رووداو- هەولێر
وەزیری دەرەوەی قەتەر، رۆڵی سەرۆکی هەرێمی کوردستان بۆ سەقامگیریی عێراق و پێکهێنانی ژینگەیەکی نیشتمانیی گشتگیر بە ئەرێنی ناودەبات و رایدەگەیێنێت؛ رۆڵی هەرێمی کوردستان لە عێراق رۆڵێکی گرنگ و میحوەرییە.
محەممەد عەبدولڕەحمان ئالسانی، وەزیری دەرەوەی قەتەر کە هاوکات جێگری سەرۆکوەزیرانی ئەو وڵاتەیە ئێوارەی رۆژی چوارشەممە گەیشتە هەرێمی کوردستان و لە فڕۆکەخانەی نێودەوڵەتیی هەولێر لەلایەن شێخ جەعفەر شێخ مستەفا، جێگری سەرۆکی هەرێمی کوردستان، فەوزی هەریری، سەرۆکی دیوانی سەرۆکایەتیی هەرێمی کوردستان و سەفین دزەیی، بەرپرسی فەرمانگەی پەیوەندییەکانی دەرەوەی حکومەتی هەرێمی کوردستان پێشوازی لێکرا.
وەزیری دەرەوەی قەتەر لە کۆبوونەوەیدا لەگەڵ سەرۆک مەسعود بارزانی رایگەیاند، دەرفەتی زۆر باش بۆ وەبەرهێنان لە هەرێمی کوردستان هەیە و کردنەوەی کۆنسوڵخانەی قەتەریش لە هەولێر دەبێتە زەمینەیەکی باش بۆ کارکردن لەسەر ئەو دەرفەتە ئابووری و سەرمایەگوزارییانەی لە هەرێمی کوردستاندا هەن.
محەممەد عەبدولڕەحمان ئەلسانی لە بەغدا بە مستەفا گۆران پەیامنێری رووداویشی راگەیاند، نێچیرڤان بارزانی، سەرۆکی هەرێمی کوردستان رۆڵێکی گرنگی بۆ هەبوونی سەقامگیریی لە عێراقدا هەیە.
رووداو: لەبارەی ئەو دیالۆگە نێوخۆییەی کە بەڕێز مستەفا کازمی، سەرۆکوەزیرانی عێراق بانگهێشتی بۆ کرد و پێش ئەو، بەڕێز نێچیرڤان بارزانی، سەرۆکی هەرێمی کوردستان داوای ئەنجامدانی کرد. تێڕوانینی حکومەتی قەتەر لەبارەی رۆڵی کورد لە دیالۆگی نیشتمانی و پرۆسەی سیاسی لە عێراقدا چییە؟
وەزیری دەرەوەی قەتەر: هەرێمی کوردستان بەشێکی جیانەکراوەیە لە عێراق و گەلی کوردیش بەشێکە لە گەلی عێراق. پێمانوایە بانگهێشتکردن بۆ دیالۆگێکی نیشتمانی پێویستە گشتگیر بێت و سەرەڕای جیاوازییە نەتەوەیی و ئایینییەکان دەبێ سەرجەم پێکهاتەکانی گەلی عێراق لەخۆبگرێت. رۆڵی هەرێمی کوردستان رۆڵێکی گرنگ و میحوەرییە. بەڕێز نێچیرڤان بارزانی، سەرۆکی هەرێمی کوردستانیش رۆڵێکی ئەرێنی بۆ سەقامگیریی عێراق و پێکهێنانی ژینگەیەکی نیشتمانیی گشتگیر هەیە و ئێمەش هانی ئەمجۆرە هەنگاوانە دەدەین و هیوادارین هەموو لایەک و پێکهاتەیەک بەئەرێنی بەشداریی پێبکرێت، بەتایبەتی لەم جۆرە دەستپێشخەریانەدا.
وەزیری دەرەوەی قەتەر ئەمڕۆ گەیشتە عێراق و لە بەغدا لەگەڵ هەریەکە لە بەرهەم ساڵح، سەرۆککۆماری عێراق، مستەفا کازمی، سەرۆکوەزیرانی وڵات و فوئاد حوسێن، وەزیری دەرەوەی عێراق کۆبووەوە.
پەرەدان بە پەیوەندییەکانی نێوان هەردوو وڵات و گۆڕانکارییەکانی ناوچەکە بابەتی سەرەکی کۆبوونەوەکان بوون.
فوئاد حوسێن، وەزیری دەرەوەی عێراق رایگەیاند: "لەسەر بانگهێشتی ئێمە، ئەمڕۆ بەسوپاسەوە شێخ محەممەد عەبدولرەحمان ئالسانی سەردانیکردین. لە دیدارەکاندا چەندین بابەتی گرنگ تاوتوێکران، بەتایبەتی پەیوەندییە ئابوورییەکان و هاندانی کۆمپانیاکانی قەتەر بۆ وەبەرهێنان لە عێراق؛ هەروەها دۆخی ناوچەکە و میکانیزمی هاوئاهەنگیکردن بۆ سەقامگیری ناوچەکە و درێژەدان بە پەیوەندییەکان لەگەڵ وڵاتانی دراوسێ و بابەتە نێودەوڵەتی و هەرێمییەکانیش تیشکیان خرایەسەر".
قەتەر وڵاتێکی گرنگی ناوچەی کەنداوە و کردنەوەی کۆنسوڵخانەی ئەو وڵاتەش لە هەولێر، هەنگاوێکی نوێیە لە پەرەدان بە پەیوەندییەکانی نێوان دەوحە و هەولێر.
ئێستا 41 کۆنسوڵخانە و نوێنەرایەتی و نووسینگەی بازرگانیی وڵاتان لە هەرێمی کوردستان هەن. بە کردنەوەی کۆنسوڵخانەکەی، قەتەر دەبێتە هەشتەمین وڵاتی عەرەبی کۆنسوڵخانەی خۆی لە هەولێر بکاتەوە.
