رووداو دیجیتاڵ
سێ رۆژ دیاریکراوە بۆ ئەوەی حیزب و بەربژێرەکان بتوانن تانە لە ئەنجامی کۆتایی هەڵبژاردنی پەرلەمانی عێراق بدەن و دەستەی دادوەریی هەڵبژاردن تانەکان یەکلایی دەکاتەوە.
سێشەممە 18ی تشرینی دووەمی 2025، عیماد جەمیل، سەرۆکی تیمی رۆژنامەڤانی کۆمیسیۆنی باڵای سەربەخۆی هەڵبژاردنەکانی عێراق بە تۆڕی میدیایی رووداوی گوت: "لە ئەمڕۆوە تاوەکو سێ رۆژی دیکە کە پێنجشەممە دوا رۆژ دەبێت، پارت و هاوپەیمانێتى و بەربژێرەکان دەتوانن تانەکانیان لەبارەی ئەنجامی کۆتایی هەڵبژاردن رادەستی کۆمیسیۆن بکەن."
ئەنجامی کۆتایی هەڵبژاردنی پەرلەمانی عێراق لە 17ی تشرینی دووەمی 2025 راگەیێنرا، تانەدان لە ئەنجامەکان قۆناخی بەر لە پەسندکردنی کۆتایییە لەلایەن دادگەی باڵای فیدراڵییەوە.
عیماد جەمیل رایگەیاند: "بەگوێرەی یاسا، دوای رادەستکردنی کۆتایی تانە، هەفتەیەک لە بەردەم کۆمیسیۆنە بۆ ئامادەکردنی راسپاردە لەبارەیەوە تاوەکو دواتر بێنێردرێت بۆ دەستەی دادوەریی هەڵبژاردن بۆ یەکلاییکردنەوە و ئەو دەستەیەش ماوەی 10 رۆژی لە بەردەم دەبێت بۆ یەکلاییکردنەوەی تانەکان بەر لەوەی ئەنجامی کۆتایی رەوانەی دادگەی باڵای فیدراڵی بکرێت بۆ پەسەندکردن."
بەوپێیە بەلایەنی زۆر هەفتەی یەکەمی مانگی کانوونی یەکەمی 2025 تانەکانی تایبەت بە ئەنجامی کۆتایی هەڵبژاردن یەکلا دەکرێنەوە.
یەکەم کۆبوونەوەی خولی نوێی پەرلەمان لەدوای پەسندکردنی ئەنجامی کۆتایی دەبێت لەلایەن دادگەی باڵای فیدراڵیی عێراقەوە.
