عەبدولڕەحمان جەزائیری، فەرماندەی حەشدی شەعبی لە وەزارەتی بەرگریی عێراق و هێزێکی حەشدی شەعبی
رووداو دیجیتاڵ
فەرماندەیەکی هێزەکانی حەشد لە وەزارەتی بەرگریی عێراق دەڵێت، عێراق ئێستا بەشێکە لە شەڕەکە و لە چەند رۆژی داهاتوودا هێرش دەکرێتە سەر هێزەکانیان.
حەسەن نەسروڵڵا، ئەمینداری گشتیی حیزبوڵڵا ئێوارەی رۆژی هەینی (27-09-2024) بە هێرشێکی ئاسمانیی ئیسرائیل لە باشووری بەیرووت کوژرا، کە ئەوەش مەترسیی فراوانبوونی جەنگی لە رۆژهەڵاتی نێوەڕاست زیاتر کردووە.
عەبدولڕەحمان جەزائیری، فەرماندەی حەشد لە وەزارەتی بەرگریی عێراق، رۆژی یەکشەممە 29-09-2024، لەکاتی بەشداریکردنی لە گەشتی هەواڵەکانی نیوڕۆژی تۆڕی میدیایی رووداو سەبارەت بە هەڵوێستی عێراق بەرامبەر رووداوەکانی لوبنان گوتی، "راگەیێندراوی حکومەتی عێراق سیاسی بووە و ئاماژەدان بووە بە رووداوەکە. راگەیێندراوی مەرجەعیەت و سەرکردە سیاسییەکانی عێراقیش گەیاندنی خۆراک بووە بۆ لوبنان و حکومەتی لوبنان، بۆیە راگەیێندراوەکان هەموو سیاسین."
وەک جەزائیری باسی دەکات، جگە لە راگەیێندراوی "مقاوەمەی ئیسلامی" کە لە یەکەم رۆژی هێرشی ئیسرائیل بۆ سەر غەززە رایگەیاندووە، بەشدارە وەکو هێزێکی سەربازی پشتیوانی هێزەکان لە سووریا و لوبنان فەڵەستین.
عەبدولڕەحمان جەزائیری، بە دووری نازانێت دوای حیزبوڵڵا، حەشدی شەعبی بکرێتە ئامانج و گوتی، "زانیاریی پێشوەخت و هەواڵگری هەیە، بۆ یەکەمجارە بۆ کەناڵە بەڕێزەکەتان باسی دەکەم چەند کاژێرێک لەمەوبەر زانیاری هاتووە، هێزەکانی ئەمریکا هێرش دەکەنە سەر چەند شوێنێکی ستراتیژی، رەنگە سەرکردەکانی حەشدی شەعبی، یان هەندێک شوێن بێت لە پارێزگای بەسرە، ژێرخان، تەنانەت ئەگەری هەیە هێرش بکرێتە سەر پاڵاوگەی دۆرە، کە سووتەمەنی بۆ بەغدا و پارێزگاکانی دیکە دابین دەکات."
هەروەها گوتی، "هەڕەشەی هێرشکردن هەیە، ئەمە پەیامی ئەمریکا و قەوارەی زایۆنییە، 48 کاژێر لەمەوبەر مەشق و راهێنان کراوە لە بنکەی عەین ئەسەد لە ئەنبار و بنکەی هەریر لە پارێزگای هەولێر لە هەرێمی کوردستان. هەوڵ بۆ فراوانکردنی جەنگەکە هەیە."
فەرماندەکەی حەشد دەڵێت، هاوکێشەی سەربازی جیاوازە، ئیسرائیل تەکنەلۆژیایەکی یەکجار بەرزی هەیە، نە حکومەتی عێراق و نە مقاوەمەی ئیسلامی لە عێراق ئەو تەکنەلۆژیا پێشکەوتووەیان نییە.
سەرۆکوەزیرانی لوبنان ئەمڕۆ گوتی، نزیکەی یەک ملیۆن کەس لە خەڵکی وڵاتەکەی ئاوارە بوون؛ دەکرێت ژمارەیەک لە خەڵکی ئەو وڵاتە رووبکەنە عێراق.
بە گوتەی عەبدولڕەحمان جەزائیری، "رێنوێنی دراوەتە فەرماندەکانی حەشدی شەعبی و هێزە سەربازییەکان لە وەزارەتی بەرگری و دژە تیرۆر کە هۆشدار و بەئاگابن. ئاڵۆزکردنی دۆخەکە هەیە لە پارێزگاکانی واست و بەسرە. لە بەغدا جموجۆڵ هەبووە بۆ هەڵکوتانەسەر باڵیۆزخانەی ئەمریکا. هەموو ئەمانە ئاماژە بەوە دەدات کە ئیدارە و بنکەکانی ئەمریکا جووڵە دەکەن، هەندێک پەیام بدەن و بۆردوومانی سنووردار بکەن، رەنگە لەسەر هێڵی سنوور بێت. مقاوەمە و حەشدی شەعبی تێوەبگلێندرێن و بازنەی شەڕ فراوانتر بکرێت."
جەزائیری دەشڵێت، "ئەمڕۆ عێراق بەشێکە لە شەڕەکە، عێراق لە شەڕەکە دوور نییە وەکو ئەوەی زۆربەی سیاسییەکان پێشبینیی دەکەن. عێراق بەشێکی یەکلاکەرەوەی شەڕە. حکومەتی عێراق رای ئەوەیە لە بواری سەربازی بەشداری نەکات؛ بەڵام ئەمڕۆ مقاوەمە راگەیێندراوی هەڕەشە ئامێز دەردەکات. ناوچەی سنووری لە ژێر هەڕەشەیە، ئەوەش بەگوێرەی ئەو زانیارییەی گەیشتووەتە دەست فەرماندەکانی حەشد و فەرماندەکانی ناوچەکە."
سەبارەت بەو هێزانەی ئەگەری هەیە بکرێنە ئامانجی هێرشەکان، جەزائیری گوتی، "ئیسرائیل دەزانێت بازنەیەکی پەیوەندی و گەیاندن هەیە لەنێوان ئێران، عێراق، سووریا و لوبنان. رەنگە هەندێک گرووپی چەکداری بۆردوومان بکرێن، وەکو نوجەبا، کەتائیبی حزبوڵڵا و عەسائیب، کە بەشێکن لە مقاوەمەی ئیسلامی."
فەرماندەکەی حەشد پێیوایە، "ئەمریکا هەندێک شوێنی گرنگی حەشدی شەعبی بۆردوومان دەکات. پێشتریش ئەو بۆردوومانەی کردووە. بەدوور نازانرێت لە رۆژانی داهاتوودا هەندێک شوێنی حەشدی شەعبی بکرێتە ئامانج. ئیسرائیل دەیەوێت عێراق و ئێران بخزێنێتە نێو شەڕەکە."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ