسینەوە لەوانە دەکەین کە تاوانیان دژی گەل کردووە
ژمارەیەک خەڵک ئەمڕۆ (یەکشەممە، 8-12-2024) لە شەقامێکی دیمەشق وێنەی بەشار ئەسەد و درووشمەکانی حکومەتەکەی دەدڕێنن. وێنە: LOUAI BESHARA / AFP
دوای کەوتنی رژێمی ئەسەد، ئەنجوومەنی نیشتمانیی راگوزەری سووریا لە راگەیێندراوی یەکەمی خۆیدا رایگەیاند، رژێمی بەشار ئەسەد رووخا و بەرەو دەرەوەی وڵات هەڵات"، راشیگەیاند، بەگوێرەی یاسا و دادگە لێپرسینەوە لە سەرجەم ئەوانە دەکەن کە تاوانیان دژی گەلی سووریا کردووە.
ئەنجوومەنی نیشتمانیی راگوزەری سووریا لە یەکەم راگەیێندراوی خۆیدا دەڵێ "دوای ساڵانێکی زۆر لە ستەم و زۆرداری، دوای قوربانیدانی گەورە لەلایەن کچان و کوڕانی ئەم نیشتمانە قەدرگرانە، ئەمڕۆ بۆ گەلی سووریای مەزن و جیهانی رادەگەیێنین؛ رژێمی بەشار ئەسەد رووخا و بەرەو دەرەوەی وڵات هەڵات، کە لە دوای خۆی کاولکاری و نەهامەتی بەجێهێشت."
ئەنجوومەنەکە ئاماژە بەوەش دەکات، "ئەمڕۆ ئێمە لەم رۆژە مێژووییەدا، رایدەگەیێنین هێزی شۆڕش و ئۆپۆزیسیۆن کاروباری سووریای ئازیزیان کەوتووەتە دەست، پابەندیی خۆمان بە بونیادنانەوەی دەوڵەتێکی ئازاد، دادپەروەر و دیموکراتی دووپات دەکەینەوە کە هەموو هاووڵاتییان تێیدا یەکسان بن بەبێ جیاوازی."
ئەنجوومەنی نیشتمانیی راگوزەری سووریا کۆمەڵێک بەڵێن بە هاووڵاتیانی سووریا دەدات و رایدەگەیێنێت:
لەبەرامبەر خوا و گەلی خۆمان ئەم بەڵێنانە دەدەین:
１. پاراستنی یەکپارچەیی خاکی سووریا و سەروەرییەکەی.
２. پاراستنی تەواوی هاووڵاتییان و ماڵ و موڵکیان، بەبێ گوێدانە ئینتیمایان
３. کارکردن بۆ دووبارە بنیاتنانەوەی دەوڵەت و دامودەزگەکانی لەسەر بنەمای ئازادی و دادپەروەری
４. کارکردن بۆ بەدیهێنانی بەرژەوەندییە نیشتمانییەکان و گەڕاندنەوەی ئاوارە و پەنابەران بۆ زێدی خۆیان بە سەربەرزی و ئارامی.
５. بەگوێرەی یاسا و دادگەری لێپرسینەوە لە سەرجەم ئەوانە دەکەین کە تاوانیان دژی گەلی سووریا ئەنجامداوە.
لە کۆتایدا ئەنجوومەنەکە داوا لە سەرجەم گەلی سووریا دەکات، "لەم قۆناخە مێژووییەدا یەکگرتوو و پاڵپشتی یەکتربن." دەشڵێت "سووریای نوێ موڵکی تەنیا کەس و لایەنێک نییە؛ بەڵکو نیشتمان بۆ هەمووانە."
دوای 13 ساڵ لە شەڕی نێوخۆ، ئەمڕۆ بەشێک لە گرووپە چەکدارەکانی ئۆپۆزسیۆن لە تەلەڤیزیۆنی فەرمیی دەوڵەتەوە، "رووخانی بەشار ئەسەد" و ئازادکردنی بەندکراوانیان لە زیندانەکانی دەسەڵاتی پێشووی وڵاتە راگەیاند.
10:02
لهۆن نەسرەدین: پێشبینی ناکەم لە شێخ مەقسوود و ئەشرەفییە شتێک رووبدات
لهۆن نەسرەدین، ئیدیتۆری دێسکی نێودەوڵەتیی رووداو دەڵێت، ئەم داڕووخانە سەربازییەی دیمەشق پێشبینی نەکراو بوو. هاوکات، باسی دوایین پێشهاتەکانی سووریا و کاریگەریی لەسە ناوچە کوردنشینەکان دەکات.
لهۆن نەسرەدین دەڵێت: "پێموایە، لەمەولا بڕیاربەدەستە سەرەکییەکان بڕیار لەسەر قۆناخی نوێ دەدەن." دەشڵێت: "لەم قۆناخە بابەتی شێخ مەقسوود و ئەشرەفییە ناجووڵێندرێت."
جۆلانی و هێزەکانی چۆن توانییان لە ماوەیەکی کەمدا دیمەشق بگرن؟ ئەی چارەنووسیان چی لێدێت؟
جۆلانی و هێزەکانی چۆن توانییان لە ماوەیەکی کەمدا دیمەشق بگرن؟ ئەی چارەنووسیان چی لێدێت؟
— Rudaw (@Rudawkurdish) December 8, 2024
لهۆن نەسرەدین، ئیدیتۆری دێسکی نێودەوڵەتیی رووداو باسی دەکات pic.twitter.com/hRT1o4eyW2
09:49
دوایین زانیاری لەبارەی رەوشی مەیدانیی دیمەشق
کەسێک لەدوای کەوتنی بەشار ئەسەد، لە گۆڕەپانی ئومەوییوونی دیمەشق سوجدەی شوکرد دەدبات. وێنە: AFP
بەگوێرەی سەرچاوە خۆجێییەکانی نێو دیمەشق کە بۆ رووداو قسەیان کردووە، هێزەکانی سوپای سووریا بەرەو تەرتووس و لازقیە پاشەکشەیان کردووە.
محەممەد ئەشقەر، رۆژنامەنووس لە دیمەشقەوە بە رووداوی راگەیاند: "دامەزراوە حکومییەکان داخراون و پارێزگارییان لێدەکرێت. گرووپە چەکدارەکان لەدوای حومس بە ئاراستەی دیمەشقەوە دێن."
هاوکات، گوتیشی کە دۆخی ئاو و کارەبا ئاساییە. لە هەندێ ناوچە کارەبا پچڕاوە، "پێشتریش هەر وا بووە."
ئەو رۆژنامەنووسە پێیوایە، پێویستە حکومەتی کاربەڕێکەر رابگەیێندرێت.
لەبارەی بڵاوبوونەوەی چەند گرتە ڤیدیۆیەک کە تێیدا دەردەکەوێت خەڵکی هەڵدەکوتنە سەر کۆشی کۆماری، ئەو رۆژنامەڤانە دەڵێت: "هەندێک خەڵک تووڕەن بەهۆی ئەو زوڵم و ستەمەی کراوە، دوای گەیشتنی هێزەکان دۆخەکە کۆنترۆڵ دەکرێت. هەموو گەڕەکەکان ئارامن. خەڵکی بۆ پاراستنی گەڕەکەکانیان لە کاری تێکدەرانە بڵاوبوونەتەوە.
هاوکات، باس لەوە دەکات، لەدوای کۆنترۆڵکردنی دیمەشق، "سەدان هەزار زیندانی ئازاد دەکرێن."
09:45
گەشتە ئاسمانییەکانی دیمەشق – هەولێر هەڵوەشێندرانەوە
رووداو
بەهۆی کەوتنی حکومەتی بەشار ئەسەد و ئاڵۆزی لەو وڵاتە، گەشتە ئاسمانییەکانی نێوان دیمەشق و هەولێر هەڵوەشێندرانەوە.
ئەحمەد هۆشیار، بەڕێوەبەری گشتیی فڕۆکەخانەی نێودەوڵەتی هەولێر ئەمڕۆ (یەكشەممە) بە تۆڕی میدیایی رووداوی گوت "گەشتەکانی نێوان دیمەشق و هەولێر هەڵوەشێندرانەوە."
بەگوێرەی ماڵپەڕی فڕۆکەخانەی نێودەوڵەتیی هەولێر، دەبووایە لە کاژێر 08:00ـی ئەمشەو (8-12-2024) فڕۆکەیەک لە فڕۆکەخانەی دیمەشقەوە بگاتە هەولێر، دوای کاژێرێکیش گەشتێک لە هەولێرەوە بەرەو دیمەشق هەبوو.
دوای 13 ساڵ لە شەڕی نێوخۆ، ئەمڕۆ بەشێک لە گرووپە چەکدارەکانی ئۆپۆزسیۆن لە تەلەڤیزیۆنی فەرمیی دەوڵەتەوە، "رووخانی بەشار ئەسەد" و ئازادکردنی بەندکراوانیان لە زیندانەکانی دەسەڵاتی پێشووی وڵاتە راگەیاند.
چەکدارانی ئۆپۆزیسیۆنی سووریا هەروەها رایانگەیاند فڕۆکەخانەی نێودەوڵەتیی دیمەشقیان کۆنترۆڵکرد.
09:31
پەیامێکی بەپەلە لە سەرۆکی دەستەی تەحریری شامەوە
رووداو
دوای راگەیاندنی ئازادکردنی دیمەشق و کۆتاییهاتنی دەسەڵاتی بەشار ئەسەد، ئەبو محەممەد جۆلانی، سەرۆکی دەستەی تەحریری شام داوا لە چەکدارەکانی دەکات "بە کڕنووشبردن و دڵنزمییەوە" بچنە نێو پایتەخت.
راگەیێندراوی جۆلانی کە ناوی راستەقینەی ئەحمەد شەرعە، دەڵێت: "برایانم شۆڕشگێڕانی ئازاد، لە بەرامبەر ئەم سەرکەوتنەی کە پێشكێشیکردن، سوپاسی خوا بکەن. بە کڕنووشبردن و دڵنزمییەوە بڕۆنە نێو دیمەشق، لەگەڵ خەڵک و کەسوکارتان نەرمونیان بن، باشترین سەرباز بن وەک چۆن پەیامبەری خوا دروودی خوای لەسەر بێت، وەسفتانی کردووە."
جۆلانی هەروەها داوایان لێدەکات دامودەزگە و موڵکی گشتی "بپارێزن و بەرگرییان لێ بکەن، چونکە ئەوانە موڵکی گەلی سووریی مەزنن و ئێوە پارەێزرەکانیانن. با پێکەوە تابلۆی سەرکەوتن بۆ گەورەترین شۆڕش کە مێژووی هاوچەرخ بەخۆیەوە بینیویەتی، تەواو بکەین."
گرووپە چەکدارەکانی ئۆپۆزیسیۆنی سووریا کە مەڵبەندی سەرەکییان پارێزگەی ئیدلب و چەند ناوچەیەکی حەلەب بوو، لە 27ی تشرینی دووەمەوە دەستیان بە هێرشێک بۆ سەر ناوچەکانی ژێر کۆنترۆڵی ئەسەد کرد. دوای کۆنترۆڵکردنی حەلەب، حەما، دەرعا، سوەیدا و قونەیترە، شەوی رابردوو رایانگەیاند چوونەتە نێو حیمس و دیمەشقەوە.
دوای 13 ساڵ لە دەستپێکردنی شەڕی نێوخۆ، ئەمڕۆ گرووپەکانی ئۆپۆزیسیۆن لە تەلەڤزیۆنی فەرمیی دەوڵەتەوە، "رووخانی بەشار ئەسەد" و ئازادکردنی بەندکراوان لە زیندانەکانی دەسەڵاتی پێشووی وڵاتەکە راگەیاند.
09:21
مەزڵووم عەبدی: رووخانی رژێمی سەرکوتکار دەرفەتە بۆ بنیاتنانی سووریای نوێ
مەزڵووم عەبدی، فەرماندەی گشتیی هێزەکانی سووریای دیموکرات
مەزڵووم عەبدی، فەرماندەی گشتیی هێزەکانی سووریای دیموکرات (هەسەدە) لە یەکەمین هەڵوێستیدا لە بارەی کۆتاییهاتنی دەسەڵاتی بەشار ئەسەد دەڵێت: "ئێمە لە سووریا بە ساتێکی مێژوویدا دەڕۆین لە کاتێکدا روخانی رژێمی سەرکوتکار لە دیمەشق دەبینین."
فەرماندە کوردەکە دەشڵێت: "ئەم گۆڕانە دەرفەتە بۆ بنیاتنانی سووریای نوێ لەسەر بنەمای دیموکراسی و دادپەروەری بۆ زامنکردنی مافی هەموو سوورییەکان."
09:05
باڵیۆزخانەی سووریا لە قەتەر: سووریا ئازادکرا
رووداو
باڵیۆزخانەی سووریا لە قەتەر بە فەرمی "ئازادکردنی سووریا" و "رووخان"ی دەسەڵاتی بەشار ئەسەد رادەگەیێنێت.
لە راگەیێندراوێکدا بە ناونیشانی "راگەیێندراوی ئازادکردنی سووریا" کە ئاڵای ئۆپۆزسیۆنی سووریای لەسەرە، بالیۆزخانەکە دەڵێت: "بە پشتیوانیی خودا، مژدەی هەڵاتنی خۆری ئازادی و ئازادکردنی سووریا لە چنگی زۆرداری و هەڵدانەوەی لاپەڕەیەکی نوێ لە پەرتووکی شکۆمەندی و مێژوو، بە ئێوە رادەگەیێنین."
باڵیۆزخانەکە دەشڵێت: "رۆڵەکانی گەلەکەمان بۆ ماوەی چەندین دەیە بەرەنگاری ستەمی دەستەیەکی زۆردار بوونەوە کە دەستی لە پیسترین تاوان و شکاندنی شکۆی مرۆڤ و لەنێوبردنی تواناکانی وڵات نەپاراست. بەڵام گەلی سووریا لە یەکەم رۆژی شۆڕشەوە قسەی خۆی کرد و لەسەر رێچکەی ئازاکردنی خاک و مرۆڤ بەردەوام بوو."
گرووپە چەکدارەکانی ئۆپۆزسیۆنی سووریا کە مەڵبەندی سەرەکییان پارێزگەی ئیدلب و چەند ناوچەیەکی حەلەب بوو، لە 27ی تشرینی دووەمەوە دەستیان بە هێرشێک بۆ سەر ناوچەکانی ژێر کۆنترۆڵی حکومەتەکەی بەشار ئەسەد کرد. دوای کۆنترۆڵکردنی حەلەب، حەما، دەرعا، سوەیدا و قونەیترە، بەرەبەیانی ئەمڕۆ رایانگەیاند چوونەتە نێو حمس و دیمەشقەوە.
دوای 13 ساڵ لە دەستپێکردنی شەڕی نێوخۆ، ئەمڕۆ گرووپەکانی ئۆپۆزسیۆن لە تەلەڤزیۆنی فەرمیی دەوڵەتەوە، "رووخانی بەشار ئەسەد" و ئازادکردنی بەندکراوان لە زیندانەکانی دەسەڵاتی پێشووی وڵاتە راگەیاند.
باڵیۆزخانەی سووریا لە قەتەر دەڵێت: "لەم رۆژە مێژووییەدا، رێز لە گیانی شەهیدە ئازادەکانمان دەگرین. سوپاسی خودا دەکەین کە رۆڵەکانمان لە گرتووخانەکان ئازادکران. پەیمان دەدەین کە قوربانیدانیان بەرپرسیارێتییەک بێت لە ئەستۆی ئێمەدا. هەروەها پەیام ئاراستەی هەموو رۆڵەکانی گەلی سووریامان دەکەین کە رێگەی بەردەممان دوور و درێژ و سەختە. پێویستە دەست لەنێو دەست و شان بە شانی یەکدی، بەرپرسیارێتیی گەڕاندنەوەی وڵاتمان و بنیاتنانی داهاتوویەک کە شایەنی ئەم وڵاتە مەزنە بێت، لە ئەستۆ بگرین."
08:52
راگەیێندراوی بەڕێوەبەرایەتیی خۆسەر لەبارەی کەوتنی دیمەشق
رووداو
لەدوای ئەوەی گرووپە چەکدارەکان کەوتنی دیمەشقیان راگەیاند، بەڕێوەبەرایەتیی خۆسەر لە رۆژئاوای کوردستان باری نائاسایی لە تەواوی سنوورەکەی راگەیاند.
بەڕێوەبەرایەتییەکە لە راگەیێندراوێکدا بۆ رای گشتی دەڵێت: "بەهۆی تێکچوونی رەوشی ئەمنیی سووریا بە گشتی، ئێمە لە بەڕێوەبەرایەتیی خۆسەری دیموکراتی باکوور و رۆژهەڵاتی سووریا داوا لە کوڕ و کچانی گەلەکەمان و هێزەکانی ئاسایشی ناوخۆ و هێزەکانی پاراستنی گەل و سەرجەم دامودەزگە و حیزبەکان و رێکخراوەکان دەکەین باری ئامادەیی بۆ بەرزترین ئاست بەرز بکەنەوە."
08:39
ژووری ئۆپەراسیۆنەکانی دیمەشق: دیمەشق ئازادکرا
رووداو
گرووپەکانی ئۆپۆزسیۆن لە تەلەڤزیۆنی فەرمیی سووریاوە کۆتاییهاتنی دەسەڵاتی بەشار ئەسەدیان راگەیاند.
ژمارەیەک کەس بە جلی سڤیلەوە لە ژێر ناونیشیانی "ژووری ئۆپەراسیۆنەکانی ئازادکردنی دیمەشق" لە تەلەڤزیۆنی فەرمییەوە رایانگەیاند: "بە پشتیوانیی خوا، دیمەشق ئازادکرا. بەشار ئەسەدی ستەمکار رووخێنرا."
راگەیێندراوەکە هەروەها دەڵێت: "هەموو بەندکراوە ستەملێکراوەکان لە زیندانەکانی رژێم ئازادکران."
"ژووری ئۆپەراسیۆنەکانی ئازادکردنی دیمەشق" هەروەها داوای "پاراستنی دامودەزگەکان و موڵکی گشتی"یان کرد.
08:22
کۆشکی سپی: لە نزیکەوە چاودێری رووداوە نائاساییەکانی سووریا دەکەین
لە حومس تەقەی خۆشی دەکرێت. وێنە: AFP
رووداو دیجیتاڵ
گوتەبێژی ئەنجوومەنی ئاسایشی نیشتمانیی ئەمریکا رایگەیاند بایدن و تیمەکەی لە نزیکەوە چاودێریی رووداوە نائاساییەکانی سووریا دەکەن و ئاماژەش بەوە دەکەن لەو بارەیەوە، بەردەوام لەگەڵ هاوبەشەکانیان لە ناوچەکە لەسەر هێڵن.
رۆژی یەکشەممە، 8ی کانوونی یەکەمی 2024، شۆن ساڤێت، گوتەبێژی ئەنجوومەنی ئاسایشی ئەمریکا لە بەیاننامەیەکدا، رایگەیاند لە کۆشکی سپییەوە، جۆ بایدنی سەرۆکی ئەمریکا و تیمەکەی لە نزیکەوە، چاودێری رووداوەکانی نێوخۆی سووریا دەکەن و لەگەڵ هاوبەشەکانیشیان بەردەوامن لەسەر هێڵن بۆ ئاگاداری لە دوایین دۆخی ئەو وڵاتە.
ئەو راگەیێندراوەی کۆشکی سپی لەکاتێکدایە کە دەستەی تەحریر شام کۆنترۆڵکردنی دیمەشقی پایتەختی راگەیاند و ئەفسەرانی باڵای سوپای سووریاش رایانگەیاندووە کە وا بەشار ئەسەد بە فڕۆکە دیمەشقی پایتەختی بۆ شوێنێکی نادیار بەجێهێشتووە.
هەروەها ئەبوو محەممەد جۆلانی، سەرۆکی دەستەی تەحریری شام، لە راگەیێندراوێکدا گوتی، سەردەمێکی نوێی سووریا دەستیپێکردووە و "سەردەمێک کە هەموو سووریایەک تێیدا ئازاد و یەکسانە."
جۆلانی بڕیاریشدا، سەرجەم کاری حکومەت و دەوڵەت لەژێر دەسەڵاتی محەممەد جەلالی، سەرۆکوەزیرانی سووریا دەبێت، تاوەکو قۆناخی دەستاودەستکردنی دەسەڵات.
لەپێش بەیاننامەکەی سەرۆکی دەستەی تەحریر شامیش، محەممەد جەلالی، سەرۆکوەزیرانی سووریا لە پەیامێکی ڤیدیۆییدا، رایگەیاند ئەوان ئامادەن کار لەگەڵ هەر کەسێک و لایەنێکدا بکەن کە گەلی سووریا هەڵیدەبژێرێت و داواشی لە لایەنەکانی ئۆپۆزیسیۆن کرد پێکەوە بۆ بنیاتنانی قۆناخی داهاتوو کار بکەن.
هەروەها جەلالی داواشی لە هەموو لایەک کرد بە ژیرانە مامەڵە لەگەڵ ئەو دۆخە نوێیەی لە سووریا هاتووەتە ئاراوە، بکەن و داواشی کرد "هەمووان بەرپرسیارن لە پاراستنی ماڵ و موڵکی حکومی و گشتی سووریا."
07:20
هەتەشە: گەلی ئازادی سووریا رژێمی بەشار ئەسەدیان رووخاند
رووداو
چەند ئەفسەرێکی باڵای سوپای سووریا رایانگەیاند، بەشار ئەسەدی سەرۆکی سووریا، بە فڕۆکە دیمەشقی پایتەختی سووریای جێهێشتووە و بەرەو شوێنێکی نادیار رۆیشتووە، ئەمەش لەگەڵ نزیکبوونەوەی چەکدارانی دەستەی تەحریر شام (هەتەشە) لە کۆنترۆڵکردنی ناوەندی شاری دیمەشق.
ئەمڕۆ (یەکشەممە، 08ـی کانوونی یەکەمی 2024) دەستەی تەحریری شام و هێزەکانی دیکەی ئۆپۆزیسیۆنی سووریا رایانگەیاند: "گەلی ئازادی سووریا رژێمی بەشارئەسەدیان رووخاند." هاوکات، ئاژانسی رۆیتەرز بڵاویکردەوە ژمارەیەک ئەفسەری باڵای سوپای سووریا پێیانڕاگەیاندووە ئەسەد بە فڕۆکە دیمەشقی جێهێشتووە، هیچ هێزێکی سوپاش لە دیمەشقی پایتەختدا بڵاوەیپێنەکراوە.
بەگوێرەی هەمان سەرچاوە؛ چەکدارانی دەستەی تەحریر شام نزیکبوونەتەوە لە ناوەندی دیمەشق، ئەمە جگە لە کۆنترۆڵکردنی فڕۆکەخانەی نێودەوڵەتی دیمەشق.
لەگەڵ نزیکبوونەوەی چەکدارانیش لە شاری دیمەشق، خەڵکی شارەکە رژانە سەر شەقامەکانی و دەستیان بە ئاهەنگگێڕان و گوتنەوەی درووشمی "ئازادی، ئازادی" کردووە.
هەتەشە بەرەبەیانیی ئەمڕۆ لە راگەیێندراوێکدا کۆنترۆڵکردنی گرتووخانەی سێدنایای راگەیاند، کە یەکێکە لە گەورەترین گرتووخانەکانی سووریا و کەوتووەتە دەروازەی دیمەشق، لەگەڵ کۆنترۆڵکردنی گرتووخانەکەش، سەرجەم زیندانییەکانیان ئازاد کرد و رایگەیاند "ئێمەش لەگەڵ گەلی سووریا ئاهەنگ دەگێڕین."
چەکدارانی تەحریر شام هەروەها کۆنترۆڵکردنی باڵەخانەی راگەیاندنی فەرمی حکومەتی سووریایان راگەیاند، رۆیتەرز دەڵێ پاش کەمێکی دیکە هەر لە کەناڵی فەرمیی سووریاوە یەکەم پەیام بۆ گەلی سووریا بڵاودەکەنەوە.
ئەم رووداوانە لەدوای چەند کاژێرێک دێن لە راگەیاندنی کۆنترۆڵکردنی تەواوی شاری حومس لەلایەن گرووپە چەکدارەکانەوە.
لەدوای گەیشتنی چەکدارانی تەحریر شام بۆ نێو شاری دیمەشق، ئەبو محەممەد جۆلانی، سەرۆکی دەستەی تەحریر شام لە راگەیێندراوێکدا داوای لە سەرجەم چەکدارانی کرد، باڵەخانە حکومی و دامودەزگە گشتییەکان بپارێزن، داواشی لە سوپای سووریا کرد بەهیچ شێوەیەک لەنزیک باڵەخانە حکومییەکان نەمێنن.
جۆلانی ئاماژەی بەوەش کرد؛ تاوەکو قۆناخی دەستاودەستکردنی دەسەڵات، محەممەد غازی جەلالی، سەرۆکوەزیرانی سووریا، هەر لەسەر کارەکەی دەمێنێتەوە و کارەکان رایی دەکات.
15:13
حکومڕانیی 53 ساڵەی بنەماڵەی ئەسەد کۆتایی هات؛ سەردەمێکی نوێ چاوەڕێی سووریایە
.
رووداو دیجیتاڵ
بەرەبەیانی ئەمڕۆ دەستەی تەحریری شام و هێزەکانی دیکەی دژبەری حکومەتی بەشار ئەسەد چوونە نێو دیمەشقی پایتەختی سووریا و کەوتنی حکومەتەکەی بەشار ئەسەدیان راگەیاند.
ئەمە لەکاتێکدایە نزیکەی 14 ساڵە شەڕی نێوخۆ لە وڵاتەکە سەریهەڵداوە.
بەشار ئەسەد، لە ساڵی 2000ـەوە سەرۆکایەتیی سووریای گرتبووە دەست و بۆ ماوەی 24 ساڵ حکومڕانیی وڵاتەکەی کرد. تائێستا چارەنووسی دیار نییە.
گرووپەکانی ئۆپۆزیسیۆن دەڵێن، بەرەبەیانی ئەمڕۆ بە فڕۆکەیەک دیمەشقی جێهێشتووە. وۆڵ ستریت جۆرناڵی ئەمریکیش دەڵێت، هەفتەیەک لەمەوبەر خێزانەکەی بە فڕۆکەیەکی تایبەت رەوانەی رووسیا کردووە.