دوو مێردمنداڵ لە هەولێر بەهۆی تەقینەوەی 'گولـلە هاوەنێکی سەردەمی بەعس' گیانیان لەدەستدا

موبارەک عەلی لەدایکبوی ساڵی 2008 و عەبدولعەزیز لەدایکبووی ساڵی 2009یە. کەسوکاریان باس لەوە دەکەن کە ئەو دوو برایە، هەموو شتێکیان پێکەوە بووە و بۆ هیچ شوێنێکیش بەبێ یەکدی نەدەچوون.

سەعد جومعە، مامی دوو براکە دوای بیستنی دەنگی تەقینەوەکە، یەکەم کەس بووە کە گەیشتووەتە شوێنی رووداوەکە و دەڵێت، "گوێم لە دەنگێکی بەرز بوو، رامکردە دەرەوە و دووکەڵم بینی، کاتێک چووم چیم بینی؟ برازاکانم بینی تەرمەکانیان شێوابوو. براکەم چەند سەر مەڕێکی هەبوو، رۆ‌ژانە سەرقاڵی کاری شوانی بوون، براکەم ماڵی وێران بوو، هەردوو کوڕەکەی بە یەک رۆژ لەدەستدا."

عەلی جومعە، باوکی دوو مێردمنداڵەکە دەڵێت، خەوتبوو کاتێک پێیان گوتووە بۆمب بە هەردوو کوڕەکەیدا تەقیوەتەوە، "لە ساڵی 2016وە لە کەمپی دیبەگە نیشتەجێم، چەند سەر مەڕێکمان هەبوو، ئەوان مەڕەکانیان بردبوو بۆ لەوەڕ، بە ساخی رۆیشتن، کەچی تەرمەکانیانم بۆ هاتەوە. موبارەک لەدایکبووی ساڵی 2008 و عەبدولعەزیز لەدایکبووی ساڵی 2009یە، تازە من کۆستم کەوتووە."

مالباتی موبارەک و عەبدولعەزیز لە ساڵی 2016 لەترسی داعش گوندی باقرتی سەر بە قەزای مەخمووریان بەجێهێشتووە و لە کەمپی دیبەگە نیشتەجێ بوون. لێکۆڵینەوەی هێزە ئەمنییەکانیش لە رووداوەکە بەردەوامە.

بەیار حەسەن، بەڕێوەبەری ناحیەی دیبەگە بە رووداوی راگەیاند، بەگوێرەی لێکۆڵینەوە سەرەتاییەکان، رووداوەکە بەهۆی تەقینەوەی گوللـەهاوەنێکی سەردەمی بەعس بووە و بەهۆی ئەوەی لەو ناوچەیە سەربازگە هەبووە، دوای بارانبارینی چەند رۆژی رابردوو، گولـلە هاوەنەکە دەرکەوتووەتەوە.