رووداو دیجیتاڵ
لێکۆڵینڤان و توێژەرێکی کورد لە دوو ساڵدا کتێبێکی بەنێونیشانی "کۆدەکانی داینامیکییەتی هایدرۆکاربۆن لە رۆژهەڵاتی دەریای سپی: ئاشکراکردنی وەرچەرخانێکی ناوچەیی" ئامادە دەکات. گرووپی ئیمیراڵد کتێبەکە لە 130 وڵاتی جیهان بڵاودەکاتەوە.
کتێبەکە ئەو ئاڵنگارییە گەورانەی وەک کێشەی ئیسرائیل - فەلەستین، کێشەی قوبرس، کێشەی سنوورە ئاوییەکانی نێوان لوبنان و ئیسرائیل، قەیرانی سووریا کە بەرۆکی ناوچەکەیان گرتووەتەوە باس دەکات.
لە بەشێکی دیکەی کتێبەکەشدا نەوت و گازی هەرێمی کوردستان باسکراوە کە چۆن دەکرێت وەکو بەشێکی وزە ببرێتە سەر نەخشەی وزە لە دەریای سپی نێوەڕاست.
کتێبەکە لەلایەن بەهرۆز جەعفەر، نووسەر و لێکۆڵینڤانی کوردەوە ئامادەکراوە کە بڕوانامەی دکتۆرای لە پەیوەندییە نێودەوڵەتییەکاندا هەیە.
گووگڵ بووک بە کورتی پوختەیەکی لەسەر نێوەڕۆکی کتێبەکە بڵاوکردووەتەوە و و دەڵێت: "هەوڵێکە بۆ ناساندنی جیۆپۆلەتیکی رۆژهەڵاتی دەریای سپی وەک حەوزەیەکی کاریگەری جیهانی لە روانگەی گازی سرووشتی، نەوت و بەکارەبایی کردن و پرسە ژینگەییەکانەوە."
کتێبەکە لە ئۆنلاین بەردەستە، کۆمپانیای بڵاوکردنەوەکەی گەیاندوویەتییە ناوەندە ئەکادیمییەکان و زانکۆکان تاوەکو لەلایەن بڕیاردەرانی ناوچەیی و جیهانییەوە سوودی لێ ببینرێت بۆ چارەسەرکردنی گرفتە هەنوکەییەکانی رۆژهەڵاتی دەریای سپی.
ئەو کتێبە لە حەوت بەش پێکهاتووە و نرخەکەی بەپێی وڵات دەگۆڕێت. گرووپی ئیمیراڵد 100 بۆ 150 دۆلاری بۆ هەر کۆپییەک دیاریکردووە.
ئیمیراڵد بارەگای سەرەکی لە بەریتانیا و ئەمریکایە، لە ساڵی 2024 دا پێگەی 32مین شوێنی وەرگرتووە کە خەڵکی بەریتانیا پەیامی لێوەردەگرن، نزیکەی 300 گۆڤاری زانستیی سکۆپەس سەر بە گرووپەکەن و ساڵانە 109 ملیۆن سەردانیکەریان هەیە.
گرووپە بەریتانی - ئەمریکییەکە نزیکەی 50 ساڵ ئەزموونیان هەیە، ئەوەش وایکردووە کە لە 130 وڵاتی جیهانەوە توێژەران کە توانای دۆزینەوە چارەسەریان بۆ پرسە ئاڵۆز و جیاوازەکان هەیە بەشدارییان لەگەڵدا بکەن.
لە نێوەڕۆکی کتێبی "کۆدەکانی داینامیکییەتی هایدرۆکاربۆن لە رۆژهەڵاتی دەریای سپی: ئاشکراکردنی وەرچەرخانێکی ناوچەیی" هاتووە کە یاریکەرە سەرەکییەکانی رۆژهەڵاتی سپی بریتین لە تورکیا، میسر و ئیسرائیل. لەگەڵ ئەوەشدا هێڵەکانی وزە لە داهاتوودا زۆرینەیان دەکەونە سەر ئەم نێوەندە ستراتیژییە، ئەم کوتلە جیۆپۆڵەتیکییە لەڕووی ئابووریی وزە و پرسی ئاسایشەوە فراوانتر دەکرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ