رووداو دیجیتاڵ
حکومەتی سووریا بۆ یەکەمجار یاداشتی لێکتێگەیشتنی بۆ وەبەرهێنان لە کێڵگە نەوت و گازەکانی نێو سنوورە دەریاییەکەی لەگەڵ دوو کۆمپانیای ئەمریکی و قەتەری واژۆ کرد.
رێوڕەسمی واژۆکردنەکە ئەمڕۆ چوارشەممە 4ـی شوباتی 2026 لە دیمەشق بەڕێوەچوو؛ یاداشتەکە لە نێوان کۆمپانیای پترۆڵی سووریا و هەردوو کۆمپانیای شیفرۆنی (Chevron)ـی ئەمریکی و پاوەر ئینتەرناشناڵی (Power International)ـی قەتەری واژۆ کرا.
بەگوێرەی میدیای فەرمیی سووریا، ئامانجی یاداشتەکە دەرهێنانی نەوت و گازە لە ئاوی هەرێمیی سووریا لە رۆژهەڵاتی دەریای ناوەڕاست و یەکەمجارە هەنگاوێکی لەو جۆرە دەنرێت.
یوسف قەبڵاوی، بەڕێوەبەری جێبەجێکاری کۆمپانیای پترۆڵی سووریا رایگەیاند، ئەو یاداشتی لێکتێگەیشتنە رۆڵ دەبینێت لە بەهێزکردنی ئابووریی وڵاتەکە،
گوتیشی، تیمێکی کاریان دیاریکردووە بۆ پاڵپشتیی لێکتێگەیشتنەکە تاوەکو بکرێتە "گرێبەستی کردەیی."
لە مەراسیمی واژۆکردنی یاداشتی لێکتێگەیشتنەکەدا، تۆم باراک، نوێنەری ئەمریکا بۆ سووریا و لوبنان و باڵیۆزی قەتەر لە سووریا و نوێنەری کۆمپانیاکان ئامادە بوون.
بەگوێرەی ئاماری دامەزراوەی گشتیی نەوت لە سووریا، یەدەگی گازی ئەو وڵاتە بە 678 ملیار مەتر سێجا و یەدەگی نەوت بە 27 ملیار بەرمیل مەزەندە کراوە.
