رووداو دیجیتاڵ
بەگوێرەی داتای سەنتەری بوومەلەرزەزانی سلێمانی ئەمڕۆ 6 بوومەلەرزە لە سنووری گەرمیان و نێوان گەرمیان و رۆژهەڵاتی کوردستان تۆمار کراون.
سەنتەری بوومەلەرزەزانی سەر بە بەڕێوەبەرایەتیی کەشناسی و بوومەلەرزەزانی سلێمانییە. جەوهەر حەمەلاو، لێپرسراوی بەشی کەشوهەوا لە بەڕێوەبەرایەتییەکە بە تۆڕی میدیایی رووداوی گوت: "یەکەم بوومەلەرزە کاژێر 01:54ـی بەرەبەیانی ئەمڕۆ بووە و دوایینیشیان کاژێر 08:23 بەیانی بووە".
جەوهەر حەمەلاو ئاماژەی بەوەشکرد، بەهێزترین بوومەلەرزەی ئەمڕۆ گوڕەکەی 3.5 پلەی رێختەر بووە.
لێپرسراوی بەشی کەشوهەوا لە بەڕێوەبەرایەتیی کەشناسی سلێمانی گوتی: "27ـی ئەم مانگە نزیکەی 20 بوومەلەرزە لە گەرمیان روویاندا و بەهێزترینیان گەیشتە 5.1 پلە بە پێوەری رێختەر، بەڵام خۆشبەختانە هیچ زیانێکی نەبوو".
لەبارەی بوومەلەرزەکانی ئەمڕۆی گەرمیانەوە جەوهەر حەمەلاو دەڵێت: "بوومەلەرزەکان ئاسایین و رۆژانە روودەدەن و مەترسییان نییە، مەترسی بوومەلەرزە لە سەروو 5 پلەی رێختەرەوە دەستپێدەکات".
بەپێی ئاماری دەستەی کەشناسی و بوومەلەرزەزانیی عێراق، لە ساڵی 2024دا 231 بوومەلەرزە لە سەرانسەری عێراق و هەرێمی کوردستان روویانداوە.
