رووداو دیجیتاڵ
نێچیرڤان بارزانى، سەرۆکى هەرێمى کوردستان پەیامێکی سەرەخۆشی ئاراستەی عەلی سیستانی کرد، دوای ئەوەی دوێنێ هاوژینەکەی کۆچی دواییکرد.
سەرۆکی هەرێمی کوردستان پەیامەکەی لە ئێکس بڵاوکردووەتەوە و دەڵێت، "بەوپەڕی خەم و پەژارەوە هەواڵی کۆچی دوایی هاوسەری بەڕێزی مەرجەعی باڵای ئایینی، ئایەتوڵڵا عوزما سەید عەلی سیستانی-مان پێگەیشت".
نێچیرڤان بارزانی، سەرەخۆشی و هاوخەمی لە عەلى سیستانی و بنەماڵەکەى کردووە و دەڵێت: "لە خوای گەورە داواکارین خوالێخۆشبوو بە بەرفراوانترین رەحمەت و لێخۆشبوونی خۆی شاد بکات و جێگەی بەهەشت بێت و سەبووری و ئارامی بە دڵى هەموو کەسوکار و ئازیزانی ببەخشێت"
شەوى 28ـى ئەیلوول، هاوژینى عەلی سیستانی، مەرجەعى باڵاى شیعەکانی عێراق کۆچى دواییکرد و ئەمڕۆ رێوڕەسمى بەخاکسپاردنى لە نەجەف ئەنجامدرا.
رۆژانى دووشەممە و سێشەممە دیاری کراوە بۆ پرسەى هاوژینەکەى عەلى سیستانی کە لە مزگەوتى خەزرا لە نەجەف دەبێ.
