رووداو دیجیتاڵ
بەڕێوەبەری ناحیەی ئاخجەلەر رایگەیاند، لەماوەی دوو رۆژدا شەش جار دوو گوند لە سنووری ناحیەکەیان بۆردوومان کراون، دەشڵێت هەندێک لە گوندەکانی سنوورەکە بەهۆی بۆردوومانەوە چۆڵکراون.
رۆژی هەینی، 29-12-2023، هێمن بەهجەت، بەڕێوەبەری ناحیەی ئاخجەلەری سنووری قەزای چەمچەماڵ بە تۆڕی میدیایی رووداوی گوت، چوارشەممە پێنج جار سنووری گوندی تووتەقەڵ و دوێنێ یەکجار چنارتوو بۆردوومان کراوە.
بەڕێوەبەری ناحیەی ئاخجەلەر دەشڵێت: "گوند هەیە بەهۆی بۆردوومانەوە بەتەواوی چۆڵکراوە، بە نموونە گوندی تووتەقەڵ بەتەواوی چۆڵکراوە و تەنیا یەک کەس لەوێ ماوە چونکە لە ساڵی 2021 لە بۆردوومانێکدا دوو کەس لەو گوندە شەهید بوون یەکێکیان ئەنجوومەنی گوندەکە و ئەوی دیکە خەزووری بوو بەهۆیەوە کەسوکاریان گوندەکەیان چۆڵکرد."
بەگوێرەی زانیارییەکانی رووداو، پەکەکە لە هەریەک لە گوندەکانی تووتەقەڵ و چنارۆک لە سنووری ناحیەی ئاخجەلەر بارەگای هەیە. هێمن بەهجەت دەڵێت: "ئەگەر هەر کەسێک لە گەریلا گیانی لەدەستدابێت ئەوە زانیاریمان بەدەست ناگات و هیچ بڵاوناکەونەوە و ناهێڵن نزیکی بارەگاکانیان ببینەوە، بەڵام وەکو خەڵکی مەدەنی هیچ گیانلەدەستدان و بریندارێکمان نەبووە."
دوایین جار مانگی هەشتی ئەم ساڵ گوندی چنارتوو بۆردومانکرا و بەهۆیەوە دوو گەریلای پەکەکە گیانیان لەدەستدا و یەکێکیشیان بریندار بوو.
.webp&w=3840&q=75)
