رووداو دیجیتاڵ
زانیارییەکان لەبارەی زیانەکانی هێرشە بەرفراوانەکەی ئیسرائیل بۆ سەر ئێران وردە وردە ئاشکرا دەبن و وێنەی ئۆپەراسیۆنێکی ئاڵۆز و ئامانجداریان کێشاوە، کە تیایدا لووتکەی سەرکردایەتیی سەربازی و ئەتۆمیی ئێران کراوەتە ئامانج.
تەلەڤزیۆنی فەرمیی ئێران کوژرانی سوپاسالار، فەرماندەی گشتیی سوپای پاسداران، راوێژکاری رێبەر و دوو زانای دیاری ئەتۆمیی پشتڕاستکردووەتەوە.
ئامانجەکان چین؟
سوپای ئیسرائیل دەڵێت، "دەیان ئامانجی سەربازی، لەنێویاندا ئامانجی ئەتۆمی لە ناوچە جیاوازەکانی ئێران"ـی پێکاوە.
بەپێی رۆژنامەی نیویۆرک تایمز کە لە زاری بەرپرسانی باڵای ئێرانەوە زانیارییەکانی وەرگرتووە، لانیکەم شەش بنکەی سەربازی لە دەوروبەری تاران و هەروەها ماڵی فەرماندە سەربازییەکان و چەندین باڵەخانەی نیشتەجێبوون کراونەتە ئامانج.
دامەزراوەی ئەتۆمیی نەتەنز: گورز لە دڵی پرۆگرامەکە
یەکێک لە ئامانجە سەرەکییەکان، دامەزراوەی سەرەکیی پیتاندنی یۆرانیۆم بووە لە نەتەنز. تەلەڤزیۆنی فەرمیی ئێران رایگەیاندووە، چەندین جار هێرشکراوەتە سەر ئەم شوێنە و وێنەکانیش دووکەڵێکی رەشیان نیشان دەدا کە لە دامەزراوەکەوە بەرز دەبێتەوە.
نەتەنز هەزاران ئامێری پێشکەوتووی سێنتریفیوج (ئامێری پیتاندنی یۆرانیۆم) لەخۆدەگرێت، کە دەیان مەتر لەژێر زەویدا دانراون بۆ پاراستنیان. تاوەکو ئێستا روون نییە هێرشەکەی ئیسرائیل چەندە قووڵ بووە و چەندە زیانی پێگەیاندوون.
جگە لە نەتەنز، هێرشکراوەتە سەر ئەسفەهان، ئەرەک، تاران، تەبریز، پیرانشار و کرماشان.
سەرکردە کوژراوەکان: گورز لە لووتکەی هێز
تەلەڤزیۆنی فەرمیی ئێران کوژرانی سەرکردە باڵاکانی هێزە چەکدارەکانی پشتڕاستکردەوە. ناوی کوژراوەکان بریتین لە:
حوسێن سەلامی، فەرماندەی گشتیی سوپای پاسداران، کە بە هێزی هەرە سەرکەوتووی ئێران دادەنرێت.
لیوا محەممەد باقری، سوپاسالاری هێزە چەکدارەکانی ئێران.
فەرەیدوون عەباسی، سەرۆکی پێشووتری ڕێکخراوی وزەی ئەتۆمیی ئێران.
محەممەد مەهدی تهرانچی، سەرۆکی زانکۆی ئیسلامیی ئازاد لە تاران.
عەلی شەمخانی، راوێژکاری باڵای عەلی خامنەیی.
ئەم وردەکارییانە لە کاتێکدایە کە گرژییەکان لە لووتکەدان. ئیسرائیل ئۆپەراسیۆنەکەی بە "زۆر سەرکەوتوو" ناوبردووە و رایگەیاندووە، "تا پێویست بکات بەردەوام دەبێت".
لە بەرامبەردا، ئێران هەڕەشەی وەڵامدانەوە دەکات؛ عەلی خامنەیی، رێبەری باڵا و سوپای پاسداران بەڵێنی "سزایەکی سەخت" و "تۆڵەسەندنەوە"یان داوە.
وەزارەتی دەرەوەی ئێران و هێزە چەکدارەکانی، راستەوخۆ ئەمریکا بە هاوکاریکردن و "بەرپرسیار" لە دەرەنجامەکانی هێرشەکە تۆمەتبار دەکەن، ئەمەش دژی لێدوانی بەرپرسانی ئەمریکایە کە دەڵێن بەشدارییان نەکردووە.
زیانەکان تەنیا سەربازی نەبوون؛ لە قەسری شیرین، بەهۆی بۆردومانەوە، هاووڵاتیی سڤیل کوژران و بریندار بوون.
نیگەرانییە نێودەوڵەتییەکان لە زیادبووندان، ئاسمانی ناوچەکە داخراوە، نرخی نەوت بە شێوەیەکی بەرچاو بەرزبووەتەوە. چارەنووسی دانوستاندنە ئەتۆمییەکانیش کە بڕیاربوو بەمزووانە دەستپێبکاتەوە، نادیارە.
