هەڵەیەک روویدا! دووبارە هەوڵبدە
دەنگدەرێک لە هەولێر دەنگ بۆ هەڵبژاردنی سەرۆکایەتیی ئێران دەدات. وێنە: رووداو
رووداو - هەولێر
لە رێگەی چوار سندووقی جێگیر و چوار سندووقی گەڕۆک، لە 12 شار و شارۆچکەی هەرێمی کوردستان هەڵبژاردنی خوولی چواردەیەمینی سەرۆکایەتیی کۆماری ئێران بەڕێوەچوو. دەنگدەران لەنێو چوار بەربژێر بۆ بوونە سەرۆکی ئێران، یەکێکیان گوڵبژێر کرد.
فەرهاد عەلی زادە، دەنگدەر گوتی، "کارێکی میلییە و دەبێت جێبەجێی بکەیت، منیش کردوومە." ئەمیر مەسایی، دەنگدەر ئاماژەی بەوە کرد، "هاتووم بە دەنگەکەم کەسێک هەڵبژێرم کە بە دڵی خۆمە و پێموایە کەسێکی باشە بۆ وڵاتەکەم."
دەنگدەرێکی دیکە بەناوی مستەفا شەریفی باسی لەوە کرد، "یەکەمجارە هاتووم و پێموایە ئەرکە دەنگ بدەم، مافی هەر کەسێکیشە کە بە دەستی خۆت نوێنەری خۆت دیاری بکەیت و هەمیشە دەنگدانیش باشترە لەوەی دەنگ نەدەیت."
هەر کەس بگاتە سندووقەکانی دەنگدان و بەڵگەنامەیەکی ئێرانیی پێبا دەنگی دەدا. ئاسایش و ئارامیی هەڵبژاردنەکە لە ئەستۆی هەرێمی کوردستان بوو.
شاکر حوسێن، بەرپرسی پەیوەندییەکانی هەرێمی کوردستان لەگەڵ ئێران گوتی، "لەسەر بنەمای ئەوەی پەیوەندییەکانی ئێمە لەگەڵ ئێران پەیوەندیی مێژوویین و ئێمە دوو دراوسێی نزیکی یەکدین، چاوەڕوان دەکرێت لە کابینەی داهاتوویاندا پەیوەندییەکان زیاتر بەرەو پێشەوە بچن."
بەپێی ئاماری کۆنسوڵخانەی ئێران لە هەولێر، زیاتر لە 10 هەزار کەس لە خەڵکی رۆژهەڵاتی کوردستان و ئێران لە هەرێمی کوردستان کارتی نشینگەیان هەیە.
نەسروڵڵا رەشنودی، سەرکۆنسوڵی ئێران لە هەولێر گوتی، "پشت بە خوا سەرۆککۆماری نوێی ئێران درێژەپێدەری رێگەی سەرۆکی شەهیدمان دەبێت و پەیامەکانی جێبەجێ دەکات، ئومێدمان هەیە سەبارەت بە بەهێزکردنی پەیوەندییەکانمان لەگەڵ عێراق و هەرێمی کوردستان درێژە پێبدەین."
ژمارەیەک دەنگدەر کە قسەیان بۆ رووداو کرد، داواکار بوون کابینەی داهاتووی ئێران هەڵوەستەیەکی جیددی لەسەر بارودۆخی ئابووری بکات و بتوانێت حاڵ و گوزەرانی گەلانی ئێران لەم دۆخە سەختە دەرباز بکات.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ