رووداو دیجیتاڵ
وەزارەتی کار و کاروباری کۆمەڵایەتیی عێراق رایگەیاند، نزیکەی 80 هەزار کرێکاری ناوخۆیی و 45 هەزار کرێکاری بیانی لە سیستمدا تۆمار کراون.
حەسەن خەوام، گوتەبێژی وەزارەتی کار و کاروباری کۆمەڵایەتیی عێراق، ئەمڕۆ پێنجشەممە، 1ی ئایاری 2025، لە کاتی بەشداریکردن لە بوڵتەنی ئابووریی تۆڕی میدیایی رووداو راگەیاند: "وەزارەتەکەمان چەندین رێکاری گرتووەتەبەر بۆ پاراستنی مافی کرێکاران لە کەرتی تایبەتدا."
حەسەن خەوام، گوتی: "لە ساڵی 2023 یاسای خانەنشینی و دەستەبەری کۆمەڵایەتیی کرێکاران دەرکراوە و لە ساڵی 2024ـەوە جێبەجێ کراوە، کە سوودی زۆری بۆ کرێکاران تێدایە."
ئەنجوومەنی وەزیرانی عێراق بڕیاری داوە دەبێت 80٪ی کرێکارانی هەر پڕۆژەیەک ناوخۆیی بن و تەنیا 20٪یان بیانی بن. گوتەبێژی وەزارەتی کار دەڵێت: "ئەو کرێکارە بیانیانەش دەبێت ئەزموون، کارامەیی و بڕوانامەی ئەو کارەیان هەبێت کە بۆی بانگهێشتکراون."
حەسەن خەوام پێیوایە، ئەو رێکارە دەرفەتی کاری زیاتر بۆ کرێکارانی ناوخۆیی دەڕەخسێنێت و ژمارەی کرێکارانی بیانی کەم دەبێتەوە.
بە گوتەی حەسەن خەوام، هەر کرێکارێک ئەگەر دەستەبەری کۆمەڵایەتیی بۆ کرابێت، مووچەی خانەنشینیی بۆ دەبڕدرێتەوە و خاوەنکار پابەند کراوە، کە پارەی دەستەبەرییەکە بدات.
سەبارەت بەو کەسانەی کاری ئازادی خۆیان دەکەن (کە بە 15 جۆر پۆلێن کراون، وەک شوفێری تەکسی، سەرتاش، ئاسنگەر، دەستگێڕ، دارتاش و کاری دیکە)، ئەوانیش دەتوانن سوودمەند بن لە رێگەی "لقی دەستەبەری ئارەزوومەندانە"وە.
وەزارەتی ناوخۆی عێراق لە چەند رۆژی رابردوودا بڕیاری هێنانی کرێکاری بیانی لە پاکستان، فلیپین، بەنگلادیش، ئیندۆنیزیا و سووریا دەرکرد.
