رووداو دیجیتاڵ
لیژنەی نێودەوڵەتیی خاچی سوور دەڵێت، ئامادەیە هاوکاریی شادکردنەوەی بارمتەکان بە خێزانەکانیان لە ئیسرائیل بکات و هاوکاریش بە دانیشتووانی غەززە بگەیێنێت.
رۆژی دووشەممە 06-10-2025 میریانا سپۆلیاریک، سەرۆکی لیژنەی خاچی سوور گوتی: "تیمەکانمان ئامادەن وەک نێوەندگیرێکی مرۆیی بێلایەن، یارمەتیی گەڕاندنەوەی بارمتەکان و گیراوەکان بە خێزانەکانیان بدەن."
شاندەکانی حەماس، ئیسرائیل و ئەمریکا لە میسرن و ئەمڕۆ لەسەر راگرتنی جەنگە دوو ساڵییەکە کۆبوونەوە.
حەماس و ئیسرائیل وەڵامی ئەرێنیی پلانە 20 خاڵییەکەی ترەمپیان بۆ ئاشتیی غەززە داوەتەوە؛ کە رزگارکردنی بارمتەکان و راگرتنی جەنگ لەخۆدەگرێت.
خاچی سوور جەختیکردەوە، پێویستە هاوکاریی مرۆیی بەتەواوی دەستپێبکاتەوە و بە سەلامەتی بەسەر هەموو خەڵکی کەرتی غەززە دابەش بکرێت.
خاچی سوور بارەگاکەی لە جنێڤی سویسرایە رایگەیاند، هاوئاهەنگیی رزگارکردنی 148 بارمتە و هەزار و 931 زیندانی کردووە، ئەمە جگە لە یارمەتیدانی گەڕاندنەوەی تەرمی چەندین کەس.
سپۆلیاریک گوتی، ئەم جۆرە ئۆپەراسیۆنانە زۆر ئاڵۆزن و پێویستی بە پلاندانانێکی زۆر وردی لۆجیستی و ئەمنی هەیە.
