رووداو دیجیتاڵ
پەرلەمانتارێکی فراکسیۆنی یەکێتی لە پەرلەمانی عێراق دەڵێت، سەرۆکی یەکێتیی نیشتمانیی کوردستان بڕیاریدا سەرجەم پەرلەمانتارانی حیزبەکەی کۆنگرە جێبهێڵن بۆ ئەوەی بەشداری لە کۆبوونەوەی ئەمڕۆی پەرلەمانی عێراق بکەن کە یەکێک لە بڕگەکانی کارنامەکەی دەنگدان دەبێت لەسەر پڕۆژەیاسای بەپارێزگاکردنی هەڵەبجە.
رۆژی شەممە، 30-9-2023، د. بڕیار رەشید، ئەندامی فراکسیۆنی یەکێتیی نیشتمانیی کوردستان لە پەرلەمانی عێراق لەبارەی جیهێشتنی هۆڵی کۆنگرەی یەکێتی و گەڕانەوە بۆ بەغدا، بە تۆڕی میدیایی رووداوی راگەیاند، "بە بڕیاری سەرۆک بافل تاڵەبانی، ئەمڕۆ بەشداری لە رۆژی چوارەمی کۆنگرەی یەکێتیی نیشتمانی کوردستان ناکەین، چونکە بڕیاری داوە یەکسەر بگەڕێینەوە بۆ بەغدا و دەنگ بە پڕۆژەیاسای بە پارێزگاکردنی هەڵەبجە بدەین؛ بڕیارەکەش بۆ ئەوەیە رێژەی یاسایی پەرلەمانتاران ئامادەبن و ئێمەش دەنگی پێ بدەین".
ئەمڕۆ شەممە، 30ـی ئەیلوول، چوارەم رۆژی کۆنگرەی پێنجەمی یەکێتیی نیشتمانیی کوردستانە کە لە شاری سلێمانی بەڕێوەدەچێت.
یەکێتیی نیشتمانیی کوردستان لە پەرلەمانی عێراق 18 کورسی هەیە.
بەگوێرەی کارنامەی کۆبوونەوەی ئەمڕۆ شەممەی پەرلەمانی عێراق، دەنگدان لەسەر پڕۆژەیاسای بەپارێزگاکردنی هەڵەبجە یەکێکە لە بڕگەکانی کارنامەکە. موسەننا ئەمین، پەرلەمانتاری عێراق و یەکێک لە نوێنەرانی ئەو پارێزگایە لە پەرلەمانی عێراق بە تۆڕی میدیایی رووداوی گوت، کار کراوە بۆ پەسندکردنی پڕۆژەیاساکە، بەڵام "ئەگەر هەیە" لە کۆبوونەوەکەدا ژمارەی یاسایی پەرلەمانتاران ئامادەنەبن و دوابخرێت.
ئەگەری دواخستنەکە لەکاتێکدایە، بڕیاربوو لە کۆبوونەوەی رۆژی 14ـی ئەیلوولی 2023ـی پەرلەمانی عێراق، دەنگ لەسەر پڕۆژەیاسای بەپارێزگاکردنی هەڵەبجە بدرێت، بەڵام بەهۆی نەچوونی بەشێکی پەرلەمانتاران بۆ کۆبوونەوە و تەواونەبوونی ژمارەی یاسایی ئامادەبووان دانیشتنەکە نەکرا.
پڕۆژەیاسای بەپارێزگاکردنى هەڵەبجە لە چوار مادە و هۆیەکانی دەرچوونی پێکهاتووە، بەپاساوی جیاواز تاوەکو ئێستا سێ جار دەنگدان لەسەری دواخراوە.
