رووداو دیجیتاڵ
نرخی مریشک بەرزبووەوە و لەبارەی هۆکارەکانی بەرزبوونەوەیشی هۆکاری جیاواز باس دەکرێن.
ئەحمەد قادر، مریشکفرۆش لە بازاڕی تەیراوەی هەولێر ئەمڕۆ دووشەممە 18-11-2024 بە رووداوی گوت، "دوێنێ یەک کیلۆ گۆشتی مریشک بە 3000 دینار بوو، ئەمڕۆ بە 3250 دینار دەیفرۆشین."
نازم عەبدوڵڵا، سەرۆكی كۆمەڵەی كێڵگە پەلەوەرییەكان بە رووداوی راگەیاند، لە چوار مانگی رابردوودا نرخی مریشک بەردەوام بەرز و نزمیی کردووە.
لەبارەی هۆکاری بەرزبوونەوەی نرخ، ئەحمەد قادر گوتی، "لە کێڵگەکانی پەلەوەردا مریشک کەمبووەتەوە و وەرزی زستانیش کاریگەریی لەسەر ژمارەی مریشک هەیە."
سەرۆكی كۆمەڵەی كێڵگە پەلەوەرییەكانیش پێیوایە، "گرانبوونی مریشک بۆ ئەوە دەگەڕێتەوە کە لە 6 مانگی رابردوودا خاوەن پەلەوەرەکان زەرەریان کردووە و نرخی عەلەف و جووجەڵەیش گران بووە."
لە هەرێمی کوردستان خواستی زۆر لەسەر مریشکی زیندووە بەراورد بە بەستوو. بۆ دابینکردنی مریشکیش هەزار و 840 پەلەوەرخانە هەن، بەڵام بەشێوەی هەمیشەیی هەموویان بەرهەمیان نییە.
ژمارەی پەلەوەرخانەکان بەپێی پارێزگاکان:
- هەولێر: 576 پەلەوەرخانە
- سلێمانی: 727 پەلەوەرخانە
- دهۆک: 344 پەلەوەرخانە
- هەڵەبجە: 35 پەلەوەرخانە
