رووداو دیجیتاڵ
دوای زیاتر لە 20 رۆژ لە داخرانی، ئەمڕۆ رێگەی سەرەکیی حەسەکە - دێرەزوور بۆ دیمەشقی پایتەختی سووریا، کرایەوە.
لەزگین خەلیل، بەڕێوەبەری کۆمپانیای گەشتیاریی هەڤاڵ لە سووریا، ئەمڕۆ یەکشەممە بە تۆڕی میدیایی رووداوی گوت: "دوای داخستنی رێگەی رەققە - حومس لەلایەن حکومەتی سووریاوە، رێگایەکی دیکە بۆ چوون بەرەو شام کرایەوە".
بەڕێوەبەری کۆمپانیای گەشتیاریی هەڤاڵ کە کارکردنیان لەو رێگەیەدا دەڵێت: "ئێستا بۆ چوون بۆ دیمەشق، رێگەی حەسەکە - دێرەزوور-تەدموور- دمێر بۆ دیمەشق بەکاردەهێنین، کە باشترە لە رێگەکەی پێشوو".
5ـی ئەم مانگە ئاڵۆزی لەسەر رێگەی رەققە - حومس دروست بوو، کە شۆفێران دەڵێن حکومەت خۆی رێگەکەی داخستووە و تەنیا رێگەی بە بەشێک لە نەخۆش و خوێندکاران دابوو بەکاری بهێنن.
لەزگین خەلیل ئاماژەی بەوەکرد، ئەو رێگەیەی ئێستا بەکاری دەهێنن "هیچ کێشەی نییە و خاڵەکانی حکومەتیش هیچ ئاستەنگییەک" بۆ شۆفێران دروست ناکەن.
