رووداو دیجیتاڵ
لە رێوڕەسمێکی گەورەدا بە ئامادەبوونی هەزاران هاونیشتمانی، پێشوازی لە گەڕانەوەی محەممەدموبین عەزیمی، پاڵەوانی زۆرانبازیی جیهان کرا.
رۆژی پێنجشەممە 31-10-2025 لە پارکی مەولەویی سەقز رێوڕەسمێکی گەورە بۆ پێشوازی لە زۆرانبازی ناوداری شارەکە، محەممەدموبین عەزیمی بەڕێوەچوو و بە هەزاران کەس تێیدا بەشدار بوون.
لە رێوڕەسمەکەدا، ئەو زۆرانبازە سوپاسی پاڵپشتی و پشتگیری خەڵکی سەقز و کوردستانی کرد و بەڵێنی پێدان لە پاڵەوانێتییەکانی داهاتووشدا، هەموو توانای خۆی دەخاتەگەڕ بۆ بەدەستهێنانی ناسناو و مەدالیای زیاتر.
عەزیمی کە وەکو یاریزانی کێشی 92 کیلۆگرامی هەڵبژاردەی ئێران بەشداری لە پاڵەوانێتیی خوار 23 ساڵانی جیهاندا کردبوو، توانی بەسەر زۆرانبازانی ئۆزبەکستان، ئازەربایجان، ئەمریکا، ئۆکراینا و رووسیادا سەربکەوێت و پلەی یەکەم و مەدالیای زێڕی پاڵەوانێتییەکە لەو کێشەدا بەدەست بهێنێت.
پاڵەوانێتیی زۆرانبازیی خوار 23 ساڵی جیهان لە رۆژانی هەینی تاوەکو دووشەممەی رابردوو لە سڕبیا بەڕێوەچوو و هەڵبژاردەی ئێران توانی پلەی دووەم بەدەست بهێنێت.
محەممەدموبین عەزیمی پێشتریش لە ساڵەکانی 2023 و 2024 توانیویەتی لە ئاستی مێرمنداڵان و گەنجاندا پلەی یەکەمی زۆرانبازیی ئازادی جیهان بەدەست بهێنێت. هەروەها لە پاڵەوانێتیی ئەم ساڵی ئاسیادا پلەی سێیەم و مەدالیای بڕۆنزی بەدەست هێنا. لە ئاستی ئێرانیشدا سێ جار پلەی یەکەمی ئەو وڵاتەی بەدەستهێناوە.
