مامۆستایانی ناڕازی لە سلێمانی و هەڵەبجە: بە یەک مووچە بایکۆت ناشکێنین

ئەمڕۆ (سێشەممە، 17-12-2024)، ئاوات محەممەد، ئەندامی ئەنجوومەنی مامۆستایانی ناڕازی لە سلێمانی بە تۆڕی میدیایی رووداوی گوت: "ئەنجوومەنی سەرتاسەری مامۆستایانی ناڕازی بڕیارمانداوە بایکۆت بەردەوام بێت و بە یەک مووچە ناچینەوە ناوەندەکانی خوێندن".

لە یەکی ئەم مانگەوە دژی دواکەوتنی مووچەکانیان، مامۆستایان لە بەشێکی قوتابخانەکانی هەردوو پارێزگای سلێمانی و هەڵەبجە و ئیدارەی سەربەخۆی گەرمیان بایکۆتیان راگەیاندووە.

هەر ئەمڕۆ فەرهاد قادر، ئەندامی دەستەی مامۆستایانی ناڕازی لە هەڵەبجە بە تۆڕی میدیایی رووداوی گوت: "مامۆستا بە یەک مووچە ناچێتەوە دەوام. لانیکەم دوو مووچە دابەش بکرێت و گەرەنتی مووچەی مانگی 12ـەش بکرێت ئەوکاتە دۆخی خوێندن ئاسایی دەبێتەوە".

بەگوێرەی وەزارەتی دارایی و ئابووری هەرێمی کوردستان، شەممەی داهاتوو مووچەی مانگی 10ـی مامۆستایان و فەرمانبەرانی وەزارەتی پەروەردە دابەش دەکرێت.

ساڵی رابردوو لەگەڵ دەستپێکی خوێندندا لە 13ـی ئەیلوول، لە پارێزگاکانی سلێمانی، هەڵەبجە و ئیدارە سەربەخۆکانی سنوورەکە، مامۆستایان دژی دواکەوتنی مووچە بایکۆتیان کرد و بایکۆتەکەش تاوەکو 20ـی شوباتی ئەم ساڵ درێژەی کێشا.