رووداو دیجیتاڵ
کەسایەتییەکی ناسراوی تەریقەتی نەقشبەندی لە بانە لە تەمەنی 88 ساڵیدا کۆچی دواییکرد و بە ئامادەبوونی دەروێشانی تەریقەتی نەقشبەندی و قادریی رۆژهەڵاتی کوردستان و ئێران بەخاک سپێردرا.
بەگوێرەی سەرچاوە خۆجێییەکان بۆ رووداو، رۆژی هەینی عەباس رەزایی ناسراو بە خەلیفە رەزا، یەکێک لە پیرانی تەریقەتی نەقشبەندی و قادریی رۆژهەڵاتی کوردستان، دوای سێ ساڵ نەخۆشی لە شاری بانە، لە تەمەنی 88 ساڵیدا کۆچی دواییکرد.
ئەمڕۆ شەممە بە ئامادەبوونی دەروێشانی تەریقەتی نەقشبەندی و قادریی رۆژهەڵاتی کوردستان و ئێران، تەرمی خەلیفە رەزا لە گۆڕستانی گوندی شوێی سەر بە شاری بانە بەخاک سپێردرا.
شێخ عەباس رەزایی خەڵکی ناوچەی لەیلاخی سەر بە پارێزگای سنەیە و زیاتر لە 60 ساڵ لە شارەکانی مەریوان، بانە، سنە و چەندین شاری پارێزگای خۆراسان وەک تایباد و خاف، خانەقای هەبوو و ئامۆژگاری دەروێشانی دوو تەریقەتی نەقشبەندی و قادری کرد.
خەلیفە رەزا لە تەمەنی منداڵییەوە لە رێگەی شێخ محەممەد دادانەی لەیلاخ، لەگەڵ بنەماڵەی شێخ حیسامەدینی نەقشبەندی ئاشنا بوو و دواتر لەسەر دەستی شێخ موعتەسەم حیسامی، مۆڵەتی دانانی خانەقا و رێنوێنیی موریدانی نەقشبەندی و قادری لە شارەکانی بانە، سنە، سەقز و مەریوان گرتەئەستۆ.
خەلیفە رەزا لەنێو خەڵکی بانە و دەوروبەری پێگەیەکی دیاری هەبوو و لە شارەکانی تایباد و خافیش لە خۆراسان، گونبەدی کاوس لە مازەندەران و ئەهواز و ئیسفەهان، هەروەها لە شاری هەراتی ئەفغانستانیش مورید و دەروێشی هەبوو.
ئەو هاونیشتمانییە لە ساڵی 1978 چووە بانە و لەوێ یەکێک لە گەورەترین خانەقاکانی تەریقەتی نەقشبەندی و قادری دامەزراند و ساڵانە سەدان مورید و دەروێشی ئەو دوو تەریقەتە لە رێوڕەسمە جیاوازەکاندا بەشدارییان دەکرد.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ