رووداو دیجیتاڵ
هێزەکانی سووریای دیموکرات (هەسەدە) ئەمڕۆ پێنجشەممە، نێوەرۆکی کۆبوونەوەی دوێنێ شەوی نێوان مەزڵووم عەبدی، فەرماندەی گشتیی هێزەکە و ژان نوێل، وەزیری دەرەوەی فەرەنسا بڵاوکردەوە.
دوێنێ شەو مەزڵووم عەبدی گەیشتە هەولێر و دوا کاژێرەکانی شەوەکە لەگەڵ وەزیری دەرەوەی فەرەنسا کۆبووەوە.
لەو بارەیەوە، هەسەدە دەڵێت: "ژان نوێل بارۆ، وەزیری دەرەوەی فەرەنسا ستایشی رۆڵی هەسەدەی لە بەرەنگاربوونەوەی تیرۆردا کرد و جەختی لە گرنگیی دابنیکردنی هەموو جۆرە پشتیوانییەکی پێویست بۆ هەسەدە کردەوە، بە لەبەرچاوگرتنی شەڕی بەردەوامی دژی رێکخراوی تیرۆرستیی داعش."
بارۆ رۆژی چوارشەممە بە سەردانێک گەیشتە بەغدا و لەگەڵ بەرپرسانی عێراق کۆبووەوە. دواتریش لە هەولێر لەگەڵ سەرۆک بارزانی، نێچیرڤان بارزانی، سەرۆکی هەرێمی کوردستان و مەسرور بارزانی، سەرۆکوەزیرانی هەرێمی کوردستان کۆبووەوە.
تەوەری هاوبەش و سەرەکیی هەموو کۆبوونەوەکان، دۆخی سووریا بوو.
دوای ئەوە، وەزیرە فەرەنسییەکە لە هەولێر گفتوگۆی لەگەڵ مەزڵووم عەبدی کرد.
هەسەدە دەڵێت: "کۆبوونەوەکە جەختی لە گرنگیی بەشداریکردنی فرەلایەنی کورد و هەموو پێکهاتەکانی سووریا لە پڕۆسەی سیاسی و بەڕێوەبردنی وڵاتەکەدا کردەوە، بۆ بەدەستهێنانی سەقامگیریی سیاسی، ئەمنی و ئابووری و دەستپێکردنی بونیادنانەوەی وڵاتەکە."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ