رووداو دیجیتاڵ
پارتی دیموکراتی کوردستان و یەکێتی نیشتمانیی کوردستان کۆبوونەوە. هەردوولا لە راگەیێندراوێکی هاوبەشدا دەڵێن، کۆبوونەوەکانیان بەردەوام دەبێت. ئەندامێکی سەرکردایەتیی یەکێتیش بە رووداوی گوت، "ئەم کۆبوونەوەیە هەنگاوێکی زۆر باشبوو."
کۆبوونەوەکە ئەمڕۆ شەممە، 22-02-2025، لە مەکتەبی سیاسیی یەکێتی لە سلێمانی کرا. سەرچاوەیەکی باڵا لەنێو یەکێتی کە ئاگاداری کۆبوونەوەکەیە، بە تۆڕی میدیایی رووداوی راگەیاند، "کۆبوونەوەکە ئەرێنی بوو، بە گشتی کۆبوونەوەی ئەمڕۆ هەنگاوێکی باش بوو."
پارتی و یەکێتی دوای کۆبوونەوەکە لە راگەیێندراوێکی هاوبەشدا، کۆبوونەوەکەیان بە "ئەرێنی" ناوبرد و رایانگەیاند، بڕیاریاندا درێژە بە کۆبوونەوەکانی نێوانیان بدەن "بۆ زیاتر لێکتێگەیشتن و داڕشتنی بەرنامەیەکی هاوبەشی پەسندکراو لەپێناو بەرژەوەندیی هاووڵاتییانی هەرێمی کوردستان".
بە گوێرەی راگەیێندراوەکە "کۆبوونەوەکە تایبەت بوو بەخستنەڕوو و گفتوگۆکردنی راپۆرتی لیژنەی هاوبەشی هەردوولا کە بریتیبوو لە؛ تێڕوانینی سیاسی، کارگێڕی و هەنگاوەکانی پەیوەست بە پێکهێنانی کابینەی دەیەمی حکومەتی هەرێمی کوردستان و دامەزراوەکانی دیکە."
لە بەشێکی دیکەی راگەیێندراوەکەدا هاتووە: "سەرنج و تێبینی وەفدی دانوستاندنکاری هەردوولا خرایەڕوو و میکانیزمی گونجاو بۆ چۆنیەتی رێکخستنەوە و رێککەوتن لەسەر کۆی بابەتەکان قسەی لەسەر کرا."
لیژنەیەکی تەکنیکی لەنێوان پارتی و یەکێتی پێکهێنراوە بۆ شێوازی بەڕێوەبردنی کابینەی نوێی حکومەت. لیژنەکە دوای پێنج کۆبوونەوە، رەشنووسێکیان ئامادەکرد بۆ پێکهێنانی کابینەی دەیەمی حکومەتی هەرێمی کوردستان، ئەمڕۆ یەکەم کۆبوونەوەیان دوای ئامادەکردنی رەشنووسەکە کرد.
لیژنەی تەکنیکیی پارتی بەسەرۆکایەتیی پشتیوان سادق و ئەندامیێتیی دڵشاد شەهاب و ئومێد سەباح بوو. شاندی یەکێتیش بە سەرۆکایەتیی رێواز فایەق و ئەندامیێتی هەریەک لە شاڵاو شێخ سەلاح و ئامانج رەحیم بوو.
زیاتر لە سێ مانگ بەسەر هەڵبژاردن و زیاتر لە دوو مانگیش بەسەر یەکەم دانیشتنی خولی شەشەمی پەرلەمان تێپەڕیوە، بەڵام هێشتا لایەنە سیاسییەکان نەگەیشتوونەتە رێککەوتن بۆ هەڵبژاردنی سەرۆکایەتیی پەرلەمان و سەرۆکی هەرێمی کوردستان و پێکهێنانی کابینەی دەیەمی حکومەت.
