رووداو دیجیتاڵ
دەزگای ئاسایشی نیشتمانیی عێراق رایدەگەیێنێت، هێزەکانیان لە ئۆپەراسیۆنێکدا ئەندامێکی رێکخراوی داعشیان لە شاری بەغدا دەستگیرکردووە، کە هەوڵیداوە لە رێگەی فرۆشتنی مەشرووبەوە، رابردووی خۆی بشارێتەوە.
ئەمڕۆ دووشەممە، 10-02-2025، دەزگای ئاسایشی نیشتمانیی عێراق، رایگەیاند، ئەو کەسەی دەستگیرکراوە بە "ئەبو زوولفەقار" ناسراوە و بەتۆمەتی کردەوەی تیرۆریستی لەلایەن دادگاوە بە مادەی چواری تیرۆر داواکرابوو، لەوانە بەشداریکردن لە هێرشکردنە سەر هێزە ئەمنییەکان لە پارێزگای نەینەوا.
هەروەها تۆمەتبارە بە ئەندامبوون لە هێزی بەرگریی ئاسمانیی داعش، کە بەرپرس بووە لە هەوڵدان بۆ رووبەڕووبوونەوەی فڕۆکەکانی هێزە ئەمنیییەکان.
دەزگای ئاسایشی نیشتمانیی عێراق رایگەیاندووە، ئەو کەسە لە رێگەی کارکردن وەکو فرۆشیاری خواردنەوە کحولییەکان، هەوڵیداوە خۆی بشارێتەوە.
لێکۆڵینەوە سەرەتاییەکان ئاشکرایانکردووە خێزانی دەستگیرکراوەکە سەر بە بیری توندڕەویی ئایینی بوون و پێشتریش برایەکانی دیکەی لەلایەن هێزە ئەمنییەکانەوە لەکاتی پرۆسەی کۆنترۆڵکردنەوەی ناوچەکان کوژراون.
تۆمەتبارەکە رەوانەی دادگا کراوە بۆ ئەوەی بەگوێرەی یاسای بەرەنگاربوونەوەی تیرۆر دادگایی بکرێت و سزای خۆی وەربگرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ