رووداو دیجیتاڵ
فەرماندەی ناوەندیی هێزەکانی ئەمریکا - سێنتکۆم، رایگەیاند، هێرشێکی یەکلایەنەیان کردووەتە سەر گرووپە چەکدارەکان، لە هێرشەکەدا سەرکردەیەکی حیزبوڵڵا کراوەتە ئامانج کە بەرپرسیار بووە لە هێرشەکانی سەر ئەمریکا لە ناوچەکەدا.
فەرماندەی ناوەندی هێزەکانی ئەمریکا – سێنتکۆم لە راگەیێندراوێکدا بەرپرسیارییەتی خۆی لە ئەنجامدانی هێرشەکەی بەغدا راگەیاند و گوتی، کاژێر 9:30 خولەکی ئێوارەی رۆژی 7ـی شوبات، "فەرماندەیەکی کەتائیبی حیزبوڵڵا کە بەرپرسیاریێتی راستەوخۆی لە پلاندانان و بەشداریکردن لە هێرشکردنە سەر هێزەکانی ئەمریکا لە ناوچەکە هەبووە، کوژراوە. تاوەکو ئێستا هیچ ئاماژەیەک بۆ زەرەر و زیان و قوربانییانی مەدەنی نییە."
سوپای ئەمریکا هەروەها دەشڵێت، "ئەمریکا بەردەوام دەبێت لە گرتنەبەری هەنگاوی پێویست بۆ پاراستنی گەلەکەمان. ئێمە دوودڵ نابین لەوەی کە ئەو کەسانەی هەڕەشە دەخەنە سەر سەلامەتی هێزەکانمان رووبەڕووی بەرپرسیارییەتی بکەینەوە."
🔴بەپەلە؛ ڤیدیۆی ئەو ئۆتۆمبێلە گەیشت کە کەمێک پێش ئێستا لە بەغدا کرایە ئامانج pic.twitter.com/04DVULkW91
— Rudaw (@Rudawkurdish) February 7, 2024
شەوی چوارشەممە، 07-02-2024، دەنگی سێ تەقینەوە لە بەغدا بیستران. هەروەها ئەنمار غازی، پەیامنێری رووداو لە بەغدا گوتی، "لە هێرشەکەدا بەپێی زانیارییە سەرەتاییەکان دوو سەركردەی حیزبوڵڵای عێراقی کراونەتە ئامانج و کوژراون، کە یەكێکیان ناوی ئەبو باقر ساعدییە و ئەوەی دیکە ئەرکان عەلیاویە."
رۆژی 28-1-2024، لە ئەنجامی هێرشێکی درۆنی بۆ سەر بنکەی تاوەر22 لە ئوردن سێ سەربازی ئەمریکی کوژران. جۆ بایدن لە گوتارێکدا رایگەیاند، کە لە کات و شوێنی گونجاودا وەڵامیان بۆ هێرشانە دەبێت.
هێرشەکانی ئەمریکا دەستیپێکرد
بەرەبەیانیی رۆژی شەممە، هێزەکانی ئەمریکا زنجیرەیەک هێرشیان کردە سەر چەند دامەزراوەیەکی "سەر بە سوپای پاسدارانی ئێران و گرووپەکانی سەر بەئەوان" و زیاتر لە 100 مووشەکیان ئاراستەکردن، بەهۆی هێرشەکانەوە 17 چەکدار کوژران و 35ـی دیکە برینداربوون.
لەبارەی هێرشەکەوە، جۆ بایدن، سەرۆکی ئەمریکا رایگەیاند، "ئەمە دەستپێکی وەڵامەکەمانە و وەڵامی دیکەمان دەبێت."
دواتر لوید ئۆستن، وەزیری بەرگریی ئەمریکا گوتی، "سەرۆک بایدن فەرمانی پێکردووین بۆ هێرشی دیکە بۆ سەر گرووپە چەکدارەکان."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ