رووداو دیجیتاڵ
وەزارەتی کۆچ و کۆچبەرانی عێراق دەڵێت، بەم نزیکانە 150 خێزانی عێراقی لە کەمپی هۆلەوە دەگەڕێندرێنەوە.
عەلی عەباس، گوتەبێژی وەزارەتەکە، ئەمڕۆ شەممە 25-01- 2025 بە تۆڕی میدیایی رووداوی راگەیاند، ئاگادارکراونەتەوە کە بەم نزیکانە 150 خێزانی عێراقی لە کەمپی هۆلەوە دەگەڕێندرێنەوە.
عەلی عەباس روونیکردەوە کە کاتی گەڕانەوەی ئەو خێزانانە "پەیوەستە بەو خشتەیەی لەلایەن دەزگا ئەمنییە پەیوەندیدارەکانەوە دیاری دەکرێت، ئەوەش بە هاوئاهەنگی لەگەڵ هێزەکانی سووریای دیموکرات ".
گوتەبێژی وەزارەتەکە ئاماژەی بەوەشکرد: "ئەو خێزانانە دەنێردرێنە کەمپی جەدعە بۆ شیاندنەوەیان و بۆ ئەو مەبەستە چەند مانگێک لەوێ دەمێننەوە".
عێراق زیاتر لە 10 هەزار کەسی لە کەمپی هۆلەوە گەڕاندووەتەوە.
کەمپى هۆل لە سنووری شارى حەسەکەى رۆژئاواى کوردستانە و لەژێر دەسەڵاتى هێزەکانى سووریاى دیموکرات (هەسەدە)دایە.
لەکۆى نزیکەى 40 هەزار کەسی کەسوکارى چەکدارانى داعش کە لەو کەمپەدان، نزیکەى 20 هەزاریان عێراقین.
دواى گەڕاندنەوەیان، ئەو کەسانە دەبرێنە کەمپى جەدعە لە باشووری شارى موسڵ بۆ ئەوەى شیاندنەوەیان بۆ بکرێت، بەرلەوەى بگەڕێنرێنەوە زێدى خۆیان.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ