رووداو دیجیتاڵ
بۆ هەڵبژاردنی خولی شەشەمی پەرلەمانی عێراق، زیاتر لە 235 هەزار کەس وەکو کارمەندی سەر سندووقەکانی دەنگدان لە هەرێمی کوردستان و عێراق دیاریکران، 5٪یان دەبنە یەدەگ.
رۆژی دووشەممە، 13ـی تشرینی یەکەمی 2025، نەبەرد عومەر، سەرۆکی دەستەی هەڵبژاردنەکانی هەرێمی کوردستان لە کۆمیسیۆنی هەڵبژاردنەکانی عێراق، بە تۆڕی میدیایی رووداوی رایگەیاند: "لە هەرێمی کوردستان 122 هەزار کەس داواکارییان پێشکێش کردبوو، بەڵام نزیکەی 34 هەزار کەس پێویست بوون و ناویان لە تیروپشک دەرچوو، بەسەر هەرسێ پارێزگای هەولێر، سلێمانی و دهۆک دابەشبوون".
ئێستا ئەو کارمەندانەی ناویان دەرچووە، لە مەشقدان لەسەر دەنگدانی ئەلیکترۆنی و جیاکردنەوە و ژماردنی دەنگەکان، بە سێ قۆناخ مەشقیان پێدەکرێت، هەر قۆناخێک چوار رۆژ دەخایەنێت".
ئەو کارمەندانە رۆژانی دەنگدانی تایبەت و گشتی لە زیاتر لە 39 هەزار وێستگە سەرپەرشتیی دەنگدان دەکەن، سەرۆکی دەستەی هەڵبژاردنەکانی هەرێمی کوردستان لە کۆمیسیۆنی هەڵبژاردنەکانی عێراق دەڵێت: "لەو ژمارەیەی ناویان دەرچووە 5٪یان وەکو یەدەگ دەستنیشان دەکرێن، بەڵام پێش دەستپێکردنی هەڵبژاردن و لە کاتی تەواوبوونی مەشقەکانیان".
لەبارەی مووچەی کارمەندەکانەوە، نەبەرد عومەر دەڵێت: "سێ جۆر هەن؛ ئەوانەی فەرمانبەر نین، سەرپەرشتیاری بنکەی دەنگدانن 400 هەزار دینار وەردەگرن، بەڕێوەبەریی وێستگە 300 هەزار دینار و کارمەندی سەر سندووقەکانیش 200 هەزار دینار وەردەگرێ، بەڵام ئەوانەی فەرمانبەرن و سەرپەرشتیاری بنکەی دەنگدانن 300 هەزار دیناریان دەدرێتێ، بەڕێوەبەریی وێستگە 200 هەزار دینار و کارمەندی سەر سندووقەکانیش 150 هەزار دینار وەردەگرن".
ئەو کارمەندانەی لە هەرێمی کوردستان ناویان بۆ سەر سندووقەکان دەرچووە بەمشێوەیەن:
- پارێزگای هەولێر: 12 هەزار و 339 کەس
- پارێزگای سلێمانی: 13 هەزار و 340 کەس
- پارێزگای دهۆک: 8 هەزار و 256 کەس
