دیمەنی منداڵەکە لەپاش لەدایکبوون.
رووداو دیجیتاڵ
شەوی یەکشەممە لەسەر دووشەممەی ئەم هەفتەیە، ژنێکی دووگیان لە نەخۆشخانەی رزگاریی هەولێر لەکاتێکدا کە لە توالێتدا بووە، ژان دەیگرێت و منداڵەکەی لەدایک دەبێت.
بەپێی زانیارییەکانی رووداو، دایکەکە نەیزانیوە کاتی لەدایکبوونی منداڵەکەیەتی؛ ئێستا دۆخی تەندروستیی جێگیر و سەلامەتە، هەروەها منداڵەکەش وادیارە سەلامەت بێت و لەژێر چاودێریدایە.
رووداوەکە دەوروبەری کاژێر 12ـی شەوی یەکشەممە بووە و دایکەکە کە تەمەنی نزیک 50 ساڵانە بەهۆی "ئازاری مەعیدە و هەبوونی خوێن" سەردانی نەخۆشخانەکەی کردووە.
لەکاتی منداڵبوونەکەدا، دوو پزیشک پێش هەمووان گەیشتوونەتە سەر دایکەکە؛ سۆنیا کاکەیی و جان عەلی کە هەردووکیان پزیشکی نیشتەجێی خوولاون لە نەخۆشخانەکە.
دکتۆر سۆنیا کاکەیی بە رووداوی گوت، "لە نزیک توالێتەکانەوە دەڕۆیشتین، گوتیان ژنێک دۆخی خراپە و کەوتووە؛ کە چووین سەیرمان کرد ژنەکە منداڵەکەی بووە و منداڵەکەش کەوتووەتە نێو سیفۆنی توالێتەکە؛ هاوکاریمان کرد و هەڵمانگرتەوە، بەگوێرەی پشکنینە سەرەتاییەکان، منداڵەکە سەلامەتە و لەژێر چاودێریدایە".
دکتۆر سۆنیا گوتی، "توالێتەکە شەرقی بووە و تایبەت بووە بە پیاوان، دایکەکە بەهەڵە چووەتە ئەوێ".
رووداو دەزانێت، منداڵە تازە لەدایکبووەکە کچە و تائێستا لەژێر چاودێریدایە، بەگوتەی دکتۆرەکانیش بێت، "سەلامەتە".
دایکەکە بۆ ماوەی سێ بۆ چوار کاژێر لەژێر چاودێری پزیشکیدا بووە و دواتر رێگەی پێدراوە بچێتەوە لە ماڵەوە پشوو بدات.
بەگوتەی دکتۆر سۆنیا کاکەیی، خۆی و دکتۆر جان عەلی و تیمێکی نەخۆشخانەکە تاوەکو دڵنیابوونەتەوە لە بارودۆخی دایک و منداڵەکە لە هاوکاریکردنی بەردەوام بوون.
دکتۆر سۆنیا دەڵێت، منداڵەکە نۆ مانگانە و لە تەمەنێکی کەمتردا لەدایک نەبووە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ