بنیامینی 10 مانگان
رووداو - زاخۆ
بنیامین، منداڵێکی تەمەن 10 مانگە، هەر لە لەدایکبوونیەوە دایک و باوکی بەدوای چارەسەری پزیشکیدا دەگەڕێن بۆی، بەڵام بەهۆی ئەوەی توانای داراییان نییە، ناتوانن چارەسەری پێویستی بۆ بکەن.
جەیلان محەممەد، دایکی بنیامین داوای هاوکاری لە خێرخوازان دەکات و دەڵێت، "با کوڕەکەم لەدەستم دەرنەچێت، گورچیلەی خۆم دەدەم تەنیا کوڕەکەم لەدەستم دەرنەچێت."
شەش ساڵە باوکی بنیامین لە بازاڕی زاخۆ پێڵاو بۆیاخ دەکات، بەڵام داهاتەکەی وەکو پێویست نییە و ناتوانێت خەرجیی چارەسەری منداڵەکەی پەیدابکات.
جەمیل غانم، باوکی بنیامین دەڵێت، "بەتەمای خودا و کارەکەمم، رۆژانە 10 هەزار دینارم دەستدەکەوێت. نازانم پارەکە بە چی بدەم و بە چی نەدەم، کرێی خانوو یان تێچووی نەخۆشی. منداڵەکەم مانگێکە لەلای پزیشک چارەسەر وەردەگرێت."
ئەیوب محەممەد تاهیر، پزیشكی منداڵان دەڵێت، بەگشتی ئەو منداڵە لاوازە و سستە، ناتوانێت سەری خۆی راگرێت، هەروەها گەشەکردنیشی دواکەوتووە، کێشە لە رێکخستنی لەشیدا هەیە و ئێستا هەندێک چارەسەری پزیشکیی پێدەدەن.
بە گوتەی دایک و باوکی بنیامین، تاوەکو ئێستا نزیکەی 25 هەزار دۆلاریان لە خەرجیی چارەسەری منداڵەکەیاندا خەرجکردووە، بەڵام نەتوانراوە چارەسەر بکرێت، ئێستاش پێویستیان بە 20 هەزار دۆلارە بۆ چارەسەرکردنی.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ