رووداو- كۆیە زیاتر لە هەفتەیەك بەسەر توندوتیژی و ناڕەزایەتییەكانی بەردەم هوتێل تارای شاری مەهاباددا تێدەپەڕێت، رووداوێك كە لە رۆژانی رابردوودا كوردی لە هەر چوار پارچەی كوردستان و دەرەوەی وڵات بەخۆیەوە سەرقاڵ كرد و لە چەندین رەهەندەوە گەنگەشە كرا، یەكێك لە رەهەندەكانیشی هەڵوێست و كاریگەریی حیزبەكانی رۆژهەڵاتی كوردستان و لەناویاندا حیزبی دیموكراتی كوردستان بوو لەسەر ئەو رووداوە. بە ئامانجی گفتوگۆكردنی زیاتر لەسەر رووداوەكە و كاریگەرییەكانی، سەردانی خالید عەزیزی، سكرتێری گشتی حیزبی دیموكراتی كوردستانم كرد لە بنكەی دەفتەری سیاسیی ئەو حیزبە لە دەشتی كۆیە. هێشتا رووداوەكانی مەهاباد لەناو پێشمەرگەكانی ئەو حیزبەدا باسوخواسی سەرەكی بوو، سەبارەت بەو رووداوە و كاردانەوەكانی چەند پرسیارێكم ئاراستەی خالید عەزیزی كرد. رووداو: ناڕەزایەتییەكەی مەهاباد، پرسێكی سیاسی بوو یان كۆمەڵایەتی؟ خالید عەزیزی: لە ئێراندا پرسە سیاسی و كۆمەڵایەتییەكان تێكەڵن، تەنانەت جاری وا هەیە لە وڵاتانی دێمۆكراتیكیش پرسی كۆمەڵایەتی دەبێتە پرسێكی سیاسی و هەندێك لایەنیش لەو ناوە هەوڵ دەدەن داواكارییەكانی خۆیان زەق بكەنەوە، هەرچەندە پرسەكەی مەهاباد كۆمەڵایەتی بوو، بەڵام لە درێژەیدا بوو بە سیاسی، هۆكاری ئەوەش زوڵم و زۆری كۆماری ئیسلامی و پشتكردن لە داخوازییەكانی خەڵكە كە بەستێنی ئەوە دەڕەخسێنێ. رووداو: توندوتیژی لە پرسی كۆمەڵایەتیدا پاساوی هەیە؟ خالید عەزیزی: من هیچكات لایەنگری توندوتیژی نیم بۆ چارەسەری كێشە و گرفتەكان، بەڵام هۆكاری ئەو توندوتیژییە ئەوەیە كە حكومەت وەڵامدەر نییە و گوێ لە داواكاریی خەڵك ناگرێت. خەڵك لەناچارییەوە پەنای بۆ دەبەن. لە وڵاتانی دیموكراتیكیش توندوتیژی روودەدات، بەڵام بەو جیاوازییە كە بەرهەمی كاردانەوەیەكی كورت ماوەیە، بەڵام لە ئێران بەهۆی كەڵەكەبوونی داخوازییەكانی خەڵك ئەو بەستێنە لەمێژە رەخساوە. رووداو: هەندێك گوتیان توندوتیژی لە پرسی كۆمەڵایەتیدا نەزۆكە و شۆڕشی لێ ناكەوێتەوە؟ خالید عەزیزی: لە روانگەی منەوە ئاگردانی هۆتێلەكە كارێكی باش نەبوو، بەڵام بەرپرسانی كۆماری ئیسلامیی ئێران دەیانتوانی كارێك بكەن كە ئەوە روونەدات، ئەوان زۆر بە ئەزموونن لە جۆری هەڵسوكەوت لەگەڵ خەڵكی ناڕازی و خۆپێشاندەر، من پێموایە ئەوە كۆماری ئیسلامی بوو كە بەكردەوەكانی، خەڵكی هاندا. هێزە ئەمنییەكان دەیانویست وێنایەكی توندوتیژ لە خەڵكی كوردستان نیشان بدەن و روو بەدەرەوە بڵێن كە ئەوە هۆتێل ئاگر دەدەن. واتە كۆماری ئیسلامی قەیرانەكەی ئیدارە كرد، بۆ ئەوەی ناڕەزایەتییەكە بە رێڕەوێكی ئارامدا نەڕوات و نەگوازرێتەوە بۆ شارەكانی دیكەی كوردستان. رووداو: دوای سووتاندنی هۆتێل تارا هێزە ئەمنییەكان پاشەكشەیان پێكرا، بۆچی؟ خالید عەزیزی: كاتێك كە زانییان ناڕەزایەتییەكان گەورە دەبن، پاشەكشەیان بە هێزە ئەمنییەكان كرد، بۆئەوەی خەتا لەسەر شانی خۆیان لاببەن و پروپاگەندەی پێوە بكەن، واتە لە قۆناغی یەكەمدا خەڵكیان ورووژاند بۆ ئەوەی توندوتیژی رووبدات و لە قۆناغی دووەمدا پاشەكشەیان بەهێزە ئەمنییەكان كرد. بەپێی ماددەی 27-ی دەستووری ئێران، خۆپێشاندانەكەی مەهاباد رەوا بوو، نە كەس چەكی پێبوو، نە لە دژی ئیسلام بوو، بەڵام ئەوان یاسای خۆشیان پێشێل دەكەن و ئەو مافە لە خەڵك دەستێننەوە، هۆكارەكەشی نیگەرانیی كۆماری ئیسلامیی ئێرانە لە پرسی كورد، دەسكەوتی كورد لە پارچەكانی دیكە هیوا و ئومێدی بۆ خەڵكی رۆژهەڵاتیش دروست كردووە و حكومەت لەوە دەترسێ. رووداو: ناڕەزایەتییەكە چۆن دەیتوانی رواڵەتێكی مەدەنیانەتر وەربگرێ و بەردەوامیی هەبێ؟ خالید عەزیزی: با خۆپێشاندان وا سەیر نەكەین كە تەنیا دەبێ كاردانەوە بێ بەرامبەر كردەوەیەكی حكومەت، با بژاردە و رۆشنبیرانی ئێمەش كە لەناوخۆدا كار دەكەن بەشداری ناڕەزایەتییەكان بن، بە لەبەرچاوگرتنی ئەوەی كۆماری ئیسلامیی ئێران دەیەوێ لەلایەنی مەزهەبییەوە كەڵكی خراپ لە هەستی مەزهەبی وەربگرێت و لەدژی هەستی نەتەوەیی ئێمە بەكاری دێنێت، با مامۆستایانی ئاینیش بەشداری خۆپێشاندانەكان بن، ئەوە یارمەتیدەرە كە ناڕەزایەتییەكان درێژەی هەبێت و دەستی حكومەت دەبەستێ لەوەی نەتوانێ بە ئاسانی ئەو جۆرەی كە پێی خۆشە لێكدانەوە بكات. ئەگەرچی خۆپیشاندان و ناڕەزایەتی لە هەر حاڵەتێكیدا رەوایە و مافی خەڵكە، با بیكەن بە عادەت و لەوە بەدواوە بەوشێوەیە ناڕەزایەتی دەربڕین. رووداو: بەشێك لە میدیاكانی رۆژهەڵاتی كوردستان بێ ئەوەی بەڵگەیان لەبەردەست بێت، ئەو تۆمەتانەی دەخرانە پاڵ خاوەن هۆتێلەكە پشتڕاستیان دەكردەوە، چەندین هەواڵیشیان بڵاوكردەوە كە دوایی دەركەوت دوورن لە راستی، ئەوە زەبر لە پرستیژی ئێوە نادات؟ خالید عەزیزی: ئێمە توانای میدیاییمان سنووردارە و جاری وا هەیە زانیاری راست ناگاتە میدیای ئێمە و ئەوە قبوڵ دەكەم. رووداو: لەلایەن هەندێك ئەندام و پێشمەرگەی حیزبەكانی رۆژهەڵاتەوە، لەناویاندا حیزبی ئێوەش، هێرش كرایە سەر چالاكڤانانی سیاسی نێوخۆی رۆژهەڵات، بەوە تۆمەتباریان كردن كە بەرژەوەندییەكانی كۆماری ئیسلامی دەپارێزن، لێكدانەوەت بۆ ئەوە چییە؟ خالید عەزیزی: پێوستە هەموو لایەكمان كاتێك باسی كوردستانی ئێران دەكەین، هەركەسە بەپێی گرێدراوی پێگەی جوگرافیایی، حیزبی و تاكەكەسیی خۆی دادوەری نەكات، ئەوە تووشی هەڵەمان دەكات، هەڵوێستی چالاكڤانانی ناوخۆ و دەرەوە كە زیاتر لە تۆڕە كۆمەڵایەتییەكاندا هەڵوێست دەگرن، یا هەڵوێستی حیزبەكان سەبارەت بە رووداوەكەی مەهاباد، زۆر شتی تێدابوو كە دەبێ لێی فێربین، كوردستانی ئێران موڵكی هەموو لایەكمانە، نابێ هیچ لایەك حوكم لەسەر لایەنەكەی دیكە بدات، كاری چالاكڤانانی ناوخۆ بەرز دەنرخێنم، دەبێ لێكحاڵیبوونێك هەبێ و خۆ بپارێزین لە بەكارهێنانی وشەی خائین و جاش و خۆفرۆش كە ئەو رەفتارە لەدژی زمانی پێكەوەبوون و یەكگرتووییە. رووداو: لەسەر تۆڕە كۆمەڵایەتییەكان باس لە دەسپێكی شەڕی چەكداری و تێكهەڵچوون دەكرا، بەڵام هیچكات بەشێوەی فەرمی پشتڕاست نەكرانەوە. خالید عەزیزی: كۆنترۆڵی تۆڕە كۆمەڵایەتییەكان لە دەستی ئێمە بەدەرە، هەندێك كەس بەپێی حەز و خولیای خۆیان بیردەكەنەوە و دەیانەوێ وەها وێنایەك لە رووداوەكە پێشانی رای گشتی بدەن كە خۆیان حەزیان لێیە وابێ، ئەو كێشەیە بەهۆی دابڕان و نەبوونی گوتاری هاوبەش لەنێو لایەنەكانی رۆژهەڵاتی كوردستان دروست بووە، لە نەبوونی گوتار و حەرەكەتێكی هاوبەشدا بۆشایی سەرچاوە دروست دەبێت. رووداو: چالاكڤانان و رۆژنامەنووسان لە ناوخۆی رۆژهەڵات لە دوو لاوە لەژێر گوشاردان، ئێران مۆركی سیاسیبوون و جیاخوازیان لێدەدات و هەندێك لە پێشمەرگە و ئەندامان و لایەنگرانی پارتەكانی رۆژهەڵاتی كوردستانیش مۆركی جاشێتی، ئەوە هەمان رەفتاری كۆماری ئیسلامی نییە؟ خالید عەزیزی: لە هەمانكاتدا كە كار بۆ نەمانی كۆماری ئیسلامی و دامەزراندنی حكومەتێكی دیموكراتیك دەكەین، بەشبەحاڵی خۆم لە ئەگەری شێوانی داهاتووی رۆژهەڵاتی كوردستان نیگەرانم كە لە ئاكامی نەبوونی سەرچاوەیەكی هاوبەشدا، كەشوهەوایەك دروست بێت ئێمە تێیدا زەرەرمەند بین. رەوایە كە لەوەها كەشوهەوایەكدا رەخنەگران و میدیاكاران نیگەرانییان هەبێت. بەڵام گەشبینم چونكە رووداوی هاوشێوەی ئەوەی لە مەهاباد روویدا فێرمان دەكات، ئێمە ئیستا لە دەسەڵات و كۆمەڵگای خۆمان دوورین، بە شێوەی ئاشكرا تەنیا هەوڵسوكەوتمان لەگەڵ ئەندامانی خۆمان هەیە. حیزبێك لەلایەنی سیاسیەوە قەت ناتوانێت باش بیربكاتەوە ئەگەر تەنیا بە گوێرەی ئەقڵییەتی ئەندامانی خۆی بیربكاتەوە و ئەو شتەی دەیڵێت رۆژانە لەناو كۆمەڵگای خۆیدا فیت باگی بۆ نەیەتەوە، ئێمە دوورین لە كۆمەڵگای خۆمان و زۆربەی ئەو كەسانەی لەسەر كارەكانی ئێمە رایان دەردەبڕن خەڵك نینە، زۆربەی خەڵكانێكن كە لە دەرەوە دانیشتوون یان ئەندامی خۆمان یا خەڵكی دەگمەن لە نێوخۆی كوردستانی ئێرانن، ئەوەش گەورەترین كەمایەسی ئێمەیە. رووداو: وا دابنێین ئێوە لە رۆژهەڵات گەیشتوونەتە دەسەڵات، من بابەتێكی رەخنەگرانە لەسەر ئێوە بڵاودەكەمەوە، دەتوانی دڵنیایی بەمن بدەی كە هەڕەشە و مەترسیم لەسەر نابێت؟ خالید عەزیزی: ئەوەی پەیوەندی بە منەوە هەیە دڵنیات دەكەمەوە كە شتی وا روونەدات، بەڵام لە نیگەرانییەكان تێدەگەم، بەو هۆكارە كە كەشوهەوای دیالۆگ لەنێو ئێمەدا پۆلاریزە بووە، ئێمەش وەك حیزبە سیاسییەكان لە خانەی لەیەكدانی یەكدی، بچووككردنەوە و دابڕانداین، جا مادام فەرهەنگی حیزبەكان لەگەڵ یەكتر ئاوابێ، بێگومان ئەندامانی ئەو حیزبانەش لە رێبەرانی خۆیان شت فێردەبن و هەوڵ دەدەن لە دژی دژبەرانی خۆیان و كۆمەڵگاش بەكاری بێنن. بە نیگەرانییەوە سەیری دەكەم، بەڵام تا ئەو جێگایەی پەیوەندی بە من و حیزبی منەوە هەیە، هەوڵ دەدەم فەرهەنگسازی بۆ بكەم. ئێمە لە بەفەرهەنگكردنی ئەساسنامەی خۆشماندا سەركەوتوو نەبووینە، فەرهەنگ لەو شوێنانە دروست نابێ كە حیزبەكان لە كوردستانی عێراق تێیدان، بەڵكو لەناو كۆمەڵگادا دروست دەبێت. رووداو: كاردانەوەكانی حیزبی دیموكراتی كوردستان سەبارەت بە رووداوەكانی مەهاباد چۆن هەڵدەسەنگێنن؟ خالید عەزیزی: ئێمە هەوڵماندا لە چەند بواردا كاری بۆ بكەین، یەكەم: بە خەڵك بڵێین كە خۆپێشاندان و ناڕەزایەتی مافی ئێوەیە و دەبێ شارەكانی دیكەش پشتگیریی لێبكەن. دووەم: راكێشانی پشتیوانی لە پارچەكانی دیكە بوو. سێیەم: ناساندنی لەسەر ئاستی جیهان لەڕێی میدیاوە كە خۆشبەختانە بە هاوكاریی لایەنەكانی دیكە ئەوە مسۆگەر بوو. رووداو: پێشتریش گوتبووت كە ئێرانمان پێ ناڕووخێ؟ پێتوانییە ئەوە ورە رووخێنەرە؟ خالید عەزیزی: دوای تێپەڕینی 70 ساڵ لە مێژووی حیزبی دیموكرات و 36 ساڵ بەربەرەكانی لەگەڵ كۆماری ئیسلامی، دەبێ پێداچوونەوە بەخۆماندا بكەین، رووخێنەر نییە، من ئێستاش بە راشكاوی بە خەڵك دەڵێم خەبات و تێكۆشانی كورد لە هیچ پارچەیەك بۆ رووخاندنی حكومەتی ناوەندیی نییە، كورد حكومەتی ناوەندیی پێ ناڕووخێ، پێشی وانەبێت ئەگەر بیڕووخێنێ لە ناوەند دەبێتە دەسەڵات. 36 ساڵ بڵێین دەڕووخێ و دوایی بۆمان نەڕووخێ، ئەوە رووخێنەرە. كاری ئێمە مسۆگەركردنی مافە نەتەوایەتییەكانی خۆمانە، لەسەر ئەو ئەساسە دەزانین كە چۆن هەڵسوكەوت لەگەڵ ناوەند بكەین. سەردەمێك حیزبە ئێرانییەكان چەپڵەیان بۆ ئێمە لێدەدا كە كوردستان سەنگەری ئازادییە، بۆخۆشم لە رابردوودا گوتوومە، ئێمە نابێ لە ژێر كاریگەریی ئەو دروشمانە خۆمان بخەینە پانتایی شەڕێك كە بۆمان ناكرێ، با شتێك بڵێین كە بۆمان جێبەجێ دەبێ. رووداو: ئەگەر ناتوانن حكومەتی ناوەندی بڕووخێنن، ئەی ناتوانن كوردستانیش ئازاد بكەن؟ خالید عەزیزی: نا، ئێمە تا ئێستا نەمانتوانیوە كۆماری ئیسلامیی ئێران لە كوردستان وەدەرنێین، تا ئێستا نەمانتوانیوە یەك گوندیشی لێ بستێنینەوە و حكومەتی تێدا رابگەیەنین، ئێمە دەبێ پێداچوونەوە بەو فكرەدا بكەین، تا كەنگێ؟ میتۆدێك كە 36 ساڵە لەگەڵی بەرەوڕووین، لایەنێكی سیاسی وەك حیزب و خەڵك وەك گەل دەبێ پێداچوونەوە بە خۆیاندا بكەن، بڵێن ئەوەمان بۆ جێبەجێ نابێت، خۆ ئەوە نە گوناهە و نە كوفرە، بەڵكو تۆ لە حەلێكی دیكە دەگەڕێی كە لەدەستت دێت. رووداو: كاتی ئەوە نەهاتووە پێداچوونەوە بە فۆرمی كلاسیكی حیزبی دیموكرات، واتە سانترالیزمی دیموكراتیك بكەن؟ خالید عەزیزی: دەتوانین پێداچوونەوە بە زۆر شتدا بكەین، بەڵام لەتبوونی حیزبی دیموكرات و دروستبوونی ركابەرییەكی ناسالم لە نێوان هەردوو باڵی حیزبی دیموكرات، گۆڕانكاریی دیل كردووە، نەهامەتییەكە لەوەدایە كاتێك باسێك دێتەگۆڕێ و هەست بە پێویستیی گۆڕانكارییەك دەكرێت سەبارەت بە پرسی كورد لە كوردستانی ئێران، لایەنەكەی دیكە تەنیا لەبەر ركابەریی حیزبی خوێندنەوەیەكی دیكە بۆ ئەو پرسە دەكات، ئەوە تایبەت نییە بە لایەنێك. بەڵام سەرەڕای ئەوە پێموایە كە مەجالێك هەیە بۆ پێداچوونەوە لە ساڵیادی 70 ساڵەی حیزبی دیموكرات. رووداو: چ فۆرمێكی بەدیل پێشنیاز دەكەی؟ خالید عەزیزی: رەنگە لە داهاتوودا باسی ئەوە بكرێت، بەڵام با ئەندامانی هەردوولای حیزبی دیموكرات یەكەم وەك تاك بیر لەوە بكەنەوە. دەبێ بیر لە تاكتیك و ستراتیژی و شێوەی هەڵسوكەوتمان لەگەڵ حكومەتی ناوەندی بكەینەوە. دووەم دەبێ بە راشكاوی ئەوە بڵێین 36 ساڵە لەگەڵ كۆماری ئیسلامی لەشەڕداین، جیاواز لە نێوەڕۆكی كۆماری ئیسلامی كە ئێمە بەخراپی دەزانین، بەڵام ئێمەش بێ هەڵە نەبووین و دەبێ بە بوێرییەوە لانیكەم لە ژوورە داخراوەكانی خۆماندا باسی بكەین، لانیكەم 50 ساڵی رابردووی حیزبی دیموكرات، سەرەڕای قوربانی و تێكۆشانێكی زۆر، بە ناكۆكی و لێكدابڕان تێپەڕبووە. رووداو: واتە عەقڵیەتی دێموكراسیخوازی كە حەفتا ساڵە خەباتی بۆ دەكەن لەناو حیزبدا پراكتیزە نەبووە؟ خالید عەزیزی: عەقڵیەتی دێموكراسیخوازی باسهەڵگرە، ئێمە 15 كۆنگرەمان گرتووە، لە كۆنگرەی چوارەوە تا ئێستا هەمووی لە سەردەمی كۆماری ئیسلامیی ئێراندا بووە، بەردەوام رامانگەیاندووە كە كۆنگرە بە سەركەوتوویی كۆتایی هات، بەڵام لەسەردەمی شۆڕشەوە تا ئێستا حیزبی دیموكرات پڕكێشەترین حیزبی كوردستانی ئێران بووە، مێژوویەك پڕ لە دەستەبەندی، لێكدابڕان، جەناحبازی، ركابەریی نابەجێ و ناوچەگەرایی، پێداچوونەوە ترسی ناوێت و یارمەتیدەر دەبێت بۆ یەكخستنەوەی هەردوو باڵی حیزبی دیموكرات. رووداو: باسی یەكگرتنەوەت كرد، لەو ماوەی رابردوودا چەند كتێب و وتارێك سەبارەت بە پرسی لێكدابڕانەكانی دیموكراتەكان بە قەڵەمی رێبەرایەتی هەردوو لایەن بڵاوبوونەوە، چ كاریگەرییەكیان لەسەر پرسی یەكگرتنەوە داناوە؟ خالید عەزیزی: رێز و حورمەتم هەیە بۆ نووسەرانی ئەو كتێب و بابەتانە، بەڵام كاریگەریی نەرێنییان هەبووە و ئێمەیان لە رابردوودا هێشتووەتەوە و بەس برینەكانیان كولاندووەتەوە. رووداو: پرسی یەكگرتنەوە بەكوێ گەیشتووە؟ خالید عەزیزی: بەداخەوە هیچ دانیشتنێكمان لەسەر ئەو پرسە نییە، هیچیشمان بەدەستەوە نییە، تەنیا پەیوەندیی دۆستانە و ئەمنیەتیمان بەیەكەوە ماوە. رووداو: هیوایەك بە یەكگرتنەوە نەماوە؟ خالید عەزیزی: لە كورتماوەدا هیچ هیوایەك نییە، بەڵام لە درێژماوەدا من هیوادارم. رووداو: پێتوانییە نەبوونی رێبەرێكی كاریزماتیك خەساری گەیاندووە بە بزووتنەوەی كورد لە رۆژهەڵاتی كوردستان؟ خالید عەزیزی: ئەگەر تۆ قسە لە بزووتنەوە و خەبات و تێكۆشان دەكەی، ئەوە رێبەری دەوێ، تەواو. خەبات و تێكۆشان بە قسە ناكرێ، ناتوانی كۆمەڵێك كەس بی و خەریكی شەڕو دەمەچەقە و دەمەقاڵە بی، خەبات حیزبی بەهێز بەرەوپێشی دەبات، خەبات و شۆڕش بە پەرلەمان ناكرێت، بە دەسەڵات دەكرێت. رووداو: رۆژهەڵاتی ناوین بە قۆناغێكی تایبەتدا تێدەپەڕێت، دوو بەرە پێكهاتووە، ئێوە چیتان كردووە بۆ قۆستنەوەی هاوكێشەكان لە بەرژەوەندیی رۆژهەڵات؟ خالید عەزیزی: نابێ سەبارەت بەو ئاڵوگۆڕانە بێ تەفاوت بین، ناشمانەوێ ببینە بەشێك لە كێشەی سوننە و شیعە، بەڵام هەوڵ دەدەین لە بەرژەوەندیی خۆماندا سوودی لێوەربگرین. رووداو: بەرژەوەندیی ئێوە لەوەدا نییە بچنە بەرەی سوننە؟ خالید عەزیزی: بەهیچ شێوەیەك، ئێمە ناچینە بەرەی شیعە یان سوننە، ئێمە لە بەرەی دژی ئێران دەبین. بەرەی شیعە یەكگرتووە و ئێران رێبەریی دەكات، بەڵام بەرەی سوننە چەند دەنگن و هەر وڵاتێك خولیایەكی هەیە. ئێمە نە وەك بەرە بەڵكو بە هەڵسوكەت لەگەڵ وڵاتەكان بە نیازین تەعامول لەگەڵ ئەو پرسە بكەین، بەڵام تا ئێستا بە ئاكامێكی تایبەت نەگەیشتووین. رووداو: سەركونسوڵی ئەمریكا لە هەولێر سەردانی بنكەی رێبەرایەتی حیزبی دیموكراتی كوردستانی كرد، بۆچی هاتبوو؟ خالید عەزیزی: رووداوەكانی مەهاباد دەنگدانەوەی زۆری لە میدیاكانی جیهانیدا هەبوو، پرسیاریان لەبارەی خوێندنەوەی ئێمە بۆ ئەو رووداوە و بارودۆخی رۆژهەڵاتی كوردستان و مەهاباد هەبوو، لەسەر داواكاریی خۆیان هاتن و میوانداریمان كردن، لە روانگەی خۆمەوە كارێكی باشیان كردووە، ئەمریكا زلهێزە و دەبێ لە دەلاقەی راستییەكانەوە رووداوەكانی رۆژهەڵاتی كوردستان ببینێ، ئێمەش بەرچاوڕوونیەكمان لە بارودۆخی رۆژهەڵاتی كوردستان پێدان. رووداو: باسی شەڕی چەكداری یان وەرگرتنی یارمەتیتان نەكرد؟ خالید عەزیزی: دڵنیاتان دەكەمەوە كە شتی وا نەبووە. رووداو: میدیای سێبەری ئێوە، دەڵێت پارێزەرانی رۆژهەڵاتی كوردستان كە هێزێكی چەكدارییە و لە نێوخۆی رۆژهەڵاتدا هەن، ئەمساڵ بڕیارە جووڵەیان پێبكرێ؟ خالید عەزیزی: پارێزەرانی رۆژهەڵاتی كوردستان لەنێوخۆی رۆژهەڵاتی كوردستاندا دامەزراون و بۆخۆیان بڕیار دەدەن بۆ هەر جووڵەیەك و بەرپرسیارێتی هەر كردەوەیەكیان دەكەوێتە سەر شانی خۆیان و پەیوەندی بە حیزبی دیموكراتی كوردستانەوە نییە.
هەواڵە ناوخۆییەکان23-06-2026رەحمان غەریب: شێوازێک لە ئەدەبیاتی مامەڵەکردن لەگەڵ رۆژنامەنووسان هەیە کە دەبێ پەیڕەو بکرێ
تورکیا23-06-2026جێگری سەرۆکی فراکسیۆنی رێگەی نوێی تورکیا: ناکۆکی لەبارەی گەڕانەوەی ئەندامانی پەکەکە هەیە
