رووداو دیجیتاڵ
سەرۆکی حکومەتی هەرێمی کوردستان پێشوازی لە شاندێکی باڵای ئیماراتی کرد و لە کۆبوونەوەیەکدا 30 دەستپێشخەریی هاوبەشیان لە بواری شێوازی بەڕێوەبەردنی دیجیتاڵی و دەرخستنی تواناکانیان راگەیاند.
رۆژی سێشەممە، 21-10-2025، مەسرور بارزانی، سەرۆکی حکومەتی هەرێمی کوردستان، پێشوازیی لە شاندێکی باڵای دەوڵەتی ئیمارات کرد. شاندەکە بە سەرۆکایەتیی عەبدوڵڵا ناسر لوتا، یاریدەدەری وەزیری کاروباری ئەنجوومەنی وەزیران بۆ ئاڵوگۆڕی ئەزموون و کێبڕکێ، بەمەبەستی پەرەپێدانی هاریکاریی دوولایەنە و بەشداریکردنی شارەزایی حکومی، سەردانی هەرێمی کوردستانی کردبوو.
مەسرور بارزانی سوپاسی دەوڵەتی ئیمارات و شێخ محەممەد بن زاید ئال نەهیان، سەرۆکی ئیمارات و شێخ محەممەد بن راشد ئال مەکتووم، جێگری سەرۆک و سەرۆک وەزیرانی کرد بۆ پشتیوانیی ئەنجامدانی بەرنامەی ئاڵوگۆڕی ئەزموونی حکومی و بەشداریکردنی شارەزایییەکانیان لەگەڵ بەرپرسانی هەرێمی کوردستان.
بەگوێرەی راگەیێندراوی حکومەتی هەرێمی کوردستان لە گفتوگۆکانیاندا، هەردوولا جەختیان لە بەهێزکردنی هاریکارییەکان کردەوە و زیاتر لە 30 دەستپێشخەریی هاوبەشیان راگەیاند.
ئەو دەستپێشخەرییانە بە سوودوەرگرتن لە شارەزایی ئیمارات لە بوارەکانی سیستمی بەڕێوەبردن و بەرزکردنەوەی ئاستی حکومی جێبەجێ دەکرێن. یەکێک لە دەستپێشخەرییە سەرەکییەکان بریتییە لە دابینکردنی داشبۆردێکی ناوەندی بۆ حکومەتی هەرێمی کوردستان، کە چاودێریی پێشکەوتنەکان لە هەموو وەزارەتەکاندا دەکات و بڕیاردان باشتر و بەرپرسیاریێتی بەهێزتر دەکات.
هەروەها "دەستپێشخەرییەکی گرنگ" بەناوی (کۆدنووسانی کوردستان) راگەیێنرا. ئەم پڕۆژەیە ئامانجی راهێنانی 30 هەزار گەنجە لە بوارەکانی کۆدنووسین، زیرەکیی دەستکرد (AI) و شارەزایی دیجیتاڵی، کە بەمەش توانای نەوەی داهاتووی داهێنەر و خاوەنکارانی کوردستان بەهێزتر دەکرێت.
حکومەت دەڵێت: شاندی ئیماراتی تیشکیان خستە سەر ئامانجی سەردانەکەیان کە دەستنیشانکردنی بوارەکانی هاوکاریی دوولایەنەیە. ئەو بوارانە بریتین لە ستراتیژیی دیجیتاڵکردنی حکومەت، پێشبینیی داهاتوو، وەبەرهێنان و ئابووری، چاودێریی تەندروستی، گۆڕانی کەشوهەوا، فڕۆکەوانی و پێشخستن و بنیاتنانی توانا مرۆییەکان.
هەردوولا هیواخوازن کە ئەم سەردان و دەستپێشخەرییانە، پەیوەندیی دوولایەنەی نێوان هەرێمی کوردستان و دەوڵەتی ئیمارات زیاتر بەهێز بکات.
.jpg&w=3840&q=75)
