رووداو دیجیتاڵ
ئاسایشی نێوخۆی حەلەب سەر بە بەڕێوەبەرایەتیی خۆسەر دەڵێت، گرووپەکانی سەر بە حکومەتی دیمەشق بە "تانک، تۆپ و کاتیۆشا" هێرشێکی بەرفراوانیان کردووەتە سەر سێ گەڕەکی شارەکە کە زیاتر لە 600 هەزار سڤیلی تێدایە و لە ئەنجامدا 3 هاووڵاتی گیانیان لەدەستداوە و 26ی دیکەش بریندارن، کە منداڵی دوو ساڵانیان تێدایە.
رۆژی سێشەممە 06-01-2026 هێزەکانی ئاسایشی نێوخۆ لە حەلەب (سەر بە بەڕێوەبەرایەتیی خۆسەر)، لە راگەیێندراوێکدا بڵاویکردەوە، "گرووپەکانی سەر بە حکومەتی دیمەشق بە هەموو جۆرە چەکێکی قورس (تانک، تۆپی قورس، مووشەکهاوێژی گراد و کاتیۆشا، هاوەن و دۆشکە) هێرشیان کردووەتە سەر گەڕەکەکانی شێخ مەقسوود، ئەشرەفییە و بەنی زەید."
ئاسایش دەڵێ، مووشەک و تۆپبارانەکە بەشێوەیەکی تووند زۆربەی ناوچەکانی گرتووەتەوە، بەتایبەت ناوچەکانی (مزگەوتی حەسەن، مزگەوتی گەورەی شێخ مەقسوود، شەقامی 15، شەقامی 20، گۆڕەپانی شەهیدان، شەقیف، گەڕەکی مەعرووف). دەیان خانوو و باڵەخانە زیانی گەورەیان بەرکەوتووە.
بەگوێرەی ئاماری ئاسایش، سێ هاووڵاتی گیانیان لەدەستداوە کە ناو و تەمەنیان بەم شێوەیە:
- فاتیمە حەمادە (41 ساڵ)
- مەسعود فایەق عەبدۆ (30 ساڵ)
- جۆرج خەوام (42 ساڵ)
هەروەها 26 هاووڵاتی بریندار بوون، کە ناو و تەمەنیان بەم شێوەیە:
- ئیڤان عەبدۆ (2 ساڵ)
- شام دلۆ (3 ساڵ)
- شەریف سیدۆ (52 ساڵ)
- محەممەد حەبیب (82 ساڵ)
- ئەسڵان بەکر (18 ساڵ)
- عەلی ئەسڵان موسلیم بیلال (17 ساڵ)
- شێروان عەبدۆ مامۆ (17 ساڵ)
- حەسەن محەممەد عید قورتان (30 ساڵ)
- محەممەد شێخ کیلۆ (70 ساڵ)
- رەمزی کیلۆ (18 ساڵ)
- محەممەد حسێن بەکر (23 ساڵ)
- خەدیجە عەلووش (47 ساڵ)
- شێرۆ محەممەد حسێن (44 ساڵ)
- محەممەد نوور شوبەک (26 ساڵ)
- محەممەد ئیبیش (21 ساڵ)
- حەمید حەبەش (74 ساڵ)
- ئیبراهیم محەممەد ڕەشید (34 ساڵ)
- هێڤین عومەر (29 ساڵ)
- دیمە ئەلحسێن (85 ساڵ)
- مستەفا عەبدولحەمید حەسەن (38 ساڵ)
- ئەرسەلان عەلۆ (75 ساڵ)
- رەفعەت محەممەد عەلۆ (64 ساڵ)
- مەسعود عەلی کەرکۆ (18 ساڵ)
- عەبدولعەزیز داود (24 ساڵ)
- رەجەب عەبدولفەتاح (13 ساڵ)
- نووری خەلیل (29 ساڵ)
ئاسایشی حەلەب رایگەیاندووە، لە چوارچێوەی "مافی بەرگریی رەوا،" بەرگرییان لە گەڕەکەکان کردووە و "سەرجەم هێرشەکانیان تێکشکاندووە و پێنج هەوڵی دزەکردنیشیان پووچەڵکردووەتەوە، لە ئەنجامدا ژمارەیەک کوژراو و بریندار لە ریزەکانی هێرشکاران کەوتوونەتەوە."
ئاماژەی بەوەش کردووە، بۆ دوو کاژێر ئارامییەک هەبووە، بەڵام دواتر بۆردوومانی چڕ دەستیپێکردووەتەوە.
خوێن و ئاگر لە حەلەب
لە بەیانیی رۆژی سێشەممەوە (06-01-2026) شاری حەلەب بووەتە گۆڕەپانی پێکدادانێکی قورس و تۆپباران لەنێوان هێزەکانی سەر بە بەڕێوەبەرایەتیی خۆسەر (هەسەدە و ئاسایش) و هێزەکانی حکومەتی دیمەشق (سوپای سووریا).
وەزارەتی بەرگریی سووریا لە راگەیێندراوێکدا "هەسەدە"ی بە زیادبوونی گرژییەکان و هێرشکردن تۆمەتبار کرد و رایگەیاند، لە ریزەکانی سوپادا سەربازێک کوژراوە و 5ی دیکە بریندارن.
بەگوێرەی وەزارەتەکە، لە ئەنجامی تۆپبارانی هەسەدە بۆ سەر گەڕەکەکانی ژێر دەسەڵاتی حکومەت (وەک مەیدان)، 3 سڤیل کوژراون و 12ـی دیکە بریندارن.
سوپاکە رایگەیاندووە لە وەڵامدا کۆگەیەکی چەک و پێگەی درۆنەکانی هەسەدەی وێران کردووە.
هەسەدە و ئاسایش بە تووندی رەتیدەکەنەوە دەستپێشخەری شەڕ بووبن و دەڵێن، حکومەت چەکی قورسی هێناوەتە نێو شار.
بەڕێوەبەرایەتیی خۆسەر گەمارۆ و هێرشەکانی سەر شێخ مەقسوودی بە "هەوڵێکی مەترسیدار بۆ تێکدانی یەکپارچەیی سووریا" ناوبرد.
فەرهاد شامی، بەرپرسی راگەیاندنی هەسەدە ڤیدیۆیەکی بڵاوکردەوە دەڵێ، حکومەتی سووریا "تانک دەهێنێتە ناوچەکە."
.jpg&w=3840&q=75)
