هەوڵەکانی بە هەرێمکردنی بەسرە چڕ دەکرێنەوە

رۆژی سێشەممە 23-12-2025، ئوسامە عەبد رەزاق ئەلسەعد، جێگری سەرۆکی ئەنجوومەنی پارێزگای بەسرە، بە واژۆی ژمارەیەک لە ئەندامانی ئەنجوومەن، نووسراوێکی فەرمیی ئاراستەی سەرۆکی ئەنجوومەن کردووە بۆ ئەوەی پرسی "هەرێمی بەسرە" بخاتە بەر باس.

لە نووسراوەکەدا کە وێنەیەکی دەست تۆڕی میدیایی رووداو کەوتووە، داوا لە سەرۆکی ئەنجوومەنی پارێزگای بەسرە کراوە رەزامەندی بدات لەسەر گفتوگۆکردن و دەنگدان لەسەر پێشنیازی بە هەرێمکردنی بەسرە. هەروەها داوا کراوە سەرۆکوەزیران ئاگادار بکرێتەوە تاوەکو رێکارەکان رەوانەی کۆمیسیۆن بکات و بەشی یاسایی ئەنجوومەنیش راسپێردرێت بەدواداچوون بۆ دۆسیەکە بکەن.

ئوسامە ئەلسەعد بە تۆڕی میدیایی رووداوی راگەیاند، پەنابردن بۆ ئەم هەنگاوە دوای بێئومێدبوونیان دێت لە حکومەتی ناوەندی، چونکە بەسرە 90%ـی بودجەی عێراق دابین دەکات، بەڵام شایستە داراییەکانی پێنەدراوە.

جێگری سەرۆکی ئەنجوومەنی پارێزگای بەسرە ئاماری خەرجکردنی بودجەی بۆ پارێزگاکەی خستەڕوو و رایگەیاند، ساڵی  2023 تەنیا 48%ـی تەرخانکراوەکانی وەرگرتووە، پار 38٪ و ئەم ساڵ 0% بووە.

ئەلسەعد گوتی: "ئێمە لەسەروبەندی ساڵی 2026ـداین و بۆ بەسرە تەنیا پیسبوونی ژینگە و سوێریی ئاو ماوەتەوە، بۆیە دەبێت داوای هەرێم بکەین."

بەپێی زانیارییەکان، فراکسیۆنی "تەسمیم" بە سەرۆکایەتیی ئەسعەد عیدانی، پارێزگاری بەسرە سەرکردایەتیی ئەم هەوڵە دەکات.

هاوکات شاکر مەحموود (ئەبو توراب تەمیمی)، سەرکردە لە رێکخراوی بەدر و براوەی هەڵبژاردنی پەرلەمانی 2025، پشتیوانیی خۆی بۆ پڕۆژەکە راگەیاند و گوتی: "ئەمە مافێکی شەرعی و دەستوورییە و هانی خەڵک دەدەین دەنگ بۆ پێکهێنانی هەرێم بدەن."

سارە حوسێنی، ئەندامی ئەنجوومەنی پارێزگای بەسرە جەختی کردەوە کە ئەمە "موزایەدەی سیاسی نییە، بەڵکو شایستەیەکی دەستوورییە."

حەیدەر محەممەد، بەڕێوەبەری نووسینگەی کۆمیسیۆنی هەڵبژاردنەکان لە بەسرە، ئەمڕۆ چوارشەممە 24-12-2025 بە تۆڕی میدیای رووداوی راگەیاند، کۆمیسیۆن چاوەڕێی بڕیاری ئەنجوومەنی پارێزگا و ئەنجوومەنی وەزیران دەکات بۆ دەستپێکردنی رێکارەکان.

یەکەم: داواکاریی سێیەکی (1/3) ئەندامانی ئەنجوومەنی پارێزگا.

دووەم: داواکاریی 10%ـی دەنگدەرانی پارێزگاکە.

بەپێی ماددەی 4ـی یاسای پێکهێنانی هەرێمەکان، ئەگەر رێگەی دووەم بگیرێتەبەر، دەبێت سەرەتا 2%ـی دەنگدەران داواکارییەکە پێشکێش بکەن، پاشان کۆمیسیۆن بۆ ماوەی مانگێک "تۆماری خواستەکان" دەکاتەوە، تاوەکو رێژەکە دەگاتە 10% و دواتر قۆناخی راپرسیی گشتی دەستپێدەکات.

بەسرە، کە بە شادەماریی ئابووریی عێراق دادەنرێت، ئێستا لەبەردەم دووڕیانێکدایە؛ لایەنێک هەرێم وەکو رزگارکەر لە پەراوێزخستنی دارایی دەبینێت و لایەنێکی دیکەش نیگەرانە لەوەی ئەم هەنگاوە ببێتە هۆی دابەشبوونی زیاتری سیاسی و جوگرافی لە عێراقدا.